ގޭންގްތަކުގައި ހަރަކާތްތެރިވާ ނުވަ މީހެއްގެ ފައިގައި ޓެގް އެޅުވުމަށް މޮނިކޮން އަމުރަކަށް އެދި ހައިކޯޓަށް ހުށަހެޅި މައްސަލާގައި އެ ކޯޓުން އަމުރު ނެރެދީފައިވާ ކަމުގެ މައުލޫމާތު ފުލުހުން މީޑިއާއަށް ހިއްސާ ނުކުރިއެވެ.
ގޭންގްތަކުގައި ހަރަކާތްތެރިވާ ނުވަ މީހެއްގެ ފައިގައި ޓެގް އެޅުވުމަށް ހައިކޯޓުން މޮނިކޮން އަމުރު ނެރެފައިވާ ކަމަށް ބައެއް މީޑިއާ ތަކުގައި ރިޕޯޓުކޮށްފައިވާތީ، އެކަމާ ގުޅޭ ގޮތުން 'ސަން' އިން ސުވާލު ދެންނެވުމުން ފުލުހުންގެ މީޑިއާ އޮފިޝަލް ވިދާޅުވީ، މޮނިކޮން އަމުރު ތަންފީޒުކުރުމަށް ފުލުހުން ކުރަންޖެހޭ މަސައްކަތްތައް ކުރަމުންދާ ކަމަށެވެ. ނަމަވެސް އެ އަމުރު ނެރުނުކަން ނުވަތަ ނޫން ކަމެއްވެސް ފުލުހުން ނުބުންޏެވެ.
އެކަމާ ގުޅިގެން ހައިކޯޓުގެ ބަހެއްވެސް ވަނީ ލިބޭ ގޮތް ނުވެފަ އެވެ. އެހެން ކަމުން މޮނިކޮން އަމުރު ނެރުނު ކަމެއް ނުވަތަ ނޫން ކަމެއް ޔަގީނެއް ނުވެ އެވެ.
ފުލުހުން ހޯމް މިނިސްޓްރީއަށް ފޮނުވީ 16 މީހެއްގެ ފައިގައި ޓެގު އަޅުވައިދިނުމަށް އެދި ފާސްކޮށްދިނުމަށެވެ. އެހެން ނަމަވެސް ކޮމިޝަނާ އޮފް ޕޮލިސް އާއި ހޯމް މިނިސްޓަރު ވެސް އިންނަވާ ގޮތަށް އެކުލަވާލާފައިވާ ކޮމިޓީން ނިންމާފައި ވަނީ ނުވަ މީހެއްގެ ފައިފައި ޓެގު އެޅުވުމަށް އެދި ހުށަހެޅުމަށެވެ.
އެ ކޮމިޓީގައި ތިއްބަވަނީ ހޯމް މިނިސްޓަރު އަޒްލީން އަހުމަދު ހިމެނޭ ގޮތަށް ފިޝަރީޒް މިނިސްޓަރު ޑރ. މުހައްމަދު ޝައިނީ އާއި ފިނޭންސް މިނިސްޓަރު އަހްމަދު މުނައްވަރުގެ އިތުރުން ކޮމިޝަނާ އޮފް ޕޮލިސް އަހުމަދު އަރީފު އެވެ.