ބިމުގެ ގޮތުން ކިތަންމެ ކުޑަ ވެފައި އާބާދީގެ ގޮތުން ކިތަންމެ މަދު ނަމަވެސް ރާއްޖެއަކީ ބޭރުގެ ބޮޑެތި ގައުމުތަކުގައި ހިނގާ ނަމެކެވެ. ދިވެހިންނަކީ ބޭރު ގައުމުތަކުން ބަލައިގަންނަ ބައެކެވެ. ފަތުރުވެރިކަމުގެ އިތުރުން ދިވެހިންގެ ހުނަރުވެރި ކަމަކީ ބޭރު ގައުމުތަކުގެ ތަރުހީބު އަބަދު ވެސް ލިބެމުންދާ ކަމެކެވެ.
ހާއްސަކޮށް ރާއްޖޭގެ ބައެއް ހުނަރުވެރި އާޓިސްޓުންނަކީ ދުނިޔޭގެ އެހެން ގައުމުތަކަށް އާ ނަންތަކަކަށް ނުވާނެއެވެ. ރާއްޖޭގެ ހެވީ މެޓަލް ބޭންޑު "ނޮތްނެގަލް"، ރާއްޖޭގެ މަޝްހޫރު ގިޓަރިސްޓު އަހުމަދު ފަސީހު (ފަސީ) އަދި އަހުމަދު ނާޝިދު (ފްލޫ ނާޝިދު) ފަދަ އާޓިސްޓުންނަކީ ރާއްޖޭން ބޭރުން އަދިވެސް އިހްތިރާމް ކުރާ ދިވެހި ފަންނާނުންނެވެ.
މިހާރަށް ބެލިނަމަ ވެސް ދިވެހި ޒުވާން ފަންނާނުންނާއި އާޓިސްޓުން އަންނަނީ ދުނިޔޭގެ އެކިކަންކޮޅުތަކުގައި ފިޔަޖަހަމުން ވެ. އެކަމުގެ ހެއްކަކީ ދިވެހި ބޭންޑުތަކަށާއި ގުރޫޕްތަކަށް ބޭރުގެ ކޮންސެޓްތަކުން މަދުން ނަމަވެސް ފުރުސަތުތައް ލިބެމުން ދިއުމެވެ. ދިވެހި ފަންނާނުންގެ ލަވަތަކާ އަލްބަމްތަކަށް ބޭރުގެ ގައުމުތަކުން ބަލައިގަންނަމުން ދާތީއެވެ.
ސޭސްގައި ދިވެހިންގެ ހުށަހަޅައިދިން ސަގާފީ ނެށުމުގެ ތެރެއިން: ރާއްޖޭގެ ހުށަހެޅުމަށް ބޮޑު ތަރުހީބެއް ލިބުނު --- ސަން ފޮޓޯ/ މުހައްމަދު ސިމާއު
އެގޮތުން ރާއްޖޭގެ ރަފީ ޖަމިއްޔާގެ ފަރާތުން ލިބުނު ފުރުސަތެއްގައި އިންޑިއާގެ ބުބަނޭޝްވަރު ސިޓީގައި މިދިޔަ ހަފްތާ ތެރޭގައި ނިމިގެންދިޔަ ސައުތު އޭޝިއަން ޔޫތް ސަމިޓް (ސޭސް)ގައި ވެސް ދިވެހި ފަންނާނުންތަކެއް ބައިވެރިވެ ވަނީ ހުނަރު ދައްކާލާފައެވެ. މުޅި ސަމިޓު "ރޮކް" ކޮށްލި "ފޭވަރިޓުން" ނަކީ އެއީ އެވެ.
އެގޮތުން ވަރުގަދަ އަޑުގެ ވެރި މުހައްމަދު މުއައްޒިން (ރޮކްސްޓާ)، އޭނާ ހިމެނޭ މެޓަލް މިއުޒިކަށް ހާއްސަ ބޭންޑު، "ގްރެވިޓީ ބައި ހަބޭސް"އާއެކު މުޅި ސަމިޓަށް ގުޑުން އަރުވާލި އިރު، މަޝްހޫރު ލަވަކިޔުންތެރިން ކަމަށްވާ މުހައްމަދު އަބްދުލް ޣަނީ (ތޭރަ) އަދި ސަމާ މޫސާ (ސަމްކޮ)ގެ އަޑުގެ ޖާދޫގައި ސަމިޓުގެ އިސްވެރިން ވެސް ޖެހިގެންދިޔައެވެ.
ފަންނާނުންނަށް ލިބުނު ތަރުހީބުގެ އިތުރުން ރާއްޖެ ތަމްސީލުކޮށް ސޭސްގައި ހުށަހަޅަން ލިބުމަކީ ސަމްކޮއަށް ލިބުނު އުފަލެކެވެ. ސަބަބަކީ ސޭސްއަކީ ރާއްޖެ ތަމްސީލު ކުރުމަށް އޭނާއަށް ލިބުނު ފުރަތަމަ ފަހަރުކަމަށް ވުމެވެ.
ސޭސްގައި ބައިވެރިވި ފަންނާނުންގެ ތެރެއިން ތޭރަވާ އަދި ސަމްކޮ --- ސަން ފޮޓޯ/ މުހައްމަދު ސިމާއު
ސޭސްގެ ތަޖުރިބާ "ސަން"އާ ހިއްސާ ކުރަމުން ސަމްކޮ ބުނީ، ޝޯގައި ދިވެހި ލަވަ ހުށަހަޅައިދިން ނަމަވެސް ރާއްޖެ ކަހަލަ ގައުމަކަށް އެހެން ގައުމުތަކުން ލިބުނު ތަރުހީބު ފާހަގަވެގެން ދިޔަ ކަމަށެވެ. އަދި ގައުމު ތަމްސީލްކޮށް ހުށަހަޅައިދިނުމަކީ އޭނާ ކަހަލަ ކުރިއަރަމުން އަންނަ ފަންނާނުންނަށް ލިބޭ ވަރަށް ބޮޑު ކުރިއެރުމަކާއި ފަހުރެއް ކަމަށް ސަމްކޮ ގަބޫލުކުރެއެވެ.
ނަމަވެސް ދިވެހި ޒުވާނުންނަށް ރާއްޖޭން ބޭރުގައި ގައުމު ތަމްސީލު ކުރުމަށް ލިބޭ ފުރުސަތު ވަރަށް ވެސް މަދު ކަމަށް ސަމްކޮ ބުނެއެވެ. އަދި އެއީ ކުރިއަރަން މަސައްކަތްކުރާ ޒުވާން ފަންނާނުންނަށް ކުރިމަތިވާނެ ގޮންޖެހުމެއް ކަމަށް އޭނާ ދެކެއެވެ.
"އަސްލު ރާއްޖޭގައި ފަންނާނުންނަކަށް ފުރުސަތެއް ނުލިބޭ. އެކްސްޕުލޯ ކުރަން ބޭނުންވާނެ ހުރިހާ އާޓިސްޓުން ވެސް. ހުރިހާ އާޓިސްޓުން ވެސް ބޭނުންވާނެ އެ އާޓިސްޓެއްގެ އަމިއްލަ ހުނަރު ދައްކާލަން އެހެން ގައުމެއްގަ. ރާއްޖެ ތަމްސީލު ކުރަން ވެސް،" ސަމްކޮ ބުންޏެވެ.
ސޭސްގައި ބައިވެރިވި "ގްރެވިޓީ ބައި ހަބޭސް"ގެ މުއައްޒިން އަދި ގިޓަރިސްޓް ރީބު --- ސަން ފޮޓޯ/ މުހައްމަދު ސިމާއު
ރަޝިއާ އަދި ސިންގަޕޫރު ފަދަ ގައުމުތަކުގައި މީގެ ކުރިން ރާއްޖެ ތަމްސީލް ކުރުމުގެ ފުރުސަތު ލިބިފައިވާ އަދި މިފަހަރުގެ ސޭސްގައި ވެސް ބޮޑު ތަރުހީބެއް ލިބިގެންދިޔަ މުހައްމަދު މުއައްޒިން (މޮއްޑެ) ބުނީ، ބޭރު ގައުމުތަކުގައި މީގެ ކުރިން ރާއްޖެ ފާހަަގަވެފައި އޮންނަނީ ފަތުރުވެރިކަމާ މަސްވެރިކަމުގައި ކަމަށެވެ.
ނަމަވެސް ބޭރު ގައުމެއްގައި ދިވެހި އާޓިސްޓުން ހުށަހަޅައިދީ ހުނަރު ދައްކާލުމުން ރާއްޖެ އަކީ ވެސް ހުނަރުވެރި ބައިވަރު މީހުން އުޅޭ ގައުމެއްކަން ގަބޫލުކޮށް ދިވެހިންނަށް ލިބޭ ތަރުހީބު ބޮޑު ކަމަށް އޭނާ ބުންޏެވެ.
ނަމަވެސަ ދިވެހި އާޓިސްޓުންނަށް ރާއްޖެ ތަމްސީލް ކުރުމަށް ލިބޭ ފުރުސަތު މަދު ކަމަށް މޮއްޑެ ވެސް ގަބޫލު ކުރެއެވެ.
މޮއްޑެ ބުނާގޮތުން، އެފަދަ ފުރުސަތުތައް ހޯދަން ދިވެހި ފަންނާނުން ނޫޅެނީ އެވެ. ފުރުސަތުތައް ހޯދަން ނޫޅެނީ ފަންނާނުންނަށް ފަންޑު ކޮށްދޭނެ ބަޔަކު ނެތީމަ ކަމަށް އޭނާ ފާހަގަކުރިއެވެ.
ސޭސްގައި ބައިވެރިވި "ގްރެވިޓީ ބައި ހަބޭސް"ގެ އެއް ގިޓަރިސްޓް ޝަހީދު --- ސަން ފޮޓޯ/ މުހައްމަދު ސިމާއު
"ކޮންމެ ބޭންޑެއް ވެސް ބޭނުންވާނެ ކަންނޭނގެ ރާއްޖޭން ބޭރުގެ މަޝްހޫރު ބަޔަކަށްވާން. ނަމަވެސް އެކަމަށް ލިބޭ ފުރުސަތުތައް މަދު. އާޓިސްޓުންނަށް ފުރުސަތުތައް ލިބޭނީ ކަމެއް ކޮށްދޭން ތިބޭ ބަޔަކު އެކަމަކަށް މަގުފަހި ކޮށްދިނީމަ. އާޓިސްޓުންނަށް އުދަނގޫ ވާނެ ފަންޑުކޮށްގެން އަމިއްލައަށް ދާން،" މޮއްޑެ ބުންޏެވެ.
ޒުވާން ފަންނާނުންނަށް ލިބޭ ފުރުސަތުތަކުގެ ކަންބޮޑުވުންތައް ސަމްކޮ އަދި މޮއްޑެގެ ހުރި ނަމަވެސް ދެ ފަންނާނުންގެ ވެސް އުއްމީދަކީ ކުރިއަށް އޮތްތަނުގައި ކުރިއަރަމުން އަންނަ ފަންނާނުންނަށާއި މިހާރު ހުރި ފަންނާނުންނަށް ވެސް ރާއްޖޭން ބޭރަށް ގޮސް ރާއްޖެ ތަމްސީލް ކުރުމުގެ ފުރުސަތު ލިބިގެން ދިއުމެވެ.
އަދި އެކަމުގައި ޔޫތު މިނިސްޓްރީ އާއި ސަރުކާރުގެ އިތުރުން ރަފީ އެންޖީއޯ ކަހަލަ ޖަމިއްޔާތަކުން އެއްބާރުލުން ދިނުމަށް ދެ ފަންނާނުން އެދެއެވެ.