ނޭޝަނަލް ސެންޓާ ފޯ އިންފޮމޭޝަން ޓެކްނޮލޮޖީ (އެންސީއައިޓީ) އިން އީ އެޑްމިން ސިސްޓަމެއް ތައާރަފް ކޮށްފި އެވެ.
އިއްޔެ ބަނޑޮސް އައިލެންޑް ރިސޯޓްގައި ބޭއްވި ރަސްމިއްޔާތެއްގައި "ޕޭރޯލް މޮޑިއުލް"ގެ ނަމުން ނަންދީފައިވާ އީ ސިސްޓަމް ތައާރަފްކޮށްދެއްވީ ފިނޭންސް މިނިސްޓާރު އަހުމަދު މުނައްވަރެވެ.
އެންސީއައިޓީ އިން ބުނީ އެ ސިސްޓަމުގެ ސަބަބުން މުވައްޒަފުންގެ މުސާރަ އޮޓޯމޭޓްވެ، މުވައްޒަފުންގެ ހާޒިރީއާ ގުޅޭ ހުރިހާ މަސައްކަތެއް، އަވަހަށް ކުރެވޭނެ ކަމަށެވެ. މި ސިސްޓަމުގެ ސަބަބުން އޮފީސްތަކުގެ މަސައްކަތް ކުރުމަށް ފަސޭހަވެ އެކަމަށް ޓަކައި ހޭދަވާ ވަގުތު ކުޑަވެގެންދާނެ ކަމަށް ވެސް އެންއައިސީޓީ އިން ބުންޏެވެ.
މި ސިސްޓަމްގެ ސެކިއުރިޓީ ވަރުގަދަ ކުރުމަށްފަހުގައި މުޅި ރާއްޖެއަށް ސިސްޓަމް ބޭނުންކުރުމަށް ހުޅުވާލާނީ އަންނަ އަހަރުގައި ކަމަށް އެންސީއައިޓީ އިން ބުންޏެވެ.
ޕޭރޯލް ސިސްޓަމުގެ އިތުރުން "ވެވު.އެމްވީ" ނަމުގައި އޮފީސްތައް ގުޅުވާލެވޭނެ ވެބް ޕޯޓަލެއް ވެސް ވަނީ ތައާރަފް ކޮށްފަ އެވެ. މި ޕޯޓަލް މެދުވެރިކޮށް ކޮންމެ ތަނަކުން ވެސް ކޮންޓެންޓް ޝެއާކޮށް ބެލޭނެ ކަމަށް އެންސީއައިޓީ އިން ބުންޏެވެ.