ސަނީ ލިއޯނީ އަކީ ރިއަލިޓީ ޓީވީ ޝޯ އިން ފިލްމީ ދާއިރާއަށް ނުކުމެ، އޭނާގެ ނެށުމުގެ ހުނަރުގެ އިތުރުން އެކްޓު ކުރުމުގެ ހުނަރުން ގިނަ ބައެއްގެ ހިތުން ޖާގަ ހޯދައިފައިވާ ފަންނާނެކެވެ. ބޮޑެތި ފާޑުކިޔުންތަކަކާ އެކު ވެސް ސަނީ ވަނީ ފިލްމީ ދާއިރާގައި ފައިތިލަ ސާބިތުކޮށް، އަމިއްލަ ނަމެއް ހޯދައިފަ އެވެ.
ފިލްމީ ދާއިރާގައި ކާމިޔާބު ދަތުރަކަށް ފަހު ސަނީ މިހާރު މިވަނީ މުޅިން ތަފާތު ރޯލަކަށް ތައްޔާރުވެފަ އެވެ. ކުރިއަށް އޮތް ޕްރޮޖެކްޓާ ގުޅޭ ގޮތުން މާ ގިނަ މައުލޫމާތެއް ނުދިން ނަމަވެސް ސަނީ މިވަނީ އޭނާގެ މުޅިން ތަފާތު 'ލުކް'އެއް އިންސްޓަގްރާމް މެދުވެރިކޮށް ސަޕޯޓަރުންނާ ހިއްސާކޮށްފަ އެވެ.
މޫނުމަތީގައި ޕްރޮސްތެޓިކްސް ވާއިރު، ފޮޓޯގެ ކެޕްޝަންގައި ބުނެފައި ވަނީ އެއީ "އެއީ މީގެ ކުރިން ދުވަހަކު ވެސް ފެނިފައި ނުވާ ފަދަ ކަމެއް" ކަމަށެވެ. ސަނީ ވަނީ ޕްރޮސްތެޓިކްސް އާއެކު ދެ ފޮޓޯއެއް ޝެއާ ކޮށްފަ އެވެ.
އޭނާގެ ކުރިއަށް އޮތް ޕްރޮޖެކްޓުގެ މައުލޫމާތު ހާމަނުކުރި ނަމަވެސް، މިއީ ތަފާތު ކަމަކަށް ވާނެ އެވެ.
ސަނީ ދެން އެންމެ އަވަހަށް ފެނިގެން ދާނީ ސަންޖޭ ދަތުގެ ފިލްމު 'ބޫމީ' ގައި ހިމެނޭ ލަވަ 'ޓްރިޕީ ޓްރިޕީ' އިންނެވެ. އަދި އަރްބާޒް ޚާން އާއެކު ފިލްމު 'ތޭރާ އިންތިޒާރް' އިން ވެސް ފެނިގެން ދާނެ އެވެ.