އުފެދުމުގައި ހިތުގެ ބަލިތައް ހުންނަ ކުދިންނަށް އެހީވުމަށް އުފައްދާފައިވާ ޖަމްއިއްޔާ، ޓައިނީ ހާޓްސް މޯލްޑިވްސް އިން ވޯލްޑް ހާޓް ފެޑެރޭޝަންގެ މެމްބަރަކަށް ވެއްޖެއެވެ.
ވޯލްޑް ހާޓް ފެޑެރޭޝަނަކީ ހިތާއި ލޭނާރުތަކުގެ ބަލިތަކުން ސަލާމަތްވެ ރައްކާތެރިވެ ތިބުމަށް ދުނިޔޭގެ ސިއްހަތު ޖަމްއިއްޔާއާއެކު ކަނޑައެޅިފައިވާ ރަސްމީ ގުޅުމެއްގެ ދަށުން މަސައްކަތްކުރާ ބައިނަލަގްވާމީ ފެންވަރުގެ މަދަނީ ޖަމްއިއްޔާއެކެވެ.
ޓައިނީ ހާޓްސް އޮފީހުގައި މިއަދު މީޑިއާ އަށް މައުލޫމާތު ދެއްވަމުން އެޖަމިއްޔާގެ ސެކްރެޓަރީ ޖެނެރަލް ޖީހާން މުހައްމަދު ވިދާޅުވީ ވާލްޑް ހާޓް ފެޑެރޭޝަނުގެ މެމްބަރުކަމަށް ކުރިމަތިލުމަށް ނިންމީ އެޖަމިއްޔާގެ މަސަކަތްތައް އިތުރަށް ފުޅާކޮށްފައިވާތީއެވެ.
އެޖަމިއްޔާ އުފައްދައިފައިވަނީ އުފެދުމުގައި ހިތުގެ ބަލިތައް ހުންނަ ކުދިންނަށް އެހީވުމަށް ވިޔަސް، ފަހުން ވަނީ އެޖަމިއްޔާގެ އަސާސީ ގަވައިދަށް ބަދަލުގެނެސް ހިތާއި ލޭނާރުތަކުގެ ބަލިތަކަށް ހޭލުންތެރިކަން އިތުރުކުރުން ހިމަނައިފައެވެ.
ރާއްޖޭގައި ނިސްބަތުން އެންމެގިނަމީހުން މަރުވަނީ ގައިންގަޔަށް ނާރާ ބަލިތަކުގައެވެ. އެގޮތުން 70 ޕަސެންޓް މީހުން ގައިންގަޔަށް ނާރާ ބަލިތަކުގައި މަރުވާއިރު އޭގެތެރެއިންވެސް އެންމެ ގިނަމީހުން މަރުވަނީ ހިތާއި ލޭނާރުތަކަށް ދިމާވާ ބަލިތަކުގައި ކަމަށް ހެލްތު މިނިސްޓްރީގެ ތަފާސް ހިސާބުތަކުން ދައްކައެވެ. އެގޮތަށް މަރުވަނީ 41 ޕަސެންޓު މީހުންނެވެ.
ވޯލްޑް ހާޓް ފެޑަރޭޝަނުން އަންދާޒާކުރާގޮތުގައި 2030 ވަނަ އަހަރު އަންނައިރު މުޅި ދުނިޔެއިން ހިތާއި ލޭނާރުގެ ބަލިތަކުގައި މަރުވާ މީހުންގެ އަދަދު އަހަރަކު 30 މިލިއަނަށް އަރާނެއެވެ. ދުނިޔޭގެ ސިއްހަތު ޖަމިއްޔާއާއި ވޯލްޑް ހާޓް ފެޑަރޭޝަން އިން މަސައްކަތްކުރަނީ 2025 ވަނަ އަހަރު އަންނަންވާއިރަށް މި އަދަދު 25 ޕަސެންޓަަށް ދަށްކުރުމަށް ކަމަށާއި ޓައިނީ ހާޓްސްއިން ވެސް މަސައްކަތްކުރަނީ އެ އަމަޒާށް ވާސިލްވުމަށް އެހީތެރިވެދިނުމަށް ކަމަށް އެ ޖަމްއިއްޔާ އިން ބުންޏެވެ.
ޓައިނީ ހާޓްސް އިން ބުނީ އެޖަމިއްޔާއިން ވޯލްޑް ހާޓްސް ފެޑަރޭޝަންގެ މެމްބަރަކަށް ވުމުން ގައުމީ ފެންވަރުގައްޔާއި ސަރަހައްދީ ފެންވަރުގެ އިތުރުން ދުނިޔޭގެ ފެންވަރުގައި ރާއްޖެ ތަމްސީލު ކުރުމުގެ ފުރުސަތު ލިބިގެންދާނެއެވެ.
ޓައިނީ ހާޓަސް އިން މިއަހަރު ކުރަން ހަމަޖައްސައިފައިވާ މަސައްކަތްތައް
- 2017 އިން 2019 އަށް އެ ޖަމްއިއްޔާ އިން މަސައްކަތް ކުރާނެ ގޮތުގެ ސްޓްރެޓެޖިކް ޕްލޭން އެކުލަވައިލުން
- ހެލްތީ ހާޓް ޕްރޮގްރާމް ސެޕްޓެމްބަރު މަހު މާލެ ސަރަހައްދުގައި އިފްތިތާހުކުރުން
- މިއަހަރުގެ ދުނިޔޭގެ ހިތުގެ ދުވަސް ފާހަގަ ކުރުމުގެ ގޮތުން ވޯލްޑް ހާޓް ފެޑަރޭޝަންގެ ތީމް "ޝެއާ ދާ ޕަވާ" އާ ގުޅުވައިގެން ރާއްޖޭގެ ހުރިހާ ސްކޫލެއްގައި ދުވަހާ ގުޅޭ ހާއްސަ މެސެޖު އިއްވައި ސޯޝަލް މީޑިއާ މެދުވެރިކޮށް ހޭލުންތެރިކޮށް ރާއްޖޭ ގެ ބައެއް މުހިންމު ބިނާތައް ރަތް ކުލައިން ދިއްލުން.
އުފެދުމުގައި ހިތުގެ ބަލިތައް ހުންނަ ކުދިންނަށް އެހީވުމުގެގޮތުން މި އަހަރުގެ ޖުލައި މަހު ޓައިނީ ހާޓްސް އިން ވަނީ "ކެއާ ފޯ ޓައިނީ ހާޓްސް" ގެ ނަމުގައި ކޭމްޕެއް ބާއްވައިފައެވެ. އެ ކޭމްޕްގައި ވަނީ 19 ކުއްޖަކަށް މާލީ އެހީތެރިކަން ފޯރުކޮށްދީ 141 ކުއްޖަކު ޑޮކްޓަރަށް ދައްކައިދީފައިވާ ކަމަށް ޓައިނީ ހާޓްސްއިން ބުންޏެވެ.