ޓެނިސް އެސޯސިއޭޝަން އޮފް މޯލްޑިވްސް އިން އިންތިޒާމްކޮށްގެން ކުރިއަށްގެންދާ މެރީ ބްރައުން ޓެނިސް ޗެމްޕިއަންޝިޕް އަހުމަދު ސާއި ވަހީދު އަދި އަޔާނީ މޫސާ ކަލީމް ކާމިޔާބުކޮށްފި އެވެ.
މިމަހުގެ 18 އިން އިއްޔެގެ ނިޔަލަށް ކުރިއަށް ދިޔަ މުބަރާތުގެ ފައިނަލް މެޗުތައް އިއްޔެ ކުޅެފައިވާ އިރު، މުބާރާތް ނިންމުމުގެ ރަސްމިއްޔާތު ބާއްވާފައި ވަނީ ރޭގަ އެވެ. އެ ރަސްމިއްޔާތު ޝަރަފުވެރި ކޮށްދެއްވީ މޯލްޑިވްސް އޮލިމްޕިކްސް ކޮމެޓީގެ ރައީސް މުހައްމަދު ޝަވީދެވެ.
މެންސް އޯޕަން ސިންގަލްގެ ޗެމްޕިއަންކަން ސާއި ހޯދީ ފައިނަލުގައި އިގްނާޒް މަންސޫރު އާ ބައްދަލުކޮށެވެ. އަދި ވުމަންސް އޯޕަން ސިންގަލްގެ ޗެމްޕިއަންކަން އަޔާނީ ހޯދީ ފައިނަލުގައި އައިޝަޔތު ޔަލާ ހުސައިންއާ ވާދަކޮށެވެ.
މުބާރާތުގެ ވަނަ ވަނަ އަށް އަންނަ ފަރާތްތަކަށް ތައްޓާއި އިނާމާއި ހަނދާނީ ލިޔުން ހަވާލު ކޮށްދެއްވީ ޝަރަފުވެރި މެހެމާން އޮލިމްޕިކްސް ކޮމެޓީގެ ރައީސް މުހައްމަދު ޝަވީދެވެ.
މެރީ ބްރުއުންގެ އެހީތެރިކަމާ އެކު ކޮންމެ އަހަރު ވެސް ކުރިއަށްގެންދާ އެ މުބާރާތުގައި މިއަހަރު އެކި އުމުރުފުރާތަކުން ޖުމްލަ 84 ކުޅުންތެރިން ވާދަކުރި އެވެ. އެއީ 47 ފިރިހެން ކުޅުންތެރިންނާއި 37 އަންހެން ކުޅުންތެރިންނެވެ.