ވިލިނގިލީ އިންޖީނުގެއިން ދޫކުރި ބާރުގަދަ ކަރަންޓެއްގެ ސަބަބުން ގެތަކުގެ ކަރަންޓު ސާމާނު ހަލާކުވެއްޖެ

ގއ. ވިލިނގިލި: އިންޖީނުގެއިން ދޫކުރި ބާރުގަދަ ކަރަންޓެއްގެ ސަބަބުން ބައެއް ގެތަކުގެ ކަރަންޓް ސާމާނު ވަނީ ހަލާކުވެފައި--- ސަން ފޮޓޯ/ ޙުސައިން ޙަސަން

ގއ. ވިލިނގިލީ ފެނަކަ އިންޖީނުގޭން ދޫކުރި ބާރުގަދަ ކަރަންޓެއްގެ ސަބަބުން އެ ރަށުގެ ބައެއް ގޭގެ އިލެކްޓްރޯނިކް ސާމާނަށް ގެއްލުން ވެއްޖެ އެވެ.

ވިލިގިލީ ކައުންސިލުގެ ރައީސް މުހައްމަދު މުސްތަފާ 'ސަން'އަށް އިއްޔެ ވިދާޅުވީ އެ މައްސަލަ ދިމާވީ އެ ރަށުގެ ކަރަންޓު ފެންވަރު ރަނގަޅު ކުރުމަށް ފެނަކައިން މަސައްކަތް ކުރަމުންދަނިކޮށް ކަމަށެވެ.

"ރަށުގެ ހަމަ ވަރަށް ގިނަ ގޭގޭގެ ކަރަންޓު ސާމާނަށް ވަނީ ގެއްލުންތަކެއް ލިބިފައި، ހަލާކުވެފައި،" މުސްތަފާ ވިދާޅުވި އެވެ.

ވިލިނގިލީ ފެނަކަ ކޯޕަރޭޝަންގެ މެނޭޖަރު ހައިތަމް އަބްދުލް މުހިސިން ވިދާޅުވީ ކަރަންޓު މައްސަލައެއް ދިމާވި ކަމަށެވެ. ނަމަވެސް އެކަމުގެ ތަފްސީލެއް އޭނާ ނުދެއްވި އެވެ.

ފެނަކަ ކޯޕަރޭޝަންގެ އިސް އޮފިޝަލަކު "ސަން"އަށް މިއަދު ވިދާޅުވީ އެ މައްސަލަ ދިމާވީ އެ ރަށު އިންޖީނުގޭގެ ޓާރާންސްފޯމަރެއް ބަދަލު ކުރަން އުޅުމުގެ ތެރޭގައި ކަމަށެވެ.

އެ މަސައްކަތް ކުރަމުންދަނިކޮށް، ބައެއް ގެތަކުގެ އިލެކްޓްރޯނިކް ސާމާނުތަކަށް ގެއްލުންވީ ބާރުގަދަ ކަރަންޓެއް ދޫކުރެވުމުގެ ސަބަބުން ކަމަށް ބެލެވޭ ކަމަށް އޮފިޝަލް ވިދާޅުވި އެވެ.

އޭނާ ވިދާޅުވީ ލިބުނު ގެއްލުން އަންދާޒާކޮށް، އެކަން ދިމާވާން މެދުވެރި ސަބަބު ދެނެގަތުމަށް އެސެސްމެންޓެއް ހެދުމަށް ވިލިނގިލީ ފެނަކައިގެ ރީޖަނަލް ސެންޓަށް އަންގާފައިވާނެ ކަމަށެވެ.

"އިންޖީނުގޭގެ ޓްރާސްފޯމަރު ބަދަލު ކުރުމުގެ މަސައްކަތް ކުރީ އެކަން ކުރުމުގެ ގާބިލްކަން ލިބިގެންވާ ބައެއް. ނަމަވެސް އެ މައްސަލަ ކުރިމަތިވާން ދިމާވި ސަބަބު ދެނަގަތުމަށް އެސެސްމެންޓް ހެދުމަށް ވާނީ އަންގާފައި،" އޮފިޝަލް ވިދާޅުވި އެވެ.

ރައްޔިތުންގެ މުދަލަށް ލިބުނު ގެއްލުމުގެ ބަދަލު ފެނަކައިން ދޭނެތޯ ސުވާލު ކުރުމުން އޮފިޝަލް ވިދާޅުވީ "އެކަން ވެސް ދެނެގަނެވޭނީ އެސެސްމެންޓް ހެދުމުން. ހާލަތު ދެނެގަތުމުން. ކީއްވެގެން، ކިހިނަކުންވީ ކަމެއްކަން އެނގިގެން،" ކަމަށެވެ.

comment ކޮމެންޓް