ރާއްޖޭގެ ބޮޑީބިލްޑިންގް ފެޑަރޭޝަންގެ ގައުމީ ކޯޗު ކަމަށް ކުރިމަތިލުމަށް ފުރުސަތު ހުޅުވާލައިފިއެވެ.
ބޮޑީބިލްޑިންގް ފެޑަރޭޝަން އޮފް މޯލްޑިވްސް އިން ބުނީ، އެ ފެޑެރޭޝަންގެ ގައުމީ ކޯޗުކަމުގެ މަގާމަށް ޝައުގުވެރިވާ ފަރާތްތަކަށް، އެކަމަށް ކުރިމަތި ލުމުގެ ފުރުސަތު މިއަދުން ފެށިގެން އޯގަސްޓް 14 ވަނަ ދުވަހުގެ 14:00އާ ހަމަައަށް ހުޅުވާލެވިފައިވާ ކަމަށެވެ. ކޯޗުކަމުގެ މަގާމަށް ހޮވޭ ފަރާތް އެ މަގާމުގައި ހުންނާނީ އޯގަސްޓް 14އިން ފެށިގެން ސެޕްޓެމްބަރު 30ގެ ނިޔަލަށެވެ.
ބޮޑީ ބިލްޑިންގެ ގައުމީ ކޯޗަކު ހޯދަން އިއުލާނުކޮށްފައި މިވަނީ، އަންނަ ސެޕްޓެމްބަރު މަހުގެ ފަހުކޮޅުގައި މޮންގޯލިއާގެ ވެރިރަށް އުލާންބާތަރުގައި ބާއްވާ ވޯލްޑް ޗެމްޕިއަންޝިޕް 2017 އަށް ރާއްޖޭގެ ބޮޑީބިލްޑަރުން ތަމްރީނުކުރުމަށެވެ.
"އަޅުގަނޑުމެން މިހާރު ކޯޗުން މި ނަގަނީ ކޮންމެ ފަހަރަކުވެސް ބޭރުގަ އޮންނަ މިފަދަ މުބާރާތަކާ ދިމާކޮށް. މިގޮތަށް ހަދަނީ، ވާދަވެރިކަންވެސް ބޮޑުވީމަ. ވަރަށް ބައިވަރު ބޭފުޅުން ތިއްބަވާ މި މަގާމަށް ކުރިމަތިލައްވަން،" ބޮޑީބިލްޑިންގް ފެޑަރޭޝަން އޮފް މޯލްޑިވްސްގެ ޖެނެރަލް ސެކްރެޓަރީ އަލީ ޝަރީފް ސަންއަށް ވިދާޅުވިއެވެ.
އޭނާ ވިދާޅުވީ، ބޭރުގައި ބާއްވާ މުބާރާތްތަކަށް ޚާއްސަކޮށްގެން މިގޮތަށް ކޯޗުން ނެގުމުގެ މަސައްކަތް ފެށި މިއަހަރުގެ ތެރޭގައި ކަމަށާއި، މިގޮތަށް ހެދުމުން ގިނަ ބަޔަކަށް ފުރުސަތު ލިބި، އަދި ކޯޗު ކަމުގެ ވާދަވެރިކަން އިތުރުވެ ރަނގަޅު ނަތީޖާއެއް ހާސިލްކުރުމަށްވެސް ބާރު އެޅިގެންދާ ކަމަށެވެ.
ގައުމީ ކޯޗުކަމަށް ކުރިމަތިލާ ފަރާތްތަކުގެ ޝަރުތު ތަކުގެ ތެރޭގައި ވޭތުވެދިޔަ ފަސް އަހަރު ދުވަހުގެ ތެރޭގައި ޖިނާއީ އެއްވެސް ކުށެއް ސާބިތުވެފައިވާ ފަރާތަކަށް ނުވުމާއި، ދިވެހިރާއްޖޭގައި އިޖްތިމާއީ އަދި ގައުމީ ފެންވަރުގައި އަމަލީގޮތުން ކުޅެ/އުޅެ ހަރަކާތްތެރިވެ އެކަށީގެންވާ ތައުލީމާއި ތަޖުރިބާ ލިބިފައިވާ ފަރާތެއްކަމުގައިވުން ހިމެނެއެވެ.
ބޮޑީބިލްޑިންގް ފެޑަރޭޝަނުން ބުނީ، ގައުމީ ކޯޗުކަމަށް ޝައުގުވެރިވާ ފަރާތްތަކުން، ސުންގަޑި ހަމަވުމުގެ ކުރީން އެކަމަށް އެދި ހުށަހަޅަން ޖެހޭ އެންމެހައި ލިޔެކިޔުންތައް، އެ ފެޑެރޭޝަންގެ ޖެނެރަލް ސެކްރެޓަރީ އަލީ ޝަރީފްއާ ހަވާލުކޮށްދިނުމަށް، ނުވަތަ [email protected] އަށް މެއިލްކުރުމަށް އެދޭ ކަމަށެވެ.
މިހާރު ބޮޑީބިލްޑިންގް ފެޑަރޭޝަންގެ ގައުމީ ކޯޗުކަމުގެ މަގާމުގައި ހުރީ، އެމްއެންޑީއެފްގެ ބޭކަލެއް ކަމަށްވާ މުހައްމަދު އިބްރާހީމެވެ. އޭނާއަކީ ކުރިންވެސް ގައުމީ ކޯޗުކަން ކޮށްފައިވާ އަދި ބޮޑީބިލްޑަރެއްގެ ގޮތުގައި ވެސް ހަރަކާތްތެރިވެފައިވާ ފަރާތެކެވެ.
މުހައްމަދު އިބްރާހީމް ގައުމީ ކޯޗަކަށް މިހާރު ހަމަޖައްސާފައި ވަނީ، މި ހިނގާ އޯގަސްޓް 20ގައި ދެކުނު ކޮރެއާގައި ބާއްވާ އޭޝިއަން ޗެމްޕިއަންޝިޕް 2017ގައި ބައިވެރިވާ ރާއްޖޭގެ ބޮޑީބިލްޑިންގ ޓީމާ ހަވާލުވުމަށެވެ.
ރާއްޖޭގެ ބޮޑީބިލްޑިންގް ފެޑަރޭޝަން 1997ގައި ވުޖޫދަށް އައިސްފައި ވާއިރު، އެ ފެޑަރޭޝަނުން ރާއްޖޭގައި ބާއްވަމުން އަންނަ އެންމެ ބޮޑު މުބާރާތަކީ މިސްޓަރ މޯލްޑިވްސް މުބާރާތެވެ. އެ މުބާރާތް އެންމެ ފުރަތަމަ ބާއްވާފައި ވަނީ 1999 ވަނަ އަހަރު އެވެ.