ދިވެހިރާއްޖޭގެ މިއުޒިކީ ދުނިޔޭގައި 45 އަހަރަށް ވުރެ ގިނަ ދުވަސް ވަންދެން ލަވަކިޔާފައިވާ އަދި އެ ދާއިރާއަށް ގިނަގުނަ ހިދުމަތްތަކެއްކޮށްފައިވާ މަޝްހޫރު ލަވަކިޔުންތެރިޔާ ފާތިމަތު ރައޫފް ނެޝަނަލް ސެންޓަ ފޮ ދި އާޓްސްގައި ފުރަމުން ގެންދިޔަ މަގާމުން ރިޓަޔާ ކޮށްފިއެވެ.
ނެޝަނަލް އާޓް ގެލެރީގައި ފާތިމަތު ރައޫފަށް ހާއްސަކޮށްގެން އެންސީއޭއިން ރޭ އިންތިޒާމު ކުރި ހަފްލާގައި އޭނާއަށް ވަނީ އެ ސެންޓަރުގެ ފަރާތުން ހަނދާނީ ފިލައެއް ދީފައެވެ.
އެ ފިލާ ހަދިޔާ ހަވާލުކޮށްދެއްވީ އެންސީއޭގެ އެގްޒެކެޓިވް ކޯޑިނޭޓަރު މުހައްމަދު ފާރިޝް ތޯހާއެވެ.
އޮލިމްޕިއަންސް ބޭންޑްގެ ފަރާތުން ވެސް އޭނާއަށް ހަނދާނީ ފިލައެއް އެރުވިއެވެ. އެ ފިލާ ހަވާލުކޮށްދެއްވީ އެންސީއޭގެ އެގްޒެކެޓިވް ކޯޑިނޭޓަރު އަލީ އާމިރެވެ.
އެންސީއޭގައި ފުރަމުން ގެންދިޔަ މަގާމުންް މަޝްހޫރު ލަވަކިޔުންތެރިޔާ ފާތިމަތު ރައޫފް ރިޓަޔާކުރި ހަފްލާގެ ތެރެއިން --- ސަންފޮޓޯ: ފަޔާޒް މޫސާ
މީގެ އިތުރުން ފާތިމަތު ރައޫފަށް ވަނީ "ގޯލްޑެން ވޮއިސް"ގެ ސޭޝް ވެސް ހަދިޔާކޮށްފައެވެ. ސޭޝް ހަވާލުކޮށްދެއްވީ އެންސީއޭގެ އެގްޒެކެޓިވް ކޯޑިނޭޓަރު އަލީ އާދަމް މަނިކެވެ.
އުމުރުން އެންމެ 13 އަހަރުގައި ލަވަކިޔުމުގެ ދާއިރާއަށް ނުކުތް ފާތިމަތު ރައޫފް އެންސީއޭގެ ބޭންޑުގައި އަދާކުރި މަގާމުން ރިޓަޔާ ކުރިކަމުގައި ވިޔަސް ލަވަކިޔުމުގެ ދާއިރާއާ އެއްކޮށް ދުރަށް ނުދާ ކަމަށް ބުންޏެވެ.
ނަމަވެސް އޭނާ ބުނި ގޮތުގައި އެ ދާއިރާގައި އަލަށް ފިޔަޖަހަމުން އަންނަ ތަރިންނަށް ފުރުޞަތު ދިނުމަކީ އެންމެ އެދެވޭ ގޮތެވެ.
"އަޅުގަނޑު ހުއްޓައެއް ނުލާނަން، ދެން އެހެންވިޔަސް މިހާރު އަޅުގަނޑުމެން ދުވަސްވެއްޖެ ދެއްތޯ މިކަމުގަ އުޅޭތާ. ދެން އެހެންވިޔަސް މިހާރު ފަހުގެ ވަރަށް ގިނަ ލަވަކިޔުންތެރިން ނުކުމެއްޖެ ދެއްތޯ، އެ ކުދިންނަށް ވެސް ފުރުޞަތު ދިނުން އެއީ ރަނގަޅުކަމެއް،" އޭނާ ބުންޏެވެ.
އެންސީއޭގެ ވަޒީފާއިން ރިޓަޔާވީ ކަމުގައި ވިނަމަވެސް ފަންނީ ދާއިރާގައި އެހީތެރިކަން ފޯރުކޮށްދެވުނު މިންވަރަކުން އަދިވެސް އެހީތެރިކަން ފޯރުކޮށްދޭނެ ކަމަށް ފާތިމަތު ރައޫފް ބުންޏެވެ.