ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމް ދިރިއުޅެމުންދިޔަ އެޕާޓްމެންޓުން ފެނުނު ފިސްތޯލައާއި ތިން ވަޒަނަކީ ނާޒިމްގެ އެއްޗެއް ނޫން ކަމަށާއި، އެކަން ހިނގައި ދިޔަ ގޮތް ރަނގަޅަށް އެނގިލައްވާ ކަމަށް ކުރީގެ ނައިބު ރައީސް އަހްމަދު އަދީބު ވިދާޅުވެއްޖެ އެވެ.
މިމަހުގެ 20 ވަނަ ދުވަހު އަދީބު ސޮއި ކުރައްވައި ފިންގާޕްރިންޓް ޖައްސަވައި ސުޕްރީމް ކޯޓަށް ފޮނުއްވާފައިވާ ސިޓީގައި ދިވެހިރާއްޖޭޣެ ޝަރުއީ ކޯޓެއްގައި ނާޒިމްގެ ގެއިން ފެނުނު ފިސްތޯލާއި ތިން ވަޒަނުގެ ހަގީގަތް ހާމަކުރުމުގެ ފުރުސަތު ލިބިއްޖެ ނަމަ އެކަމުގެ ތަފްސީލު ހާމަ ކުރައްވާނެ ކަމަށް ވަނީ ވިދާޅުވެފަ އެވެ.
އަދީބުގެ ސިޓީގައި ނާޒިމްގެ އެޕާޓުމަންޓުން 2015 ވަނަ އަހަރުގެ ޖެނުއަރީ މަހުގެ 18 ވަނަ ދުވަހު ފުލުހުން ހޯދި ފިސްތޯލައިގެ ހަގީގަތާއި އެކަން ހިނގައިދިޔަ ގޮތް ވަރަށް ރަނގަޅަށް އެނގޭ ކަމަށާއި، އެ ހާދިސާ އެގޮތަށް ހިނގަން މެދުވެރި ސަބަބާއި، އެކަމުގެ ރޭވުން ފެށިގެން އައި ގޮތާއި ނިމިގެންދިޔަ ގޮތާއި، އެކަމުގައި ބައިވެރިވި މީހުން އެނގޭ ކަމަށެވެ.
އަދީބުވަނީ އެތަކެއްޗާއި އެތަކެތީގެ ހަގީގަތް ނާޒިމް އަށް އެއްވެސް މިންވަރަކަށް އެނގިފައިނުވާނެކަން ސާބިތުކޮށްދޭނެ ކަމުގެ ޔަގީންކަން އަރުވާކަމަށްވެސް އެ ސިޓީގައި ވިދާޅުވެފަ އެވެ.
ފިސްތޯލަ ފެނުނު މައްސަލާގައި ނާޒިމް މިހާރު ދަނީ 11 އަހަރުގެ ޖަލު ހުކުމެއް ތަންފީޒު ކުރަމުންނެވެ. ނާޒިމްގެ މައްޗަށް ކޮށްފައިވަނީ، ހަނގުރާމަވެރި ހަތިޔާރު ރާއްޖެ އެތެެރެކޮށް ގެންގުޅުނުކަމުގެ ތުހުމަތެވެ.
ނާޒިމް ޖަލަށްލާން ކުރިމިނަލް ކޯޓުން ހުކުމްކޮށްފައިވަނީ 2015 ވަނަ އަހަރުގެ މާޗް މަހުގެ 26 ވަނަ ދުވަހުގަ އެވެ. އެ ހުކުމަށް ހައިކޯޓުން ވަނީ ތާއީދުކޮށްފަ އެވެ.