އިންޑިއާގެ މިއަހަރުގެ ރީތީގެ ރާނީއަކަށް ހަރްޔާނާ ސްޓޭޓްގެ ރީތީގެ ރާނީ، މަނުޝީ ޗިއްލަރު ހޮވިއްޖެއެވެ.
މަނުޝީއަށް 54 ވަނަ ފެމިނާ މިސް އިންޑިއާ ވޯލްޑް 2017ގެ ލަގަބު ލިބުނުއިރު، އެ މުބާރާތުން ދެވަނަ ލިބުނީ، ޖަމްމޫ އެންޑް ކަޝްމީރުގެ ރީތީގެ ރާނީ ސަނާ ދުއާ އަށެވެ. ތިންވަނަ ލިބުނީ، ބިހާރް ސްޓޭޓްގެ ރީތީގެ ރާނީ ޕްރިޔަންކާ ކުމާރީއަށެވެ.
އިންޑިއާގެ ރީތީގެ ރާނީ ހޮވުމުގެ މި މުބާރާތް ބާއްވާފައި ވަނީ، އާދީއްތަ ދުވަހުގެ ރޭ، މުމްބާއީގައި ހުންނަ ޔާޝް ރާޖް ސްޓޫޑިއޯގައެވެ. 2017 ވަނަ އަހަރުގެ މިސް ވޯލްޑް މުބާރާތުގައި އިންޑިއާ ތަމްސީލުކުރާނީ މަނުޝީއެވެ.
ދެ ޑޮކްޓަރުންނަށް އުފަން، މަނުޝީ ތައުލީމު ހާސިލްކުރީ ދިއްލީގެ ސެއިންޓް ތޯމަސް ސްކޫލާއި ހަރްޔާނާގައި ހުންނަ އަންހެނުންނަށް ހާއްސަ ކޮލެޖެއް ކަމަށްވާ ބަޣަތު ޕޫލް ސިންގު ގަވަމަންޓް މެޑިކަލް ކޮލެޖުގައެވެ.
މިހަރުގެ ރީތީގެ ރާނީ ހޮވުމުގެ މުބާރާތަށް ބަދަލުތަކެއް ގެނެސްފައި ވާއިރު، އިންޑިއާގެ 30 ސްޓޭޓަކުން ރީތީގެ ރާނީން މި މުބާރާތުގައި ވާދަކޮށްފައި ވެއެވެ.
54 ވަނަ ފެމިނާ މިސް އިންޑިއާ ވޯލްޑް 2017ގެ ލަގަބު ލިބުނީ ހަރްޔާނާގެ ރީތީގެ ރާނީ މަނުޝީ ޗިއްލަރުއަށް، ދެވަނަ މިސް ޖައްމު އެންޑް ކަޝްމީރަށް، ތިން ވަނަ މިސް ބިހާރަށް -- ޓްވިޓަރ ފޮޓޯ
މިފަހަރުގެ ރީތީގެ ރާނީއަކަށް ހޮވުނު މަނުޝީ، ފިނާލޭގައި އިންޑިއަން ހެދުމެއް ލައިގެން ހުރި އިރު، މިއީ މުބާރާތުގެ ތާރީޚުގައިވެސް ބައިވެރިއަކު ފިނާލޭގައި އިންޑިއާގެ ސަގާފީ ހެދުމެއް ލީ ފުރަތަމަ ފަހަރެވެ. ހެދުން ފަރުމާކޮށްފައި ވަނީ، މަޝްހޫރު ޑިޒައިނަރު މަނީޝް މަލޯތުރާއެވެ.
އިންޑިއާގެ 30 ސްޓޭޓުން ހޮވުނު ރީތީގެ ރާނީންގެ މެދުގައި ބޭއްވި މުބާރާތުގެ ބައިވެރީން ޓްރެއިން ކޮށްފައިވަނީ، ނެހާ ދޫޕިއާ، ވަލޫޝާ ޑެ ސޫޒާ، ޑިޕަނީތާ ޝަރްމާ، އަދި ޕަރްވަތީ އޮމަނަކުއްޓަން އެވެ.
މުބާރާތުގެ ފަނޑިޔާރުކަން ކޮށްފައި ވަނީ، 2016 ވަނަ އަހަރުގެ މިސް ވޯލްޑް، ސްޓެފަނީ ޑެލް ވަޔޭއާއި، ބޮލީވުޑްގެ މަޝްހޫރު ތަރީންގެ ތެރޭގައި ހިމެނޭ، އަރްޖުން ރަމްޕާލް، ބިޕާޝާ ބާސޫ، ފެޝަން ޑިޒައިނަރު މަނީޝް، އަބިޝެކް ކަޕޫރް، ވިދްޔުތު ޖަމްވަލް، އަދި އިލިއަނާ ޑިކްރޫޒް ހިމެނެއެވެ.
ކަރަން ޖޯހަރާއި ރިތޭޝް ދޭޝްމުކް ހޮސްޓްކޮށްދިން މި މުބާރާތުގެ މުނިފޫހިފިލުވުުގެ ބައިގައި ސޯނޫ ނިޣާން، އާލިއާ ބަޓް، ސުޝަންތު ސިންގ، ރަންބީރް ކަޕޫރް ބައިވެރިވިއެވެ.
މުބާރާތުގެ ފިނާލޭ، ޓެލެކާސްޓްކުރުމަށް ހަމަޖެހިފައި ވަނީ، ޖުލައި 9 ވަނަ ދުވަހު ކަލާސް ޗެނަލުންނެވެ.