ތެލުގެ ޑިއުޓީ ކުޑަކުރުމާ ގުޅިގެން އެސްޓީއޯއިން ވިއްކާ ތެލުގެ އަގަށް ގެނައި ބަދަލާ ގުޅިގެން، ކަރަންޓުގެ އަގަށް އަންނަ ބަދަލުތައް، ފިތުރު އީދު ބަންދަށް ފަހު ސަރުކާރު ހުޅުވުމާއެކު އިއުލާން ކުރާނެކަމަށް ފެނަކަ ކޯޕަރޭޝަނުން ބުނެފިއެވެ.
މި މަހުގެ މެދުތެރޭގައި، ތެލުގެ ޑިއުޓީ ވަނީ 10 ޕަސަންޓުން ފަސް ޕަސަންޓަށް ކުޑަކޮށްފައެވެ. އެއާ އެކު އެސްޓީއޯއިން ތެލުގެ އަގުވެސް ވަނީ ހެޔޮކޮށްފައެވެ. ރާއްޖޭގައި ކަރަންޓުގެ ޚިދުމަތްދޭ ދެ ކުންފުނި، ސްޓެލްކޯއާއި ފެނަކައަށް ކަރަންޓު އުފެއްދުމަށް ތެޔޮ ސަޕްލައިކޮށްދެނީ އެސްޓީއޯއެވެ. އެސްޓީއޯއިން ބުނި ގޮތުގައި، ފެނަކައާއި ސްޓެލްކޯއަށް ސަޕްލައި ކުރާ ތެލުގެ އަގުވެސް ހެޔޮ ކުރާނެއެވެ.
ފެނަކަ ކޯޕަރޭޝަނުގައި މިއަދު އޮތް ނޫސްވެރިންގެ ބައްދަލުވުމެއްގައި، "ސަން"އިން ކުރި ސުވާލަކަށް ޖަވާބު ދެއްވަމުން މެނޭޖިންގ ޑިރެކްޓަރު އަހްމަދު ޝަރީފް ވިދާޅުވީ، ތެލުގެ އަގަކީ ކަރަންޓުގެ އަގު ކަނޑައަޅާ އެންމެ ބޮޑު އަސާސް ކަމަށެވެ.
"ކަރަންޓުގެ އަގަށް ބަދަލު ގެންނަ އެންމެ ބޮޑު ފެކްޓަރަކީ ތެލުގެ އަގު. ތެލުގެ އަގަށް އައި ބަދަލު. އަޅުގަނޑުމެން ދޭ ޚިދުމަތުގެ ޓެރިފަށް ބަދަލު އަންނާނެ،" ޝަރީފް ވިދާޅުވިއެވެ.
ޝަރީފް ވިދާޅުވީ ފެނަކައާއި ސްޓެލްކޯއިން މިހާރު ދަނީ، މިނިސްޓްރީ އޮފް އެންވާރަމެންޓް އެންޑް އެނާޖީއާއި، ކަމާ ބެހޭ އެހެން ފަރާތްތަކާ މަޝްވަރާ ކުރަމުން ކަމަށާއި، ކަރަންޓުގެ އަގަށް އަންނާނެ ބަދަލުތައް އީދު ބަންދަށް ފަހު ސަރުކާރު ހުޅުވޭ ހަފްތާ ތެރޭގައި އިއުލާން ކުރާނެ ކަމަށެވެ.
"ހުޅުވޭ ހަފްތާ ތެރޭގައި އަޅުގަނޑުމެން ކަރަންޓަށް އަންނާނެ ބަދަލުތައް އިއުލާން ކުރާނަން. އަދި އެކަންކަން ފައިނަލައިޒެއް ނުކުރޭ. އެކަމަކު ކަންކަން ވޯކްއައުޓް ކުރަމުން މި ދަނީ،" ޝަރީފް ވިދާޅުވިއެވެ.
މީގެ ކުރިން ޝަރީފް ވިދާޅުވެފައިވަނީ، ތެލުގެ އަގު ހެޔޮކުރުމާ އެކު، ކަރަންޓުގެ ޚިދުމަތަށް ފެނަކައިން ނަގާ ފިއުލް ސާޗާޖު އުނިކޮށްލެވޭނެ ކަމަށެވެ.
ސްޓެލްކޯގެ މެނޭޖިންގް ޑިރެކްޓަރު އަހްމަދު ޒުހޫރު "ސަން"އަށް މީގެ ކުރިން ވިދާޅުވެފައިވާ ގޮތުން، ކަރަންޓު ބިލަށް 15 ޕަސަންޓެއްހާ މިންވަރުގެ ހެޔޮވުމެއް އަންނާނެއެވެ.
"މިސާލަކަށް، 500 ޔުނިޓުން ގާތްގަނޑަކަށް 150 ރުފިޔާގެ އަގުހެޔޮވުމެއް އަންނާނެ،" ޒުހޫރު ވިދާޅުވިއެވެ.