ފީފާ ކޮންފެޑެރޭޝަންސް ކަޕްގެ ގުރޫޕް ބީގައި ރޭ ކުޅުނު ދެ މެޗުވެސް އެއްވަރުވެގެން ނިމިއްޖެއެވެ.
ރޭ އިރާކޮޅު ކުޅުނު ފުރަތަމަ މެޗުގައި ކެމަރޫންއާ އޮސްޓްރޭލިއާ އެއްވަރުވީ 1-1ގެ ނަތީޖާއަކުންނެވެ.
ރޭގެ މެޗުގައި ކެމަރޫންގެ ހަމަ އެކަނި ލަނޑު އެޓީމަށް ކާމިޔާބުކޮށްދިނީ އަންދްރެ އެންގުސިއާއެވެ. އޮސްޓެރޭލިއާއިން ކާމިޔާބުކުރި ހަމައެކަނި ލަނޑު މެޗުގެ ދެވަނަ ހާފުގައި ކާމިޔާބުކުރީ މާކް މިލިގްސަންއެވެ. އޭނާ އެލަނޑު ޖެހީ އެޓީމަށް ލިބުނު ޕެނަލްޓީއަކުންނެވެ.
މީގެކުރިން އެ މުބާރާތުގައި ޗިލީ އަތުން ކެމަރޫން ބަލިވެފައިވާއިރު އޮސްޓްރޭލިއާވެސް ވަނީ ޖަރުމަނު އަތުން ބަލިވެފައެވެ.
ރޭ ގުރޫޕް ބީގައި ކުޅުނު ދެވަނަ މެޗުގައި ޖަރުމަނު އަދި ޗިލީ އެއްވަރުވީވެސް 1-1 ގެ ނަތީޖާއަކުންނެވެ.
ޗިލީ އިން މެޗުގައި ކާމިޔާބުކުރި ހަމައެކަނި ލަނޑު ކާމިޔާބުކޮށްދިނީ އެލެކްސިސް ސަންޗޭޒެވެ. އެ ލަނޑާއެކު އޭނާ ވަނީ ޗިލީ އަށް އެންމެ ގިނަ ގޯލް ޖަހައިދިން ކުޅުންތެރިއާއަށް ވެފައެވެ. ޖަރުމަނުގެ ލަނޑު އެޓީމަށް ކާމިޔާބުކޮށްދިނީ ލާސް ސްޓީންޑިއެވެ.