މިހާރު ކުރިއަށްދާ ޔުއެފާ ނޭޝަންސް ލީގު ފުޓުބޯޅަ މުބާރާތުގައި ޕޯޗުގަލް ކުޅުނު ދެވަނަ މެޗުވެސް ކާމިޔާބުކުރިއިރު ޖަރުމަނު، ގްރީސް އަތުން ބަލިވެއްޖެއެވެ.
ގްރޫޕް ސްޓޭޖުގެ ދެވަނަ މެޗުގައި ނޯވޭއާ ބައްދަލުކޮށް ޕޯޗުގަލް އިން 1-2 ގެ ނަތީޖާއިން މެޗު ކާމިޔާބުކުރި އިރު، ގްރީސް އަތުން ޖަރުމަނު ބަލިވެފައިވަނީ 0-1 ގެ ނަތީޖާއިންނެވެ.
ޕޯޗުގަލް އިން މެޗުގެ ލީޑު ނަގާފައިވަނީ މެޗުގެ 17 ވަނަ މިނެޓުގައެވެ. ޕެޑްރޯ ނެޓޯ ދިން ޕާހަކުން، ޕެނަލްޓީ އޭރިއާ ރޮނގު މަތިން ކަހަލަ ގޮތަކަށް ވާތު ތިރީ ކަނަށް އަމާޒުކޮށްލައިގެން މި ލަނޑު އެޓީމަށް ކާމިޔާބުކޮށްދީފައިވަނީ ޖޮއާއޮ ފެލިކްސް އެވެ. ދެވަނަ ހާފް ފެށިގެން ހަ ވަރަކަށް މިނެޓު ތެރޭ ނޯވޭއިން މެޗުގެ ނަތީޖާ އެއްވަރުކުރި ނަމަވެސް ޕޯޗުގަލްއިން ވަނީ ކުޑަ އިރުކޮޅެއްތެރޭ އަލުން ލީޑު ނަގާފައެވެ.
މެޗުގައި ނޯވޭއަށް ޖެހުނު ހަމައެކަނި ލަނޑު ކާމިޔާބުކޮށްދީފައިވަނީ މިވަގުތު ދުނިޔޭގައި ހުރި އެންމެ މޮޅު ސްޓްރައިކަރު ކަމަށް ގިނަ ބަޔަކު ގަބޫލުކުރާ އާލިންގް ހާލަންޑް އެވެ. މިއީ ނޯވޭއަށް ލިބުނު ހިލޭޖެހުމެއް ކީޕަރު ދިފާއުކުރުމަށްފަހު ދެވަނަ ފަހަރަށް ކުޅުމުގެ ތެރެއަށް ނުކުތުމުން ބޯޅަ ސާފުކޮށް ނުލެވުމުގެ ފައިދާ ނަގައިގެން ޖެހި ލަނޑެކެވެ.
ޕޯޗުގަލްގެ ދެވަނަ ލަނޑު ކާމިޔާބުކޮށްދިނީ ގޮންކާލޯ ރާމޯސް އެވެ. މިއީ ނޯވޭގެ ކީޕަރަށް ހެދުނު ބޮޑު ގޯހެއްގެ ފައިދާ ނަގާ، ޕެނަލްޓީ އޭރިއާ ބޭރުން ކީޕަރު ބޯމަތިން ބޯޅަ އޮއްސާލައިގެން ކާމިޔާބުކުރި ހިތްގައިމު ލަނޑެކެވެ. މެޗުގައި ރާމޯސް އިތުރު ލަނޑެއް ޖެހިނަމަވެސް ވީއޭއާރުން ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ.
ޕޯޗުގަލް އާއި ނޯވޭ ބައްދަލުކުރި މެޗުގައި ގޮންކާލޯ ރާމޯސް ޖެހި ދެވަނަ ލަނޑުގެ ވީއޭއާރް އިމޭޖް--މި މެޗުގައި އެންމެ ފާގަހަކުރެވުނު ކަމަކީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއަށް މެޗުގެ އެއްވެސް ހިސާބަކުން ފުރުސަތު ނުދީ، ބެންޗުގައި ބޭންދުމެވެ.
މި މޮޅާއެކު ޕޯޗުގަލްއިން މިވަނީ ދެ މެޗުން ލިބުނު ހަ ޕޮއިންޓާއެކު ގްރޫޕްގެ އެއްވަނައިގައި ހަމަޖެހިލާފައެވެ. ދެވަނަ އަދި ތިންވަނައިގައި އޮތް ނޯވޭ އަދި ޑެންމާކަށްވެސް ލިބިފައިވަނީ ތިން ޕޮއިންޓެވެ. މި ގްރޫޕުގެ ފުލުގައި ވޭލްސް އޮތީ ކުޅުނު ދެ މެޗުންވެސް ބަލިވެގެންނެވެ.
ޖަރުމަނާއި ގްރީސް ބައްދަލުކުރި މެޗަށް ބަލާއިރު ޖުމްލަކޮށް ދެ ޓީމުގެ ފަރާތުންވެސް ފެނިފައިވަނީ ވަރަށް އާދައިގެ ކުޅުމެކެވެ. މެޗުގައި ފެނުނު ހަމައެކަނި ލަނޑު، 74 ވަނަ މިނެޓުގައި ކާމިޔާބުކޮށްދީފައިވަނީ ޑިމިޓްރިސް ކޯބެލިސްއެވެ.
މެޗަށް ނެރުނު ޖަރުމަން ސްކޮޑަށް ބަލާއިރު އެންމެ ފާހަގަކުރެވުނު އެއް ކަމަކީ، ކޯޗު ޔާގަން ކްލޮޕްގެ އެއް ނަންބަރު ކީޕަރު ގޮތުގައި ބޭނުންކުރާނެ ކަމަށް ބެލެވުނު މާކް އަންޑްރޭ ޓާ-ސްޓޭގަންގެ ބަދަލަށް ތުރުކިޔޭގެ ބެޝިކްޓަސްއަށް ކުޅެމުން އަންނަ އެލެކްސެންޑާ ނޫބެލް ކުޅެން އެރުވުމެވެ. މީގެ އިތުރަށް، ސާޖް ގްނަބްރީ ފުރަތަމަ އެގާރައަށް ނަގާފައި ނުވާކަންވެސް ފާހަގަކުރެވެއެވެ.
މި ނަތީޖާއާއެކު ކުޅުނު ދެ މެޗުވެސް ކާމިޔާބުކޮށްގެން ގްރީސް އޮތީ ގްރޫޕުގެ އެއްވަނައިގައެވެ. ދެ މެޗުން ލިބުނު އެންމެ ޕޮއިންޓަކާއެކު ޖަރުމަނު އޮތީ ތިންވަނައިގައެވެ. ގްރޫޕުގައި ދެން ހިމެނެނީ ހަތަރު ޕޮއިންޓާއެކު ދެވަނައިގައި އޮތް ނެދަލޭންޑްސް އަދި ޕޮއިންޓެއް ނުލިބި، ފުލުގައި އޮތް ސާބިއާއެވެ.
މުބާރާތުގައި ޕޯޗުގަލްއަށް ކުރިއަށް އޮތީ ބުރާސްފަތި ދުވަހުގެރޭ ޑެންމާކްއާ ދެކޮޅަށް ކުޅޭ މެޗެވެ. އަދި ޖަރުމަނަށް އޮތީ ހަމަ އެރޭ، ސާބިއާ އާ ދެކޮޅަށް ކުޅޭ މެޗެވެ.