ބާވީސް މީހުންމަރުވި، މެންޗެސްޓާރގެ ހަމަލާތަކަށްފަހު މުސްލިމުންނާ ދެކޮޅަށްދޭ ހަމަލާތައް 500 ޕާސެންޓް އިތުރުވެފައިވާ ކަމަށް މެންޗެސްޓަރ އީވްނިންގ ނިއުސް އިން ހާމަކޮށްފިއެވެ.
މެންޗެސްޓަރގެ އެ ހަމަލާއަށްފަހު 224 ހަމަލާ މުސްލިމުންނާ ދެކޮޅަށް ދީފައިވާކަމަށް އެ ސިޓީގެ ފުލުހުން ބުނެއެވެ. މިދިޔަ އަހަރު ހަމަ މިދުވަސްވަރު، މުސްލިމުންނާ ދެކޮޅަށް ދީފައިވާ ހަމާލަތަކުގައި ރިޕޯޓްކޮށްފައިވާ އަދަދަކީ 37 ކެވެ.
ފުލުހުންނަށް ކޮށްފައިވާ ރިޕޯޓްތަކުގެ ތެރޭގައި ހަމާލާދިނުމާއި، އިންޒާރު ދިނުމާއީ ތަކެއްޗަށް ގެއްލުން ދިނުން ހިމެނެއެވެ.
އެ ހަމަލާތަކުގެތެރޭގައި، މެންޗެސްޓަރ ހާދިސާ ހިނގިތާ ކުޑައިރުކޮޅެއްގެ ތެރޭގައި އޮދިހަމްގެ މިސްކިތަކަށް ދިން އަލިފާންބޯޅައިގެ ހަމަލާ ހިމެނެއެވެ.
މެންޗެސްޓަރގެ ފުލުހުން ދެކޭގޮތުގައި މި ހަމަލާތަކަކީ ހަމައެކަނި ވަގުތީ ކަމެކެވެ.
"މެންޗެސްޓައަކީ ތަފާތު ނަސްލުތަކާއި އަދި ދީންތަކުގެ މީހުން ދިރިއުޅޭތަނެއް. އެއީ އަހަރުމެން ފަހުރުވެރިވާ ކަމެއް. އަހަރުމެން އެއްވެސްގޮތަކަށް އެއްވެސް ބަޔަކާ ޖައްސާލައިގެން ފުރައްސާރަކޮށް ހަމަލާ ދިނުމަކީ ބަލައިގަންނަކަމެއް ނޫން،" އެސިސްޓެންޓް ޗީފް ކޮންސްޓެބަލް ރޮބް ޕޮޓް ވިދާޅުވިއެވެ.