ރޯދަ މަހު ހަވީރު ކުރިޔަށް ގެންދާ ޓީވީ އަށް ޚާއްސަ ޕްރޮގްރާމް ތަކުގެ ތެރެއިން އެންމެ ބޮޑު ޕްރޮގްރާމްގެ ގޮތުގައި، ސަން ޓީވީ ގެ "ފިނިއަށި" މި އަހަރުވެސް ކުރިޔަށް ގެންދަން ނިންމައިޕްރޮގްރާމްގެ ޕާޓްނަރުންނާ އެކު ސޮއިކޮށްފި އެވެ.
ފިނިއަށި ޕްރޮގްރާމް މި އަހަރު ވެސް ކުރިޔަށް ގެންދާނީ ކޮންމެ ދުވަހެއްގެ ވެސް ހަވީރު 4:15 އިން 5:30 އަށް ކަމަށް ސަން ޓީވީގެ އޮފިޝަލަކު ވިދާޅުވި އެވެ.
ފިނިއަށި ޕްރޮގްރާމްގެ މި އަހަރުގެ ޓައިޓަލް ސްޕޮންސަރަކީ ދާދި ފަހުން ރާއްޖެ އަށް ތައާރަފު ކުރި ދުނިޔޭގެ އެއްވަނަ ޖޫސް ބްރޭންޑް ކަމަށްވާ "މިިނިޓް މެއިޑް" އެވެ. ކޯ ސްޕޮންސަރުންނަކީ އެސްޓީއޯ، އަދި މޯލްޑިވިއަން އެވެ. އެސޯޝިއޭޓް ޕާޓްނަރަކީ މިފްކޯ އަދި އެމްޔޫ ސްޓޯރެވެ. މި އަހަރުގެ ޕްރޮގްރާމްގެ ޑިޖިޓަލް ސާވިސް ޕާޓްނަރަކީ ދިރާގު އެވެ. ހަދިޔާ ޕާޓްނަރުންނަކީ އީލައިފް އަދި އެންސިސް އެވެ. މި ހުރިހާ ޕާޓްނަރުންނަކީ މިދިޔަ އަހަރު ވެސް ފިނިއަށީގެ ޕާޓްނަރުންގެ ގޮތުގައި ތިބި ފަރާތްތަކެވެ. މިދިޔަ އަހަރު ފިނިއަށީގެ މެއިން ސްޕޮންސަރަކީ އެމްޓީސީސީ އެވެ. މި އަހަރުގެ ފިނިއަށި ކުރިޔަށް ދާނީ "މިނިޓް މެއިޑް ފިނިއަށި" ގެ ނަމުގަ އެވެ.
ފިނިއަށި ޕްރޮގްރާމް ފަށާފައި ވަނީ މީގެ 8 އަހަރު ކުރީން ސަން އެފްއެމް އިންނެވެ. ސަން ޓީވީ ގެ ޚިދުމަތް ފެށުމަށް ފަހު މި ޕްރޮގްރާމް ކުރިޔަށް ގެންދަނީ ސަން ޓީވީންނާއި ސަން އެފްއެމް އިން އެއް ވަގުތެއްގަ އެވެ.
މި އަހަރު ވެސް ފިނިއަށި ޕްެރޮގްރާމް ގައި ދުވަހުން ދުވަހަށް ލިބޭ ވަރަށް ގިނަ ދައުރުވާ އިނާމުތަކެއް ހިމެނޭނެ އެވެ. އޭގެ ތެރޭގައި މޯލްޑިވިއަންގެ ފަރާތުން ހުށަހަޅާފައިވާ ޓިކެޓު ތަކާއި މިފްކޯގެ ފަރާތުން ކޮންމެ ދުވަހަކު ދޭ މަސް ކޭހާއި އެސްޓީއޯ އަދި އީލައިފް ގެ ފަރާތުން ދޭ ބަދިގެ އާއި ގޭތެރޭގައި ބޭނުންކުރާ އައިޓަމް ތަކާއި މެއިން ސްޕޮންސާގެ ފަރާތުން ދޭ ކޯކާއި ބޮނަކުއާ ފެން ކޭސްތައް އަދި މިނިޓް މެއިޑް ކޭސްތައް ހިމެނިގެން ދާނެ އެވެ. އެސްޓީއޯ އަދި އީލައިފް ގެ ފަރާތުން ދޭ އިނާމުތަކުގެ ތެރޭގައި މިކްސަރާއި ގްރިލާ އާއި ޓޯސްޓަރާއި ރައިސް ކުކަރ އާއި ވެކިޔުމް ކްލީނަރ އަދި އަވަން ފަދަ އައިޓަމްތައް ހިމެނެ އެވެ. މޯލްޑިވިއަން އިން ދޭ ޓިކެޓުގެ ތެރޭގައި ޑޮމެސްޓިކް އަދި އިންޓަނޭޝަނަލް ޓިކެޓް ހިމެނެ އެވެ. މީގެ އިތުރުން އެހެން އަހަރު ތަކެކޭ އެއް ފަދައިން މި އަހަރު ވެސް ފިނިއަށި ޕްރޮގްރާމުން އެންމެ ގިނަ މާކްސް ހޯދާ ފަރާތަކަށް ފައިސާގެ އިނާމު ލިބޭނެ އެވެ.
މި އަހަރު ވެސް ފިނިއަށީގެ އީދު ހަދިޔާ ސްޕޮންސަރ ކޮށްފައި ވަނީ މިދިޔަ އަހަރުގެ ވެސް އީދު ހަދިޔާ ޕާޓްނަރު ކަމަށްވާ ޝީޝާގެ ފަރާތުންނެވެ. މި އަހަރުގެ އީދު ހަދިޔާގެ ގޮތުގައި ޝީޝާ އިން ހުށަހަޅާފައި ވަނީ -/48000ރ. ގެ އަގުހުރި "ސްކޫޕީ އައި ޕްރެސްޓީޖް" ސައިކަލެކެވެ.
މި އަހަރުގެ ފިނިއަށި ޕްރޮގްރާމްގެ އީދު ހަދިޔާގެ ގޮތުގައި ޝީޝާ އިން ހުށަހަޅާފައިވާ ސައިކަލުގެ ފޮޓޯއެއް ---
މި އަހަރުގެ ފިނި އަށި ޕްރޮގްރާމްގައި ވެސް މި ޕްރޮގްރާމްގެ މުހިންމު ހުރިހާ ބައިތަކެއް ހިމެނޭނެ ކަމަށް ޕްރޮގްރާމްގެ ޕްެރޮޑިއުސަރު ވިދާޅުވި އެވެ. އޭގެ ތެރޭގައި ދޫފުރޮޅި އާއި ސުވާލާއި ޖަވާބު އަދި އަޑުފޮށި ހިމެނޭނެ އެވެ.
މި އަހަރުގެ ފިނި އަށްޓަށް އާ ބައެއް ތައާރަފުކުރަން ނިންމާފައިވާ ކަމަށް ޕްރޮޑިއުސަރު ވިދާޅުވި އެވެ. އެއީ "ފިނި ވީޑިއޯ" ގެ ނަމުގައި ތައާރަފުކުރާ ބައެކެވެ. މިބައިގައި އޮންނާނީ ކޮންމެ ދުވަހަކު ވެސް ޕްރޮގްރާމްގެ ފަރާތުން ހުޅުވައިލާ ތީމަކަށް ވީޑިއޯ ފޮނުވުމެވެ. މި ގޮތުން ފޮނުވާ ވީޑިއޯތައް ހުންނާނީ އެއް މިނެޓުގެ ދިގުމިނުގަ އެވެ. ފޯނުން ވެސް ވީޑިއޯ ފޮނުވޭ ގޮތަށް ތައާރަފުކުރާ މިބަޔަށް ލިބޭ ވީޑިއޯތައް ޖަޖުންގެ ޕެނަލަކުން ޝޯޓުލިސްޓުކޮށް ހޮވައިލެވޭ ތިން ވީޑިއޯ އެއް ކޮންމެ ދުވަހަކު ވެސް ޕްރޮގްރާމްގެ ތެރޭގައި އިއުލާނުކޮށް އެސްއެމްއެސް އަށް ހުޅުވާލެވޭނެ އެވެ. މިބައިން ކޮންމެ ދުވަހަކު ވެސް އެއްވަނަ ހޮވައި އެ ފަރާތަކަށް ހަދިޔާގެ ގޮތުގައި މަސް ކޭހެއް ދެވޭނެ އެވެ.
ފިނިއަށި ޕްރޮގާމް ފެށީއްސުރެ މިއަދާ ހަމައަށް އައި އިރު މި ޕްރޮގްރާމް ވެގެން ގޮސްފައި ވަނީ ރޯދަ މަހު ހަވީރު ގަޑީގައި ގެނެސްދޭ އެންމެ މަގުބޫލު، އެންމެ ފޯރި ގަދަ އަދި އެންމެ ގިނަ ބަޔަކު ބަލާ ޕްރޮގްރާމަށެވެ. އެ ގޮތުން މި ޕްރޮގްރާމްގައި ބައިވެރިވުމަށް އެދި ރާއްޖޭގެ އެކި ސަރަހައްދުތަކުން ކޮންމެ ދުވަހަކު އެތައް ސަތޭކަ ބަޔަކު ނަން ނޯޓު ކުރަމުން ގެންދެ އެވެ.