ސައުދީ ރަސްގެފާނުގެ ހިލޭ އެހީގެ ދަށުން ލ. މާބައިދޫގައި އިމާރާތްކުރި މިސްކިތުގައި ވަގުތީ ގޮތުން ނަމާދު ކުރަން ފަށައިފިއެވެ.
މިައަދު ހުކުރު ނަމާދަށް ފަހު އެ މިސްކިތް ވަގުތީ ގޮތުން ހުޅުވައިދެއްވުމުގެ ގޮތުން އިމާމްވެ އެ މިސްކިތުގައި ހުކުރު ކޮށްދެއްވީ އިސްދޫ ދާއިތާގެ މަޖިިލިސް މެމްބަރު އަލް ގާރީ އަހުމަދު ރަޝީދް އިބްރާހީމް އެވެ.
މިއަދު ހުކުރު ނަމާދަށްފަހު އެ މިސްކިތުގައި ވަގުތީ ގޮތުން ނަމާދުކުރަން ފެށިފައި ވާއިރު މިސްކިތް ރަސްމީ ގޮތުން ހުޅުވޭނޭ ވަކި ތާރީހެއް އަދި ނޭނގޭ ކަމަށް މާބައިދޫ ކައުންސިލްގެ މެންބަރު ހަސަން އާދިލް، ސަންއަށް ވިދާޅުވިއެވެ.
"މިސްކިތް ރަސްމީ ގޮތުން ނުހުޅުވި ލަސްވަނީ މިސްކިތުގެ ބައެއް މަސައްކަތްތަށް އަދި ނުނިމި ހުރީމަ. ނަމަވެސް ނުނިމި ހުރި މަސައްކަތްތައް ނިންމައި މިސްކިތް ވަރަށް އަވަހަށް ރަސްމީކޮށް ހުޅުވޭނެ އިރާދަކުރެއްވިއްޔާ،" އާދިލް ވިދާޅުވިއެވެ.
އެ މިސްކިތަކީ 504 މީހުންގެ ޖާގައިގެ މިސްކިތެއްކަމަށް ވެސް އާދިލް ވިދާޅުވިއެވެ.
ސައުދީ ރަސްގެފާނުގެ ހިލޭ އެހީގެ ދަށުން ލ. މާބައިދޫގައި ބިނާކުރި މިސްކިތް---
މާބައިދޫގައި އިމާރާތްކޮށްފައިވާ މިސްކިތުގެ ކޮންޓްރެކް އަގަކީ 6.9 މިލިއަން ރުފިޔާއެވެ. އެ މިސްކިތް އިމާރާތްކޮށްފައި ވަނީ، ހަމްދު މޯލްޑިވްސް ޕްރައިވެޓް ލިމިޓެޑުންނެވެ.