މާލޭ ސިޓީގެ މެދު ހެންވޭރު ދާއިރާގެ ކައުންސިލަރު ޒައިދުލް އަމީންގެ މައްޗަށް އުފުލާފައިވާ ތިން ދައުވާ ސާބިތުކުރަން ދެ ސިއްރު ހެއްކަކު ދައުލަތުން ހުށަހަޅައިފިއެވެ.
ރޭ ކްރިމިނަލް ކޯޓުގައި ބޭއްވި ސިއްރު އަޑުއެހުމުގައި ދެ ސިއްރު ހެކިން ދައުލަތުން ހުށަހެޅީ ދައުވާތަކަށް ޒައިދު އިންކާރު ކުރައްވާފައިނިކޮށެވެ.
އޭނާގެ މައްޗަށް އުފުލާފައި ވަނީ، ހުއްދަ ނޫން ގޮތުގައި މައުލޫމާތު ހާމަ ކުރަން އުޅުމުގެ ދައުވާ އާއި ހުއްދަ ނޫން ގޮތުގައި މައުލޫމާތު ހޯދުމުގެ ދައުވާ އާއި ގާނޫނީ ބާރު ހިންގުމަށް ދަތިކުރަން އުޅުމުގެ ދައުވާ އެވެ.
އޭނާގެ މައްޗަށް ދައުވާ ކުރަނީ ފަނޑިޔާރެއް ދެއްކެވި ވާހަކަތަކެއް ސިއްރުން އަޑުއަހައި، ރިކޯޑުކޮށް އޭގެން ވީޑިއޯ ހަދައި ވިއްކަން އުޅުނު ކަމުގެ ތުހުމަތަށްކަމަށް ދައުލަތުން ވަނީ ޝަރީއަތުގައި ބުނެފަ އެވެ.
ޒައިދުގެ މައްޗަށް ހުއްދަ ނޫން ގޮތުގައި މައުލޫމާތު ހާމަ ކުރަން އުޅުމުގެ ދައުވާ އުފުލާފައި ވަނީ ގާނޫނުލް އުގޫބާތުގެ 232 ވަނަ މާއްދާގެ ދަށުންނެވެ. އަދި ހުއްދަ ނޫން ގޮތުގައި މައުލޫމާތު ހޯދުމުގެ ދައުވާ އުފުލާފައި ވަނީ 233 ވަނަ މާއްދާގެ ދަށުންނެވެ. އަދި ގާނޫނީ ބާރު ހިންގުމަށް ދަތިކުރުމުގެ ދައުވާ އުފުލާފައި ވަނީ ގާނޫނުލް އުގޫބާތުގެ 533 ވަނަަ މާއްދާގެ ދަށުންނެވެ.
އެ ތިން ދައުވާ ޒައިދުގެ މައްޗަށް ސާބިތު ވެއްޖެ ނަމަ ދެވޭނެ އެންމެ ބޮޑު އަދަބަކީ ތިން އަހަރަށް ޖަލަށް ލުމެވެ. އަދި އަދަބު ކަނޑައެޅުމުގެ އަސާސީ މިންގަނޑަށް ބަލާއިރު ކޮންމެ ދައުވާއެއް ސާބިތުވިޔަސް ހަތަރު މަހާ 24 ދުވަހަށް ޖަލަށް ލެވޭނެ އެވެ.