މޯލްޑިވްސް އޮލިމްޕިކް ކޮމިޓީގެ އިންތިހާބުގައި އެ ކޮމިޓީގެ ރައީސް ކަމުގެ މަގާމަށް ކުރިމަތިލައްވަން ނިންމަވާފައިވާ އޮލިމްޕިކް ކޮމިޓީގެ މިހާރުގެެ ރައީސް މުހައްމަދު ޝަވީދު އެ ކޮމިޓީގެ ރައީސް ކަމުގެ މަގާމަށް ގެނައުމަށް މޯލްޑިވްސް ފުޓްބޯޅަ އެސޯސިއޭޝަނުން އޭނާގެ ނަން ހުށަހަޅައިފި އެވެ.
އެފްއޭއެމްގެ ކުރީގެ ނޮމިލައިޒޭޝަން ކޮމިޓީގެ ޗެއާމަންކަން ވެސް އޮލިމްޕިކް ކޮމިޓީގެ ރައީސްގެ ހައިސިއްޔަތުން ކުރައްވާފައިވާ މުހައްމަދު ޝަވީދުގެ ނަން އޮލިމްޕިކް ކޮމިޓީގެ ރައީސް ކަމަށް ނޮމިނޭޓް ކުރި ކަން ހާމަކޮށްފައި ވަނީ މިއަދު އެ އިދާރާގެ ފޭސްބުކް ޕޭޖްގައިކޮށްފައިވާ ޕޯސްޓެއްގައެެވެ.
ރާއްޖޭގެ އެންމެ ބޮޑު ކުޅިވަރު ފުޓްބޯޅައާ ބެހޭ މައި އިދާރާއިން ޝަވީދުގެ ނަން ނޮމިނޭޓް ކުރިއިރު އެ މަގާމަށް އިތުރު ދައުރަކަށް ކުރިމަތިލުމަށް ނިންމާފައިވާކަން ހާމަ ކުރައްވަމުން ޝަވީދު ވިދަޅުވީ އޭނާގެ ދައުރުގައި ރަނގަޅަށް ހިނގާފައިވާ ކަންތައްތަކަށް ރިއާޔަތްކޮށް އަންނަ މަހުގެ ފަސްވަނަ ދުވަހު ބާއްވާ އިންތިހާބުގައި ހުރިހާ މެމްބަރުންވެސް ވޯޓު ދެއްވުމަށް އެދި ވަޑައިގަންނަވާ ކަމަށެވެ. އަދި އެ ކޮމިޓީން ކުރަމުންދާ މަސައްކަތުގެ އަގު ވަޒަންނުރާ ބަޔަކު ވެސް އުޅޭ ކަމަށާއި އަދި އެ އިދާރާއާ ގުޅޭ ގޮތުން ހަގީގަތާ ހިލާފު ވާހަކަތައް ދައްކާ ބަޔަކު ވެސް އުޅޭ ކަމަށް އޭނާ ވިދާޅުވިއެވެ.
އޭނާ އިތުރަށް ވިދާޅުވީ، އިންތިހާބާ ދިމާކޮށް އެކިއެކި ކުޅިވަރު އެސޯސިއޭޝަންތަކުގައި ހުރި ގޯސް ކަންތައްތަކުގެ ވާހަކަ ދެއްކުމަކީ މި ދަނޑިވަޅުގައި ދެއްކުން ރަނގަޅު ވާހަކަތަކަަކަށް ނުވެދާނެ ކަމަށާއި ނަމަވެސް ކަންކަން ރަނގަޅު ކުރުމަށް ދައްކަން ޖެހޭ ވާހަކަތައް އަބަދުވެސް ދައްކާނެ ކަމަށާއި ނަންގަވަން ޖެހޭ ޒިންމާ އަބަދުވެސް ނަންގަވާނެ ކަމަށެވެ.
ޝަވީދުގެ އިތުރުން އެއްވެސް ބޭފުޅަކު އޮލިމްޕިކް ކޮމިޓީގެ ރައީސް ކަމުގެ މަގާމަށް ކުރިމަތިލުމަށް ޝައުގުވެރިކަން ފާޅުކޮށްފައެއް އަދި ނުވެއެވެ.