ޔޫރަޕުގެ އެންމެ ޝަރަފްވެރި ކްލަބު ފުޓްބޯޅަ މުބާރާތްކަމަށްވާ ޗެމްޕިއަންސް ލީގުގައި 100 ލަނޑު ހަމަކުރި ފުރަތަމަ ކުޅުންތެރިޔާގެ ޝަރަފާއެކު ރެއާލް މެޑްރިޑްގެ ޕޯޗްގަލް ތަރި ކްރިސްޓީއާނޯ ރޮނާޑޯ ފުޓްބޯޅައިގެ ރެކޯޑެއް އަނެއްކާވެސް ހަދައިފިއެވެ.
ރޮނާލްޑޯ ވަނީ މިދިޔަ ހަފްތާގައި ޗެމްޕިއަންސް ލީގުގައި ބަޔާން މިއުނިކާ ދެކޮޅަށް ރެއާލް ކުޅުނު ޗެމްޕިއަންސް ލީގު ކުއާޓަރ ފައިނަލްގެ ފުރަތަމަ ލެގުގެ މެޗުގައި ދެ ލަނޑު ކާމިޔާބުކޮށް ޔޫރަޕްގެ ކްލަބު ފުޓްބޯޅަ މުބާރާތްތަކުގައި ފުރަތަމަ ފަހަރަށް 100 ލަނޑު ހަމަކުރި ކުޅުންތެރިޔާގެ ރެކޯޑްވެސް ހަދައިފައެވެ.
ރޮނާލްޑޯ ޗެމްޕިއަންސް ލީގުގައި 100 ލަނޑު ހަމަކުރީ ރޭ ބަޔާން މިއުނިކާ ދެކޮޅަށް ކުޅުނު މެޗުގައި އޭނާ ކާމިޔާބުކުރި ތިންް ލަނޑާއެކުއެވެ.
ރޮނާލްޑޯ ޗެމްޕިއަންސް ލީގުގައި އެންމެ ފުރަތަމަ ލަނޑެއް ކާމިޔަބުކުރީ 2007 ވަނަ އަހަރުގެ މުބާރަތުގައި ރޯމާ ކޮޅަށެވެ. އޭގެ ފަހުން 137 މެޗު ރޮނާލްޑޯ ޗެމްޕިއަންސް ލީގުގައި ކުޅެފައިވާއިރު އޭނާ ޖެހިި 100 ގޯލްގެ ތެރެއިން 9 ގޯލް އޭނާ ޖަހާފައިވަނީ ރޭ ރެއާލްއަތުން ބަލިވި ބަޔާން މިއުނިކް ކޮޅަށެވެ.
އަލަށް ކާމިޔާބުކުރެވުނު ރެކޯޑާ ބެހޭގޮތުން ސްޕެއިންގެ މީޑިޔާއަށް ވާހަކަދައްކަމުން ރޮނާލްޑޯ ބުނީ އޭނާ ބައެއް މެޗުތަކުގައި މަސައްކަތް ނުކުރާކަމަށް ބައެއް ސަޕޯޓަރުންނަށް ހީވިއަސް އޭނާ ކޮންމެ މެޗެއްގައިވެސް ރެއާލް މޮޅުކުރުމަށް ގިނަ މަސައްކަތްތަކެއް ކުރާކަމަށާއި ކޮންމެ މެޗެއްގައިވެސް އޭނާގެ އެންމެ ރަނގަޅު ކުޅުން ދައްކާ ކަމަށެވެ.
" އަހަރެން އަބަދުވެސް އަހަރެންގެ އެންމެ ބެސްޓް ދެން. ނަމަވެސް ބައެއް ފަހަރު ސަޕޯޓަރުން ބޭނުންވާ ގޮތަށް ނުވެދާނެ. ނަމަވެސް ހަގީގަތަކީ ރެއާލް މޮޅުކޮށްދޭން އަހަރެން މަސައްކަތް ކުރަން އަބަދުވެސް،" ރޮނާލްޑޯ ބުންޏެވެ.
ބަޔާން ކޮޅަށް ރޮނާލްޑޯ ރޭ ކާމިޔަބު ކުރި ތިން ލަނޑާއެކު ޔޫރަޕްގެ މުބާރާތްތަކުގައި އޭނާ ކާމިޔާބުކުރި ގޯލްގެ އަދަދުވަނީ 103 އަށް އަރައިފައެވެ.
ޗެމްޕިއަންސް ލީގުގައި ރޮނާލްޑޯ 100 ގޯލް ހަމަކުރިއިރު އޭނާގެ އެންމެ ވާދަވެރި ކުޅުންތެރިއާ ބާސެލޯނާގެ ލަޔޮނަލް މެސީ ވަނީ އެ ލީގުގައި 94 ގޯލް ކާމިޔާބުކޮށްފައެވެ.