ބަންގާޅުގައި މިދިޔަ މަހުގެ ފަހުކޮޅު މަރުވި ދިވެހި ދަރިވަރު ރައުދާ އާތިފްގެ ހަށިގަނޑު ކަށްވަޅުން ނަގައި، އަލުން އޮޓޮޕްސީއެއް އަލުން ހެދުމަށް ބަންގްލަދޭޝްގެ ރާޖްޝަހީ މެޓްރޮޕޮލިޓަން މެޖިސްޓްރޭޓު ކޯޓުން މިއަދު އަމުރުކޮށްފިއެވެ.
އެ ކޯޓުގެ ފަނޑިޔާރު މެހެބޫބުއްރަހުމާން މިއަދު އެ އަމުރު ކުރެއްވީ، އެފަދަ އަމުރެއް ނެރެދެއްވުމަށް ރާޖްޝާހީ ފުލުހުންގެ ސީއައިޑީއިން އިއްޔެ އެދިފައި ވަނިކޮށެވެ.
ބަންގާޅުގެ ދަ ޑެއިލީސްޓާ ނޫހުން ބުނެފައިވާ ގޮތުން، ސީއައިޑީގެ އިންސްޕެކްޓަރ އަސްމާއުލް ހައްޤު އިއްޔެ އެފަދަ އަމުރަކަށް އެދިފައިވަނީ، ރައުދާގެ ހަށިގަނޑުގެ އޮޓޮޕްސީއެއް އަލުން ހެދުމަށެވެ.
ކޯޓުން މިއަދު ނެރެފައިވާ އަމުރުގައި ރައުދާގެ ގަބުރު ނެގުމަށް އަމުރުކޮށްފައިވާ އިރު، އެކަން ކުރަން ޖެހޭނީ އިތުރު ފަނޑިޔާރެއްގެ ވެސް ހާޒިރުގައި ކަމަށް އަމުރުގައި ބުނެފައިވެއެވެ.
ރާޖްޝާހީ ސީއައިޑީގެ ސުޕަރިންޓެންޑެންޓް ނަޒްމުލް ކަރީމް ޚާން ވިދާޅުވީ، ރައުދާގެ ހަށިގަނޑުގެ ދެވަނަ އޮޓޮޕްސީއެއް ހެދުމަކީ މުހިންމު ކަމެއް ކަމަށެވެ. ސަބަބަކީ، ކުރީގެ އޮޓޮޕްސީއިން ރައުދާ އަމިއްލައަށް މަރުވީކަން ހާމަވެފައިވާ އިރު، ރައުދާގެ ބައްޕަ އެކަން ގަބޫލުނުކޮށް، ބަޔަކު ރައުދާ މަރައިލީ ކަމަށް ބުނަމުންދާތީ ކަމަށް ސުޕްރިންޓެންޑެންޓް ނަޒްމުލް ކަރީމް ވިދާޅުވިއެވެ.
"މި ތަހުގީގުގައި އެއްވެސް އުނިކަމެއް އޮތުމަށް ބޭނުމެއް ނޫން. ރައުދާގެ ހަށިގަނޑަކީ މި މައްސަލައިގެ އެންމެ މުހިންމު ހެކި،" ނަޒްމުލް ކަރީމް ޚާން ވިދާޅުވިއެވެ.
ރައުދާގެ ހަށިގަނޑު ވަޅުލީ އޭޕްރިލް އެއްވަނަ ދުވަހު، ރާޖްޝާހީގެ ހަތިމް ޚާން ޤަބުރުސްތާނުގައެވެ. އޭނާގެ ހަށިގަނޑު ވަޅުލި އިރު، އޮޓޮޕްސީއެއް ވަނީ ހަދައިފައެވެ. އާއިލާއިން އިތުރު އޮޓޮޕްސީއެއް ހަދަން އޭރު ބޭނުންވި ނަމަވެސް، އިތުރު އޮޓޮޕްސީއެއް ހެދޭނެ ސަރަހައްދަކަށް ހަށިގަނޑު ގެންދިއުމަކީ ކުރަން އުނދަގޫ ކަމަކަށް ވުމުން ހަށިގަނޑު ވަޅުލީއެވެ.
ރައުދާގެ އާއިލާގެ ފަރާތުން ބައްޕަ ޑރ. މުހައްމަދު އާތިފް، ރާޖްޝާހީ މެޖިސްޓްރޭޓު ކޯޓަށް އޭޕްރިލް 10 ވަނަ ދުވަހު ވަނީ ރައުދާ މަރައިލީ ކަމަށާއި އެ މައްސަލަ ރަނގަޅަށް ތަހުގީގުކޮށްދިނުމަށް އެދި މައްސަލައެއް ވައްދައިފައެވެ. އެ މައްސަލަ ކޯޓުން ބަލައިގަނެ، ރަނގަޅަށް ތަހުގީގުކުރުމަށް ކޯޓުން އަމުރުކުރި އިރު، އެ މައްސަލަ ބެލުމަށް މިހާރު ހަވާލުކޮށްފައިވަނީ ބަންގާޅުގެ ސީއައިޑީއާއެވެ.