ކްލަބު މޯލްޑިވްސް ކަޕުގައި އެމްއާރުޑީސީން ފުރަަތަމަ މިނިޓްގައި ޖަހަން ފެށި ލަނޑުތަކާ އެކު އެމްއެންޔޫ ސްޓާފް ކުލަބު ކޮޅަށް 22 ލަނޑުޖަހައި އެޓީމުގެ ފެންވަރު ދައްކާލައިފިއެވެ.
މިއަދު ހަވީރު މާފަންނު ވެލި ދަނޑުގައި ކުޅުނު މެޗުގައި އެމްއާރްޑީސީން އެމްއެންޔޫ ކޮޅަށް 22 ލަނޑު ޖެހިއިރު އެމްއެންޔޫ ސްޓާފް ކުލަބަށް ޖެހުނީ 2 ލަނޑެވެ.
އެމްއާރުޑީސީގެ ފުރަތަމަ ލަނޑު އެޓީމަށް މެޗުގެ ފުރަތަމަ މިނިޓްގައި ކާމިޔާބުކޮށްދިނީ މެޗުގައި ހަތަރު ލަނޑު ޖެހި މުހައްމަދު ލިޔާހްއެވެ. މިއަދުގެ މެޗުގައި އެންމެ ގިނަ ގޯލްޖެހީ ވިކްޓަރީ ސްޕޯޓްސް ކުލަބުގެ ކެޕްޓަން އިސްމާއިލް އީސަ (މެސީ)އެވެ. އޭނާ ވަނީ މިއަދުގެ މެޗުގައި އަށް ލަނޑު ޖަހައިފައެވެ. އަދި މި މެޗުގެ މޮޅު ކުޅުންތެރިއަކީވެސް މެސީއެވެ.
އެމްއާރުޑީސީގެ އިތުރު ގޯލްތަކުގެ ތެރެއިން ދެ ގޯލް މުޙައްމަދު ފުހައިދު ޖެހިއިރު ޓީސީގެ ކެޕްޓަން އަލީ ނާފިއު، އިސްމާއީލް މުނީޒު، ހުސެން އަލީ، އަހުމަދު ރައްޔާނު އަދި އިހުސާން ސައީދު، މިއިން ކޮންމެ ކުޅުންތެރިއަކު ވަނީ އެ ޓީމަށް އެއް ގޯލް ކާމިޔަބުކޮށްދީފައެވެ. މީގެ އިތުރުން ވިކްޓަރީގެ ހަސަން އަދުހަމް ލަނޑެއް ކާމިޔާބުކުރިއިރު އެމްއެންޔޫ ސުޓާފް ކުލަބުގެ ކުޅުންތެރިއަކު އަތުން ބައިކޮޅަށް ވެސް ވަނީ ގޯލެއް ވަދެފައެވެ.
އެމްއެންޔޫ ސުޓާފް ކުލަބަށް ސުން ކަނޑުވާލަ ދިނީ މަސްއޫދު ޝަބީން އަދި މުހައްމަދު ޝިފާޒެވެ.
އެމްއާރުޑީސީން ކުޅުނު ދެ މެޗުންވެސް މޮޅުވެ އެޓީމު އޮތީ ގުރޫޕްގެ އެއްވަނައިގައެވެ. ތަފާތު ބޮޑު ނަތީޖާއަކުން ބަލިވި ނަމަވެސް އެމްއެންޔޫ ސުޓާފް ކުލަބު އޮތީ ގުރޫޕްގެ ތިން ވަނަ މަގާމުގައެވެ.