ސޯޝަލް މީޑީއާ އެކްޓިވިސްޓެއް ކަމަށްވާ، ތޮއްޔިބު ޝަހީމް ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލް މިއަދު 'ސަން' އަށް ވިދާޅުވީ، ބަލަމުންދާ މައްސަލައަކާ ގުޅިގެން ކޯޓު އަމުރެއްގެ ދަށުން ރޭ ގާތްގަނޑަކަށް 12:00 ހާއިރު ތޮއްޔިބު ހައްޔަރުކޮށްފައިވާ ކަމަށެވެ.
ރޭ ތޮއްޔިބު ހައްޔަރުކޮށްފައިވާއިރު، ރޭގެ ވަގުތެއްގައި އޭނާ ވަނީ މަރުކަޒީ ބޭންކް އެމްއެމްއޭގެ ދެމީހެއްގެ ބެލުމުގެ ދަށުން އާރަށުގެ ވީވީއައިޕީ ބަންގަލޯއަށް ސައުދީ ހެލިކޮޕްޓަރުން 12 ކަޅުފޮށި އަދި އެއް ސިލްވާ ފޮށި ވެއްދިކަމަށް ބުނެ ޓްވީޓުކޮށްފަ އެވެ.
ރާއްޖެއަށް ވަޑައިގަންނަވާ ބޭރުގެ އިއްޒަތްތެރިންގެ ކަރާމާތަށް އުނިކަން ލިބޭފަދަ ކަންތައްތަކެއް ރާވައި ހިންގުމަށް ފުރުސަތު ނުދޭނެ ކަމަށް ބުނެ ފުލުހުން މިމަހުގެ ފުރަތަމަ ދުވަހު ވަނީ ބަޔާނެއް ނެރެފަ އެވެ.
ކޯޓު އަމުރެއްގެ ދަށުން ތައްޔިބު ހައްޔަރުކޮށްފައިވާއިރު، އިއްޔެ ވަނީ ސައުދީ ރަސްގެފާނު ރާއްޖެއަށް ކުރައްވާ ދަތުރުފުޅަށް ހުރަސްއަޅަން އުޅޭ ކަމުގެ ތުހުމަތުގައި އެމްޑީޕީ ހަރުގެ ބަލައި ފާސްކޮށް ފޮތި ފޭލިތަކެއް ގެންގޮސްފަ އެވެ.
އޭގެ އިތުރުން ފ. އަތޮޅުގައި ހިންގަން އުޅޭ ކަމަށް ބުނާ މަޝްރޫއާ ދެކޮޅު ހަރަކާތަށް ތަކެތި ތައްޔާރުކޮށްދޭ ކަމުގެ ތުހުމަތުގައި ކުރީގެ ފިލްމީތަރި މުހައްމަދު ޝާވިން އިއްޔެ ވަނީ ފުލުސް އޮފީހަށް ހާޒިރުކޮށް ސުވާލުކޮށްފަ އެވެ.