ހަމައެކަނި މަސައްކަތް ކުރިއަސް ބޮޑެތިކަންކަން ހާސިލް ނުވާނެ ކަމަށާއި، ކަންކަން ހާސިލްކުރެވޭނީ ހުވަފެންވެސް ދެކި، އަދި ލިބިފައިވާ ފުރުޞަތުގެ ބޭނުން ރަނގަޅަށް ހިފައިގެން ކަމަށް ރާއްޖޭގެ ކުރީގެ އެއް ނަންބަރު ގޯލްކީޕަރު އަދި ނިއުރޭޑިއަންޓް ސްޕޯޓްސް ކްލަބުގެ ކެޕްޓަން އިމްރާން މުހައްމަދު ބުނެފިއެވެ.
އިމްރާން މިހެން ބުނީ، ގައުމީ ޓީމުގައިވެސް އިމްރާނާ އެއްކޮށް މަސަކަތްކޮށްފައިވާ ކީޕަރު މުހައްމަދު އިމްރާނާއި ވެލެންސިއާގެ ކީޕަރު މުހައްމަދު ފައިސަލްއާ އެކު ނަގާފައިވާ ފޮޓޯއަކާއެކު ފޭސްބުކްގައި ކޮށްފައިވާ ޕޯސްޓެއްގައެވެ.
" ބޮޑުކަމެއް ހާސިލްކުރެވޭނީ ހަމައެކަނި އެކަމައި އުޅެގެންނެއް ނޫން، ހުވަފެންވެސް ދެކެންވާނެ، އެކަމެއް ކުރަން ހަަމައެކަނި ޕްލޭން ކުރިއަކަސް ނުވާނެ، ތިމާއަށް އެކަން ކުރެވޭނެ ކަން ގަބޫލުކުރަންވެސް ވާނެ،" ރާއްޖޭގެ ފުރަތަމަ ޑިވިޝަނުގައި މިވަގުތު ތިބި ބައެއް ކީޕަރުންނާއި ޖުމުލަގޮތެއްގައި އަރަމުން އަންނަ ހުރިހާ ކީޕަރުންނަށް ނިސްބަތްކޮށް އިމްރާން ބުނެފައި ވެއެވެ.
އިމްރާން ރޭ ކުރި ޕޯސްޓްގައި އިތުރަށް ބުނެފައިވަނީި، މޮޅު ކީޕަރަކަށް ވާން ބޭނުން ނަމަ، ލިބިފައިވާ ފުރުޞަތުގެ ބޭނުން އެންމެ ރަނގަޅުގޮތުގައި ހިފާން ޖެހޭ ކަމަށެވެ. އަދި އެގޮތުގައި ކުރިއަށްދާން ތިބި ކީޕަރުންނަށް އެހީތެރިވުމަށް އަބަދުވެސް ތައްޔާރަށް ހުންނާނޭ ކަމަށް ރާއްޖޭގައި އުފެދުނު އެންމެ ހުނަރުވެރި ކީޕަރު ބުންޏެވެ.
ގައުމީ ޓީމަށް 17 އަހަރު ހިދުމަތްކުރުމަށްފަހު މިހާރު ކުޅުން ހުއްޓާލާފައިވާ އިމްރާން އަނބުރާ ގައުމީ ޓީމަށް ކުޅުމަށް ވިސްނުމަށް ގިނަ ބަޔަކު ދަނީ ގޮވައިލަމުންނެވެ. އޭގެތެރޭގައި ގައުމީ ޓީމުގެ ކޯޗު ވެސް ހިމެނެއެވެ.
ނަމަވެސް އިމްރާން ބުނެފައިވަނީ އެ ނިންމުން ބަަދަލު ނުކުރާނެ ކަމަށާއި އެގޮތަށް ނިންމީ ވަރަށް ވިސްނާފައި ކަމަށެވެ.
އިމްރާން ބުނެފައިވަނީ އޭނާ ރިޓަޔާ ކުރަން ވިސްނީ ޒުވާން ކީޕަރުންނަށް ފުރުޞަތު ދިނުމަށްކަމަށެވެ. އިމްރާނަށް ފަހު ގައުމީ ޓީމުގެ ގޯލުން ފެނުން އެންމެ ގާތީ ގައުމީ ޓީމުގެ ބަދަލު ކީޕަރުންކަމުގައިވާ ފައިސަލްއާ ކުޑަ އިމްރާނެވެ.