އެންޓި ކޮރަޕްޝަން ކޮމިޝަން (އޭސީސީ) އިން މިދިޔަ އަހަރު 33 މިލިއަން ރުފިޔާ ޚަރަދުކުރިއިރު، ދައުވާ ކުރަން ފޮނުވީ 14 މައްސަލައެއްކަމަށް އެކޮމިޝަނުން ބުނެފިއެވެ.
އޭސީސީގެ މިދިޔަ އަހަރުގެ އަހަރީ ރިޕޯޓްގައި ބުނެފައިވާގޮތުން އެކޮމިޝަނުން މިދިޔަ އަހަރު ތަހުގީގުކޮށް ނިންމީ 829 މައްސަލައެވެ. އޭގެ ތެރެއިން 14 މައްސަލައެއް ޕްރޮސިކިއުޓާ ޖެނެރަލް އޮފީހަށް ވަނީ ފޮނުވައިފައެވެ.
އެ ރިޕޯޓުގައިވާގޮތުން އެކި އަހަރުތަކުގައި ފޮނުވާފައިހުރި މައްސަލަތަކުގެ ތެރެއިން 70 މައްސަލައެއް ޕީޖީ އޮފީހުން ވަނީ އަނބުރާ އޭސީސީ އަށް ފޮނުވާލައިފައެވެ. އޭގެތެރެއިން 18 މައްސަލަ އަކީ އިތުރަށް ތަހުގީގު ފުރިހަމަ ކުރަން ފޮނުވި މައްސަލައެވެ. އޭގެތެރެއިން 11 މައްސަލައެއްގައި ދައުވާ ކުރެވެން ނެތް ކަމަށް ވަނީ ކަނޑައަޅައިފައެވެ.
މިދިޔަ އަހަރު އޭސީސީއިން ވަނީ މައްސަލަތަކާ ގުޅިގެން 332 ރިކޮމެންޑޭޝަންއެއް ދީފައެވެ.
މަދު މައްސަލަތަކެއް ޕީޖީއަށް ފޮނުވުމާއި ގިނަ މައްސަލަތަކެއް އަނބުރާ ފޮނުވާލި ސަބަބާ ގުޅޭގޮތުން ސަން ދެންނެވި ސުވާލެއްގެ ޖަވާބުގައި އޭސީސީގެ ނައިބު ރައީސް މުއައްވިޒު ރަޝީދު ވިދާޅުވީ އެ ކޮމިޝަންގެެ އަމާޒަކީ ބައެއްގެ މައްޗަށް ދައުވާތަކެއްކުރުން ނޫން ކަމަށާއި އެކޮމިޝަންގެ މަސައްކަތަކީ އެމައްސަލަތައް ތަހުގީގޮށް ކޮރަޕްޝަން އެކުލެވޭނަމަ ފިޔަވަޅު އެޅުން ކަމަށެވެ.
އޭސީސީއަށް މިދިޔަ އަހަރު އެކަނި 855 މައްސަލައެއް ހުށައެޅިފައިވާއިރު 2000 އަށްވުރެ ގިނަ މައްސަލަތައް ނުނިމި އެބަހުއްޓެވެ.
އޭސީސީގެ ރައީސް ހަސަން ލުތުފީ ވިދާޅުވީ މިދިޔަ އަހަރަކީ ގޮންޖެހުންތަކާއެކުވެސް ކާމިޔާބުތަކެއް ހޯދިފައިވާ އަހަރެއް ކަމަށެވެ.
މިއަހަރު ބޮޑެތި މައްސަލަތަކަށް އިސްކަންދީގެން އޭސީސީގެ މަސައްކަތްތައް ކުރިއަށްގެންދާނެ ކަމަށްވެސް ލުތުފީ ވިދާޅުވިއެވެ.