އަންހެނުންނަކީ އިގްތިސާދީ ގޮތުން ފުދުންތެރި، އަދި އެހެން ބައެއްގެ މައްޗަށް ބަރޯސާވާން ނުޖެހޭ ބަޔަކަށް ހަދަންޖެހޭ ކަމަށް ހެލްތު މިނިސްޓްރީގެ ސްޓޭޓް މިނިސްޓަރ ދުންޔާ މައުމޫން ވިދާޅުވެއްޖެއެވެ.
ރައީސުލްޖުމްހޫރިއްޔާގެ އަނބިކަނބަލުން ފާތިމަތު އިބްރާހިމް ދީދީގެ އިސްނެންގެވުމުގެ މަތިން ދަރުބާރުގޭގައި މިހާރު ބާއްވަމުންދާ އަންހެނުންގެ މަސައްކަތްތެރިކަމުގެ މައުރަޒު "ހީވާގި ކަނބަލުން 2017" އަށް ޒިޔާރަތް ކުރެއްވުމަށްފަހު ދުންޔާ ވިދާޅުވީ އެ މައުރަޒަކީ ރައީސުލްޖުމްހޫރިއްޔާ އަބްދުﷲ ޔާމީނާއި އެމަނިކުފާނުގެ އަނބިކަނބަލުން އިސްނަންގަވައިގެން ވަރަށް މުހިންމު ހަރަކާތެއް ކަމަށެވެ.
ދުންޔާ ވިދާޅުވި ގޮތުގައި، އަންހެނުންގެ އިގްތިސާދީ ފުދުންތެރިކަމަކީ މިވަގުތު ރާއްޖޭގައި ހަރުދަނާކުރަން ޖެހިފައިވާ ވަރަށް މުހިންމު އެއް ދާއިރާއެވެ.
ހީވާގި ކަނބަލުން މައުރަޒުގައި ދުންޔާ މައުމޫން -- ސަން ފޮޓޯ/ މުހައްމަދު އަފްރާހު
"މިކަހަލަ ހަރަކާތްތަކާ އެކު އަންހެނުންގެ އިގްތިސާދީ ފުދުންތެރިކަން އިތުރަށް ކުރިއަރައިގެން ދާނެ. އަންހެުންނަކީ އެމީހުންގެ އަމިއްލަ ފައިމައްޗަށް ތެދުވެގެން އަމިއްލަ މުސްތަގުބަލައިގެން ކުރިޔަށް ދެވޭ ބަޔަކަށް ވާނެ. އަދި އެހެން މީހެއްގެ އެހީއަށް ބޭނުންވެފައިވާ ބައެއް ކަމަކަށް ނުވާނެ،" ދުންޔާ ވިދާޅުވިއެވެ.
ދުންޔާ ވިދާޅުވީ ދިވެހި އަންހެނުން އުފައްދާފައިވާ ދިވެހި އުފެއްދުންތަކެއް ރަނގަޅު އަގުގައި ބާޒާރަށް ނެރުމަކީ ވަރަށް މުހިންމު ކަމެކެވެ. އަދި މިއީ އަންހެނުންނަށް ގޭގޭގައި ތިބެގެންވެސް އާމްދަނީ ހޯދުމަށް ރަނގަޅު މަގެއް ކަމަށް ދުންޔާ ވިދާޅުވިއެވެ.
މީގެ އިތުރުން ދުންޔާ ވިދާޅުވީ، މައުރަޒުގައި ދިވެހީންނަށް ވެސް ބޭނުންވެ، ނަމަވެސް ގަންނަން ނުލިބޭ ބައެއް ކަހަލަ ދިވެހި އުފެއްދުންތައް މައުރަޒުގައި ހުރި ކަަމަށެވެ.
ހީވާގި ކަނބަލުން މައުރަޒުގައި ދުންޔާ މައުމޫން -- ސަން ފޮޓޯ/ މުހައްމަދު އަފްރާހު
"ސަގާފީ އެކި ކަހަލަ ޑިޒައިންތައް ބޭނުންކޮށް، ކަސަބު ލިބާސް ޑިޒައިންގައި ވެސް އެބަހުރި ދަބަސްތައް ހަދާފައި. މީގެ ޑިޒައިންތައް ބޭނުންކޮށްގެން ރިށޯޓުތަކަށް ރީޗު ކުރުންވެސް މުހިންމު،" ދުންޔާ ވިދާޅުވިއެވެ.
މިދިޔަ ބުރާސްފަތި ދުވަހުގެ ރޭ ދަރުބާރުގޭގައި ފެށި "ހީވާގި ކަނބަލުން" މައުރަޒު މާދަމާ ރޭގެ ނިޔަލަށް ކުރިޔަށް ދާނެއެވެ.