މިއުޒިކީ އާއިލާއަކަށް އުފަންވި ކުޅަދާނަ ލަވަކިޔުންތެރިޔާ އިބްރާހިމް ރަޝީދު (ހާބުރި)އަކީ މިއަދު ރިޝްވާން އައިމަން (ރިއްޓެ)ގެ ކާމިޔާބީގެ އަސްލެވެ. ބައްޕަގެ ހިތްވަރާއެކު ގާތްގަނޑަކަށް އުމުރުން 11 އަހަރުގައި ބޮޑުބެރު ޖެހުމުގެ ތެރެއިން ރިސޯޓް މިއުޒިކްގެ ތެރެއަށް ނުކުތް ރިއްޓެއަކީ މިއަދު ރިސޯޓްތަކުގައި ހުށަހަޅައިދޭ އާޓިސްޓުންގެ ތެރެއިން ކާމިޔާބު އެއް ނަމެވެ.
ޒުވާނުންނަށް ނަމޫނާ ދައްކަމުންދާ ސޯލޯ އާޓިސްޓް ރިއްޓެއަކީ ރާއްޖޭގެ މަޝްހޫރު ރިސޯޓްތަކަށް އާ މޫނެއް ނޫނެވެ. ރާއްޖޭގައި މިހާތަނަށް ބޭއްވި ބޮޑެތި ޝޯތަކުގެ އިތުރުން ރާއްޖޭން ބޭރުގައި ރިއްޓެ ވަނީ އޭނާގެ ކުޅަދާނަކަން ދައްކާފައެވެ. އަވަށްޓެރި ސްރީލަންކާ، މެލޭޝިއާގެ އިތުރުން އިނގިރޭސި ވިލާތުގައި ހުށަހަޅައިދީ ގިނަ ބައެއްގެ ހިތް އަތުލާފައެވެ.
ސިންގަޕޫރުގެ ސަންޓެކް ކޮންވެންޝަން ސެންޓަރުގައި މިދިޔަ ހުކުރު ދުވަހު ފެށި ޑައިވިން އެންޑް ރިސޯޓް ޓްރެވަލް އެކްސްޕޯ (ޑީއާރުޓީ ޝޯ)ގެ ތެރޭގައި ހައިރައިޒުން އިންތިޒާމްކޮށްގެން ކުރިއަށް ގެންދާ ސައުންޑްސް އޮފް މޯލްޑިވްސްއަށް އިތުރު ފުރިހަމަކަމެއް މިފަހަރު ގެނެސްދިން އެއް އާޓިސްޓަކީ ވެސް ރިއްޓެއެވެ.
ސައުންޑްސް އޮފް މޯލްޑިވްސްގެ އިއްޔެގެ ޝޯވގައި ރިއްޓެ ޕާފޯމްކުރަނީ --- ފޮޓޯ/ ހަބޭސް އޮފިޝަލް ފޮޓޯގުރާފަރު: ޝައްމޫން
ސިންގަޕޫރުގައި ހުރެ ސަން އަށް ދިން އިންޓަވިއުއެއްގައި މީގެ ކުރިން ބޭއްވި ސައުންޑްސް އޮފް މޯލްޑިވްސް ކޮލަމްބޯ އާއި މެލޭޝިއާގައި އިވެންޓުގައި ވެސް ޕާފޯމް ކޮށްފައިވާ ރިއްޓެ ބުނީ، ސައުންޑްސް އޮފް މޯލްޑިވްސް ޕުލެޓްފޯމަކީ ދިވެހި އާޓިސްޓުންނަށް ލިބޭ ވަރަށް މުހިއްމު ބޮޑު ތަޖުރިބާއެއް ކަމަށެވެ. އަދި ހައިރައިޒްފަދަ ޒުވާން ހީވާގި ޓީމަކާއެކު މަސައްކަތްކުރުމަކީ ލިބޭ އުފަލެއް ކަމަށް އޭނާ ބުންޏެވެ.
މިއަހަރު ސިންގަޕޫރުގައި ކުރިއަށްދާ ސައުންޑްސް އޮފް މޯލްޑިވްސްގެ ޝޯއާ ދޭތެރޭ ވެސް ރިއްޓެ ހުރީ ހިތްހަމަޖެހި އުފަލުންނެވެ.
"މިއަދު އެތަނަށް ބަލަން އައި ބޭރު ބްރޭންޑެއްގެ މީހެއް. އެ މީހުންގެ ރާއްޖޭގެ ޕްރޮޑަކްޓް އެއްގަ ޕާފޯމް ކުރެވިދާނެތޯ އެހި. އަދި ސިންގަޕޫރުގައި ދިރިއުޅޭ ބައެއް ދިވެހިންވެސް އައިސް ތިބި. ކުޑަކޮށް ވިޔަސް ބޮޑުކޮށް ވިޔަސް ދިވެހިން ދިވެހިންނަށް ސަޕޯޓް ކުރަން އައިމަ އުފާވޭ. ސަޕޯޓް ވަރަށް ބޮޑު. ހިތްހަމަޖެހޭހާ ބޮޑު،" ރިއްޓެ ބުންޏެވެ.
ދިވެހިންގެ ފަރާތުން ޝޯއަށް ލިބުނު ތަރުހީބާއެކު މިއަހަރުގެ ޝޯވއަކީ ރިއްޓެއަށް އެތައް ގޮތަކުން އުފާވެރި ދަތުރެކެވެ. މިއަހަރުގެ ސައުންޑްސް އޮފް މޯލްޑިވްސްގެ ޝޯގައި އޭނާ ދެއްކި ހުނަރުވެރިކަމުގެ ސަބަބުން ބައިނަލްއަގްވާމީ ހުށަހެޅުންތަކެއް ވެސް އޭނާއަށް ވަނީ އައިސްފައެވެ.
ސައުންޑްސް އޮފް މޯލްޑިވްސްގެ އިއްޔެގެ ޝޯވގައި ހަބޭސް ބޮޑުބެރު ގްރޫޕް ހުށަހަޅައިދެނީ --- ފޮޓޯ/ ހަބޭސް އޮފިޝަލް ފޮޓޯގުރާފަރު: ޝައްމޫން
"އިތުރު ޗޭންސް ތަކެއް އެހެން ގައުމުތަކުގަ ކުޅެންވެސް ލިބިއްޖެ. އިންޝާﷲ. ވަރަށް އުފާވޭ. ދެތިން ގައުމެއްގައި އިންޝާﷲ ޕާފޯމް ކުރުމަށް ދަނީ މަޝްވަރާ ކުރަމުން. އެންމެން ވެސް ދަނީ ރިއްޓެގެ ހުށަހެޅުންތަކުގެ ވާހަކަ ދައްކަމުން. ވަރަށް އުފާވޭ،" ސައުންޑްސް އޮފް މޯލްޑިވްސްގެ މިއަހަރުގެ ތަޖުރިބާ ކަމުދާ ކަމަށް ބުނަމުން ރިއްޓެ ބުންޏެވެ.
ރާއްޖޭގެ ތަޖުރިބާކާރު އިވެންޓްސް މެނޭޖްމަންޓް ކުންފުނި، ހައިރައިޒުން 2011 ވަނަ އަހަރުން ފެށިގެން ބާއްވަމުން އަންނަ ސައުންޑްސް އޮފް މޯލްޑިވްސްގެ މިއަހަރުގެ ޝޯގައި ރިއްޓެގެ އިތުރުން ގްރެވިޓީ ބައި ހަބޭސް އާއި މަޝްހޫރު ބޮޑުބެރު ގްރޫޕް، ހަބޭސް ބޮޑުބެރު ގުރޫޕުގެ އިތުރުން ޑީޖޭ އައްޔަ ބައިވެރިވެއެވެ.