ލެސްޓާ ސިޓީ މިވަގުތު ވެއްޓިފައިވާ އަނދަވަޅުން ސަލާމަތްކޮށްދިނުމަށް ޓީމުގައި ހިމެނޭ ކޮންމެ ކުޅުންތެރިޔަކުވެސް ފަހުވަގުތާ ޖެހެންދެންވެސް ހަނގުރާމަ ކުރުމަށް އެޓީމުގެ ކޯޗު ކަލައުޑިއޯ ރަނިއޭރީ ގޮވާލައިފިއެވެ.
އެފްއޭ ކަޕްގެ ފަސްވަނަ ބުރުގައި މިލް ވޯލް އަތުން 1-0 ބަލިވެ، ލެސްޓާ ވަނީ އެ މުބާރާތުން އަލްވަދާއު ކިޔައިފައެވެ.
މިލްވޯލްއާ ދެކޮޅަށް ކުޅުނު މެޗަށްފަހު ނޫސްވެރިންނާ ވަހަދައްކަމުން ރަނިއޭރީ ބުނީ އެއް ކުޅުންތެރިޔަކު މަދުކޮށް ކުޅުނު މިލްވޯލްގެ ކުޅުންތެރިން ދެއްކިފަދަ ހިތްވަރެއް، މިސީޒަނުގައި ޕްރިމިއާ ލީގުން ރެލިގޭޓްނުވެ އޮތުމަށްޓަކައި ލެސްޓާގެ ކުޅުންތެރިން ދައްކަންޖެހޭ ކަމަށެވެ.
ޕްރިމިއާ ލީގުން ރެލިގޭޓްވެދާނެ ކަމުގެ ބިރާ ކުރިމަތިލަމުންދާ ލެސްޓާގެ ކޯޗު ރަނިއޭރީ ބުނީ، ކޮންމެ ކުޅުންތެރިޔަކުވެސް ޓީމުގެ ހައްގުގައި ހަނގުރާމަ ކުރަންޖެހޭ ކަމަށާއި ފަހުވަގުތާ ހަމައަށްވެސް ހިތްވަރު ކުރަންޖެހޭ ކަމަށެވެ.
"އަހަރެން ބޭނުން ކުޅުންތެރިންނާ އަދި އެއްފަހަރު ވަހަކަދައްކަން. ކުޅުންތެރިންނަށް ވިސްނައިދޭން ބޭނުން ކޮންމެ މެޗެއްގައިވެސް އެންމެ ފަހުވަގުތާ ޖެހެންދެން ހިތްވަރުކޮށް ހަނގުރާމަކުރަން،" ރަނިއޭރީ ބުންޏެވެ.
މިދިޔަ އަހަރު ގިނަ ބަޔަކު ސިއްސުވާލުމަށްފަހު ޕްރިމިއާ ލީގުގެ ޗެމްޕިއަންކަން ހޯދި މޭސްތިރިޔާ ރަނިއޭރީ ބުނީ، މިދިޔަ ސީޒަނުގައިވެސް އޭނާގެ ޓީމު ކުޅުނީ މިސީޒަނުގައި ވެސް ކުޅޭ ކުޅުން ކަމަށާއި މިދިޔަ ސީޒަނުގެެ ޓީމުގައި ތިބީ ހަމަ މިހާރުވެސް ތިބި ކުޅުންތެރިން ކަމަށެވެ. ނަމަވެސް ޓީމުގެ ނަތީޖާ ދަށްވަމުންދާ ދިޔުމާމެދު އަޖައިބުވާކަމަށް ވެސް ރަނިއޭރީ ބުންޏެވެ.
ލެސްޓާ ސިޓީ ދެން އެންމެ އަވަހަށް ނުކުންނަން ޖެހޭނީ ޗެމްޕިއަންސް ލީގު މެޗަކަށެވެ. ޗެމްޕިއަންސް ލީގުގައި އެ ޓީމު އަންނަ އަންގާރަ ދުވަހު ނުކުންނަން ޖެހޭނީ ސެވިއްޔާއާ ދެކޮޅަށެވެ. ސެވިއްޔާއާ ދެކޮޅަށް ކުޅޭ މުހިންމު މެޗަށްފަހު ޕްރިމިއާ ލީގުގައި ވެސް ލެސްޓާ ނުކުންނަން ޖެހޭނީ މުހިންމު މެޗަކަށެވެ. މިމަހު 29 ވަނަ ދުވަހު ޕްރިމިއާ ލީގުގައި ލެސްޓާ ނުކުންނަން ޖެހޭނީ ލިވަޕޫލްއާ ދެކޮޅަށެވެ.