ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ސުޕަމާޓުން ކޮންމެ އަހަރަކުވެސް ކުރިއަށް ގެންދާ ޗޮކްލެޓް ވީކް، ޗޮކްލެޓު ފެސްޓިވަލަކަށް ބަދަލުކޮށް މިއަދު ފަށައިފިއެވެ.
އެސްޓީއޯ ސުޕަމާޓުގައި މިއަދު ފެށި އެ ފެސްޓިވަލުގައި ބައިވެރިވަނީ އެސްޓީއޯގެ އެންމެ ގާތް ފަސް ޕާޓްނަރުން ކަމުގައިވާ، ހެޕީ މާކެޓާއި ވީބީ ބްރަދާސް އާއި ސްރީލަންކާގެ ސީންކޯ ކުންފުންޏާއި ގޯލްޑެން ލޭން އަދި ސިމްޑީ އިން ބައިވެރިވެއެވެ. މި ފަރާތްތަކުން ރާއްޖެ އެތެރެކޮށް ވިއްކާ ޗޮކްލެޓުތައް ހެޔޮ އަގުގައި މި ފެސްޓިވަލުން ލިބެން ހުންނާނެ އެވެ.
ޗޮކްލެޓް ވީކްގެ ނަމުގައި އެސްޓީއޯއިން މި ޕްރޮމޯޝަން ކުރިއަށް ގެންދާތާ މިއަހަރަށް 10 އަހަރު ފުރޭނެއެވެ. ފެސްޓިވަލް އިފްތިތާހުކޮށްދެއްވުމަށްފަހު އެކުންފުނީގެ އެފްއެންބީގެ އެޗްއޯޑީ ފާތުމަތު އާޝާން މިއަދު ވިދާޅުވީ އެ ހަރަކާތުގައި ބައިވެރިވާ ޕާޓްނަރުންގެ ފަރާތުންވެސް ބޮޑު ތަރުހީބެއް ލިބޭ ކަމަށެވެ.
މިއަހަރުގެ ފެސްޓިވަލް ކުރިއަށްދާނީ މިމަހުގެ 20 ވަނަ ދުވަހުގެ ނިޔަލަށް އެސްޓީއޯ ސުޕަމާޓުގައެވެ.
އެ ފެސްޓްގައި ބައިވެރިވާ ފަރާތްތަކުން ހާމަކުރެއްވި ގޮތުގައި ގިނަ ބްރޭންޑްތަކުގެ އާ ޗޮކްލެޓްވެސް މި ފެސްޓުގެ ތެރޭގައި ތައާރަފްކުރާނެ އެވެ. އަދި ބައެއް ސްޓޯލްތަކުން ބައްލަވައިގަންނަވާ ކޮންމެ ޗޮކްލެޓަކަށް ހާއްސަ އިނާމެއް ލިބޭއިރު ހެޕީމާކެޓާއި ވީބީގެ ފަރާތުން ވަނީ އިނާމެއްގެ ގޮތުގައި ރިސޯޓް ދަތުރެއްވެސް ހުށަހަޅައިފައެވެ.