މާލޭގައި މިދިޔަ އަހަރު ހިންގި މާރާމާރީއެއްގައި ފުރާވަރު ކުއްޖަކު މަރުވި މައްސަލައާ ގުޅުން ހުރި ދައުވާއެއް މީހެއްގެ މައްޗަށް ސާބިތުވެ، 27 ދުވަހަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ.
މިދިޔަ އަހަރުގެ ޖޫން މަހުގެ ތިން ވަނަ ދުވަހުގެ ހަވީރުގެ ވަގުތެއްގައި ކ. ކާށިދޫ، ރަންފަރު، އުމުރުން 14 އަހަރުގެ އަހުމަދު އިރުޝާން ހިލްމީ މަރުވާން ދިމާވި މާރާމާރީއާ ގުޅިގެން 27 ދުވަހަށް ޖަލަށްލުމަށް ހުކުމް ކުރީ މ.ޖެރޭނިއަމް، މުހައްމަދު ޖިނާދުގެ މައްޗަށެވެ.
އޭނާ ބައިވެރިވެގެން ހިންގި ގްރޫޕު މާރާމާރީގައި އިރުޝާން މަރުވެފައި ވަނީ ލިބުނު ޒަހަމްތަކަށް ފަރުވާދެމުންދަނިކޮށް އައިޖީއެމްއެޗުގަ އެވެ.
މަރުގެ އެ މައްސަލާގައި ތިން ކުޑަކުއްޖެއްގެ މައްޗަށް ދައުލަތުން ވަނީ ދައުވާ އުފުލާފަ އެވެ. އެ މީހުންގެ މައްޗަށް އުފުލާފައި ވަނީ ތޫނުއެއްޗެއް ބޭނުންކޮށްގެން ގަސްތުގައި މީހަކު މަރާލުމުގެ ދައުވާ އެވެ.
ކްރިމިނަލް ކޯޓުން ޖިނާދުގެ މައްޗަށް އިއްޔެ ހުކުމްކޮށްފައި ވަނީ ދައުލަތުން އޭނާގެ މައްޗަށް އުފުލި އާންމު މަސްލަހަތަށް ގެއްލުން ހުރި ކަމެއް ކުރުމުގެ ކުށުގެ ދައުވާގެ ޝަރީއަތް ހިންގުމަށްފަހު އެވެ. އެ ދައުވާ އުފުލީ އާ ގާނޫނުލް އުގޫބާތުގެ ދަށުންނެވެ.
އެ މާރާމާރީ ހިންގާފައި ވަނީ މިދިޔަ އަހަރުގެ ޖޫން މަހުގެ ތިން ވަނަ ދުވަހުގެ ހަވީރު 5:30 އެހައިކަންހާއިރު، މ. މަދަންގެއާ ދިމާލަށްވާ ގޮތަށް މަޖީދީމަގުގައި ޕާކްކޮށްފައި އޮތް ޕިކަޕެއްގެ ތެރޭގަ އެވެ.
ބިރުވެރިކަން އުފެދޭ ގޮތަށް އެ ޕިކަޕްގެ ތެރޭގައި ތިބި ކުދިންނާ މެދު މާރާމާރީ ހިންގި ކަމަށް ޖިނާދު އިއުތިފާވެފައިވާ ކަމަށް ކްރިމިނަލް ކޯޓުން އިއްޔެ ކުރި ހުކުމްގައިވެ އެވެ.
އެ މައްސަލާގައި 18 އަހަރުން ދަށުގެ ކުޑަކުދިންތަކެއްގެ މައްޗަށް ވެސް އެ ދައުވާ ވަނީ އުފުލައިފަ އެވެ.