އެމްޑީޕީ އިސްވެ އޮވެ އުފައްދާފައިވާ މޯލްޑިވްސް ޔުނައިޓެޑް އޮޕޮޒިޝަން (އެމްޔޫއޯ) ގެ ނައިބު ލީޑަރަކަށް އެ އިއްތިހާދުގެ ޝެޑޯ އެޑިއުކޭޝަން މިނިސްޓަރު ޝިފާ މުހައްމަދު ހަމަޖައްސައިފިއެވެ.
ޝިފާ އެ މަގާމަށް ހަމަޖައްސާފައިމިވަނީ އެމަގާމުގައި ކުރިން ހުންނެވި އަލީ ވަހީދު، އެމަގާމުން އިސްތިއުފާ ދެއްވުމާ ގުޅިގެންނެވެ.
މިދިޔަ ނޮވެމްބަރު މަހުގެ ތެރޭގައި އެމްޔޫއޯގެ ނައިބް ލީޑަރުކަމުން އަލީ ވަހީދު އިސްތިއުފާ ދެއްވާފައިވާއިރު، އޭނާ ވަނީ އެމްޑީޕީގެ ޗެއާޕާސަން ކަމުން ވެސް ހަމަ އެދުވަހު އިސްތިއުފާ ދެއްވާފައެވެ،
މާލޭ ސިޓީގެ ޑެޕިއުޓީ މޭޔަރުކަމާއި ކައުންސިލް މެމްބަރުކަން ކުރައްވަމުން ގެންދަވާ ޝިފާ އަކީ އެމްޑީޕީގެ އަންހެނުން ރޫހުގެ ރައީސާގެ އިތުރުން އެ ޕާޓީގެ ގައުމީ މަޖިލީހުގެ މެމްބަރެކެވެ. އަދި އޭނާ ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގައި އެޑިއުކޭޝަން މިނިސްޓަރުކަން ވެސް ކުރައްވައިފައެވެ.
އެމްޔޫއޯ އިން މިއަދު ނެރުނު ބަޔާނުގައި ވަނީ، އިސްތިއުފާ ދެއްވި ކުރީގެ ޑިޕިއުޓީ ލީޑަރު އަލީ ވަހީދު ކޮށްދެއްވި ހީވާގި އަދި އަގުހުރި ހިދުމަތްތައް ހަނދާންކޮށް އޭނާ ގެނެސްދެއްވި މުރާލިކަމާއި ޖޯޝާއި ހިތްވަރުގަދަކަމަށް ޝުކުރުއަދާކުރައްވާފައެވެ.