މާލޭގެ ގެތަކުން ނަގާލާ ކުނިތައް މާލޭ ހުޅަނގު ދެކުނު ފަރާތުގައި ހަދާފައިވާ އިންޑަސްޓްރިއަލް ވިލެޖަށް ގެންދަން ފަށައިފި އެވެ.
މީގެ ކުރިން މާލޭގެ ކުނިތައް ނަގާލަމުން ދިޔައީ ކުރީގެ ކުނިކޮށި ސަރަހައްދު ފަޅުތެރޭގައި ބާއްވާފައި އޮންނަ ދޯންޏަކަށެވެ. ނަމަވެސް މިރެއިން ފެށިގެން އެ ކުނިތައް އިންޑަސްޓްރިއަލް ވިލޭޖްގައި އޮންނަ ކޮޅުވެއްޓިއަކަށް ގެންދާ ގޮތަށް ސަރުކާރުން ވަނީ ނިންމާފަ އެވެ.
އިންޑަސްޓްރިއަލް ވިލެޖުގައި ކުނި މެނޭޖްކުރުމުގެ މަސައްކަތް ރަސްމީކޮށް ފެށި މިއަދު ހަވީރު އެވެ. އެގޮތުން އެ ސަރަހައްދު ހުޅުއްވައިދެއްވީ އެންވަޔަރަންމަންޓް މިނިސްޓަރު ޠާރިގް އިބްރާހިމް އާއި ހައުސިން މިނިސްޓަރު ޑރ،. މުހައްމަދު މުއިއްޒު އެވެ.
ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ މެނޭޖިން ޑިރެކްޓަރު އިބްރާހިމް ފުއާދު ވިދާޅުވީ، އިންޑަސްޓްރިއަލް ވިލެޖަށް ކުނި ގެންދާގޮތަށް ހަމަޖެއްސުމުން މާލޭގެ ރައްޔިތުންނަށް ކުނީގެ ސަބަބުން ދިމާވެފައިވާ އުނދަގޫތަކަށް ހައްލެއް ލިބޭނެ ކަމަށް ގަބޫލުކުރައްވާ ކަމަށެވެ.
"އަޅުގަނޑުމެންނަށް އަބަދުވެސް ލިބޭ ޝަކުވާއެއް ބޭރުމަގުގައި އޮންނަ ދޯންޏަށް ކުނި އަރުވާތީ ކުނިވަސް ދުވާ ވާހަކަ. ވިލިމާލެ ޓާމިނަލް ކައިރީ ބާއްވައިގެން ކުނި ގެންދިއުމުގެ މަސައްކަތް ކުރި އިރު އެތައް ރައްޔިތުންނެއް ކުނިވަސް ދުވާތީ އެ ޝަކުވާ ކުރި. އެހެންނަމަވެސް މިތަނަށް ކުނި ގެންނަން ފެށުމުން އަޅުގަނޑު ގަބޫލުކުރަނީ އެކަމަށް ހައްލެއް ލިބޭނެކަމަށް،" ފުއާދު ވިދާޅުވި އެވެ.
އޭނާ ވިދާޅުވީ މާލޭގެ ތެރެއިން މިހާރު ފެންނަ ގިނަ ކުނިތަކަކީ އެއްވެސް ނިޒާމެއް ނެތި ކުނި ކަލެކްޓްކުރުމުގެ ތެރެއިން މަގުތަކަށް އެޅޭ ކުނި ކަމަށެވެ. އެކަމަށް ހައްލެއް ގެނައުމުގެ ގޮތުން، ކުނި ބަންދު ކުރެވޭގޮތައް އުފައްދާފައިވާ ވެހިކަލެއްގައި މާލެ ތެރެއިން ކުނި ކަލެކްޓްކުރުމުގެ ކަންކަން މިމަހު 25 ވަނަ ދުވަހު ފަށާނެ ކަމަށް އޭނާ ވިދާޅުވި އެވެ.
"އަޅުގަނޑުމެން މި މަސައްކަތް މި ފަށަނީ 51 ގޭގެ ކުނި ނެގުމާ އެކީގަ. ޕައިލެޓް ކުރެވޭ އެ ކަލެކްޓިން ސާވިސް ފުރިހަމަ ނޒާމެއްގެ ތެރެއިން އަންނަ އަހަރުގެ ޖޫންމަހުގެ ތެރޭގައި އިރާދަކުރެއްވިއްޔާ މުޅި މާލެއަށް ފޯރުކޮށްދޭނަން،" ފުއާދު ވިދާޅުވި އެވެ.
މިއަދުގެ ރަސްމިއްޔާތުގައި ވާހަކަ ދައްކަވަމުން އެންވަޔަރަންމަންޓް މިނިސްޓަރު ޠާރިގް ވިދާޅުވީ، މާލެއިން ކުނި ގެންދިއުމަށް ބޭނުންވާ ކޮޅުވެއްޓި ތަކުގެ ދަތިކަން ހައްލު ކުރުމަށް ތިން ކޮޅުވެއްޓިއެއް ބަނުމުގެ މަސައްކަތް މިހާރު ހިނގަމުން އަންނަ ކަމަށެވެ. އެ ކޮޅުވެއްޓިތައް ވެސް އަންނަ މެއި މަސް ހިސާބުގައި ލިބޭނެ ކަމަށް މިނިސްޓަރު ވިދާޅުވި އެވެ.
"ލޭންޑިން ކްރަފްޓްތައް ލިބި، ރަށުތެރޭގައި ކުނި ކަލެކްޓްކުރަން ބޭނުންވާ ވެހިކަލްތައް ލިބުނީމަ މާލެއިން ކުނި ކަލެކްޓް ކުރުމާ އެ ކުނި މެނޭޖްކުރުމުގެ ހުރިހާކަމެއް ހިނގަމުން ދާނީ ވެމްކޯގެ ދަށުން. ކުޑަ ދުވަސްކޮޅެއް ތެރޭގައި މިފަދަ ކާމިޔާބީތަކެއް ލިބުނުކަމަށްޓަކާ ރައީސް ޔާމީނަށް ޝުކުރު ދަންނަވަން،" މިނިސްޓަރު ޠާރިގް ވިދާޅުވި އެވެ.
އިންޑަސްޓްރިއަލް ވިލެޖަށް ގެންދާ ކުނިތައް އަޅާނީ އެތަނުގައި އޮންނަ ލޮރީއަކަށާއި ކޮޅުވެއްޓިއަކަށެވެ.