ރާއްޖެއިން ޒިކާ ވައިރަސް ފެނުނު ދެ ދިވެހިންގެ ގައިން ވެސް އެބަލި ފެނިފައިވަނީ މާލެއިން ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެޗްޕީއޭގެ އެޕިޑިމިއޮލޮޖިސްޓް ޑރ. އިބްރާހިމް އަފްޒަލް މިއަދު ވިދާޅުވީ، ޒިކާ ވައިރަސް ފެނުނު ދެ ދިވެހިންގެ ގައިން އެ ބަލި ފެނިފައިވަނީ މިދިޔަ މަހު އައިޖީއެމްއެޗްގައި ހެދި ޓެސްޓުތަކުގެ ތެރެއިން ކަމަށެވެ. އަދި އެ ޓެސްޓުތަކުގެ ނަތީޖާ ޔަގީންކުރުމަށް ރާއްޖޭން ބޭރަށް ވެސް ފޮނުވި ކަމަށް އޭނާ ވިދާޅުވިއެވެ.
ޒިކާ ވައިރަސް ފެނުނު ދެ ދިވެހިންނަށް ވެސް އެ ބަލި ޖެހިފައިވަނީ ރާއްޖޭގެ އެތެރެއިނެވެ. ނަމަވެސް އެ ދެމީހުން ވެސް މިހާރު ރަނގަޅުވެފައިވާ ކަމަށް ޑރ. އަފްޒަލް ވިދާޅުވިއެވެ.
ދެކުނު އެމެރިކާގެ ގައުމުތަކުގައި ހަލުއިކަމާ އެކު ޒިކާ ވައިރަސް ފެތުރެން ފެށުމާ އެކު، ރާއްޖެއިން ވެސް ވަނީ މިއަހަރުގެ ޖެނުއަރީ މަހު ރާއްޖޭގައި ޒިކާ ވައިރަސް އުޅޭޓޯ ބެލުމުގެ މަސައްކަތް ފަށައި، ޒިކާ ވައިރަސްގެ އަލާމާތް ފެނުނު 517 މީހަކު މިހާތަނަށް ޓެސްޓުކޮށްފައެވެ.
އެޗްޕީއޭ އިން މިހާތު ތައްޔާރުވަމުންދަނީ މުޅި ރާއްޖޭގެ ހުރިހާ ސަރަހައްދެއްގައި އެ ވައިރަސް އުޅޭތޯ ސްކްރީން ކުރުމުގެ މަސައްކަތް ފެށުމަށެވެ.
ޑރ. އަފްޒަލް ވިދާޅުވީ، ރާއްޖޭގެ ހުރިހާ ހިސާބަކުން ޒިކާ ވައިރަސް އަށް ސާމްޕަލް ނަގައި މާލެ ގެނެސް ޓެސްޓު ހެދޭނެ އިންތިޒާމް އަންނަ ހަފްތާ ތެރޭގައި ހަމަޖެހިގެންދާނެ ކަމަށެވެ.
ޒިކާ ވައިރަސް އަކީ ޑެންގޫ ހުން ފަތުރާ އީޑީސް މަދިރިން ފެތުރޭ ބައްޔަކަށްވާތީ ބަލި ފެތުރިދާނެ ކަމުގެ ފުރުސަތު އެބަ އޮތް ކަމަށާއި ނަމަވެސް އެ ފުރުސަތު ބޮޑީ ކޮން ހިސާބެއްގައިކަން ބުނަން ނޭނގޭ ކަމަށް ވެސް އޭނާ ވިދާޅުވިއެވެ.
ޑެންގޫ އަދި ޗިކުންގުންޔާ ފަދަ ބަލިތައް ފަތުރާ އީޑީޒް މަދިރީގެ ޒަރިއްޔާއިން ފެތުރޭ ޒިކާ ވައިރަހަކީ ދުނިޔޭގެ އާންމު ސިއްހަތަށް އޮތް ނުރައްކަލެއް ނޫންކަމަށް ދުނިޔޭގެ ސިއްހަތު ޖަމިއްޔާއިން ވަނީ، މިދިޔަ މަހުގެ ތެރޭގައި ކަނޑައަޅާފައެވެ.
އެޗްޕީއޭއިން މީގެ ކުރިން ހާމަކޮށްފައިވާ ގޮތުގައި، ބޭރު މީހުންގެ ގައިން ޒިކާ ވައިރަސް ފެނުމުގެ ތިން ކޭސްއެއް ރާއްޖޭގައި ފެނިފައިވެއެވެ. އެންމެ ފުރަތަމަ ޒިކާ ވައިރަސް ރާއްޖެއިން ފެނުނީ، މިއަހަރުގެ ޖެނުއަރީ މަހު ފުރި ފިންލެންޑްގެ މީހެއްގެ ގައިންނެވެ. އެއަށް ފަހު އެ ވައިރަސް ފެނުނީ ރާއްޖޭގައި ޗުއްޓީ ހޭދަކޮށްފައި މިއަހަރުގެ މެދުތެރޭގައި ފުރި، ޖަރުމަނު އަދި ސްޕެއިންގެ ދެ މީހުންގެ ގައިންނެވެ.
ޒިކާ ވައިރަސް ޖެހުމުން ގާތްގަނޑަކަށް 80 ޕަސެންޓު މީހުންގެ ގައިން އެއްވެސް އަލާމާތެއް ނުފެނެއެވެ. ބައެއް މީހުންގެ ގައިން ފެންނަ އަލާމާތްތަކުގެ ތެރޭގައި ހުންއައުމާއެކު ގައިން ރަތްކުލައިގެ ކުދި ބިހިތަކެއް ނެގުމާއި ލޯރަތްވުން، ގައިގައިރިއްސުން، ބޮލުގައިރިއްސުން އަދި ހުޅުތަކުގައި ރިއްސުން ހިމެނެއެވެ.
ނަމަވެސް މާބަނޑު އަންހެނުންނަށް ޒިކާ ވައިރަސް ޖެހުމުން ބަނޑުގައި އޮންނަ ދަރިފުޅަށް މައިކްރޯސެފަލީ ކިޔާ ކޮންޑިޝަނެއް ޖެހުމުގެ ފުރުސަތު ބޮޑު ކަމަށް އެމެރިކާގެ ސެންޓާސް ފޯ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ)ން ބުނެފައިވެއެވެ. މައިކްރޯސެފަލީ އަކީ ތުއްތުކުއްޖާގެ ސިކުނޑިއާއި ބޮލުގެ ނާށިގަނޑު ރަނގަޅަށް އާލާނުވެ އުފަންވުމަށް ކިޔާ ނަމެކެވެ.