މެންޗެސްޓާ ޔުނައިޓެޑުގެ ބެންޗުގައި އިންނަން ޖެހުމަކީ ހިތްހަމަޖެހޭ ކަމެއް ނޫން ކަމަށް އެ ކްލަބުގެ ފްރާންސް ފޯވަޑް އެންތޮނީ މާޝިއަލް ބުނެފި އެވެ.
މިދިޔަ ސީޒަނުގައި ފްރާންސްގެ މޮނާކޯ އިން ޔުނައިޓެޑާ ގުޅުނުއިރު އޭނާ އަކީ އެ ކްލަބުގައި އިސް ދައުރެއް އަދާކުރި ކުޅުންތެރިއެކެވެ. ނަމަވެސް މި ސީޒަނުގައި މާޝިއަލްއަށް އެންމެ ރަނގަޅު ކުޅުން ދެއްކިފައި ނުވުމުން އާންމުގޮތެއްގައި އޭނާ ފެންނަމުންދަނީ ޔުނައިޓެޑުގެ ބެންޗުންނެވެ.
"ބެންޗުގައި އިނުމަކީ ކަމުދާ ކަމެއް ނޫން. އެކަމާ ހިތްހަމައެއް ނުޖެހޭ. އެކަމަކު އަހަރެން ދެކެނީ މިއީ އަހަރެން ކުރިއަށް ދިއުމަށް ކުރިމަތިވި ޓެސްޓެއް ކަމަށް. މިއީ ކުޅުންތެރިޔަކު ކުރިއެރުމަށް ކުރިމަތިލާން ޖެހޭނެ ކަންތައްތަކެއް. ޓީމަށް އެހީތެރިވާން ބޭނުންވާއިރު ބެންޗުގައި އިންނަން ޖެހުމަކީ އުނދަގޫ ކަމެއް. އެއީ އަހަރެން ގަބޫލުކުރަން ޖެހޭ ކަމެއް،" ޔުނައިޓެޑްގެ ފްރާންސް ފޯވަޑް މާޝިއަލް ބުންޏެވެ.
މާޝިއަލް ބުނީ، ގިނަ ބަޔަކު އޭނާއާ މެދު އެކި ގޮތްގޮތަށް ދެކެމުންދާ ކަމަށާއި އެކަމަކު އޭނާ އަކީ އަދި ވަރަށް ޒުވާން ކުޅުންތެރިއެއް ކަމެއް އެމީހުންނަށް ނޭނގޭ ކަމަށެވެ. އަދި ކޮންމެ މީހަކު ކޮންމެ ގޮތަކަށް ދެކުނު ކަމަށްވިޔަސް އެއްވެސް ކަމެއް ބަދަލުނުވާނެ ކަމަށް ވެސް އޭނާ ބުންޏެވެ.
މި ސީޒަނުގައި ޔުނައިޓެޑްގެ ފުރަތަމަ 11 އިން އުމުރުން 21 އަހަރުގެ ފޯވަޑް މާޝިއަލް ފެނިފައިވަނީ އެންމެ ހަތް މެޗުގައެވެ.