ސީރިއާގެ ހަލަބުގެ ރައްޔިތުން އެ ސިޓީ ދޫކޮށް، ރައްކާތެރި ހިސާބުތަކަށް ދިއުމަށް ފުރުސަތު ދިނުމަށްޓަކައި ސީރިއާ ސަރުކާރާއި ހަނގުރާމަވެރި ޖަމާއަތްތަކުން ހަމަލާތައް ހުއްޓަލުމަށް ގެނައި އެއްބަސްވުމާ ޚިލާފުވެ، ސީރިއާ ސަރުކާރުން ހަލަބަށް ދެމުން ދިޔަ ހަމަލާތައް އިޔާދަކުރަން ފަށައިފިއެވެ.
ސީރިއާގެ ދާޚިލީ ހަނގުރާމައިގެ ތެރޭގައި އެންމެ ވަރުގަދައަށް ހަމަލާ ބަދަލުކުރަމުން ދާ އަލެޕޯ ނުވަތަ ހަލަބުގައި އިއްޔެ ވަރަށް ވަރުގަދަ ހަމަލާތަކެއް ބަދަލުކުރެވުނު އިރު، އެ ސިޓީގެ ބައެއް ރައްޔިތުންވެސް ގަތުލުކުރުމުގެ ހާދިސާތަކެއް ވަނީ ހިނގާފައެވެ.
އިރުމަތީ ހަލަބުގައި ހަނގުރާމަވެރިން ކޮންޓްރޯލް ކުރަމުން ދިޔަ ހިސާބުތައް ސީރިޔާ ސަރުކާރުގެ އަސްކަރިއްޔާގެ ދަށަށް ގެނެވުނު ކަމަށް ރަޝިއާއިން އދއަށް ކަނޑައަޅާފައި ހުންނަ ސަފީރު ވިޓަލީ ޗާކިން އިއްޔެ ވިދާޅުވި އިރު، ހަލަބުގައި ތާށިވެފައިވާ ކުށެއް ނެތް ރައްޔިތުން ސަލާމަތްވެ، އެ ޝަހަރު ދޫކޮށް ދިއުމަށް ފުރުސަތު ދިނުމަށްޓަކައި ހަމަލާ ބަދަލުކުރުން ހުއްޓާލުމަށް ވެސް މިއަދު އެއްބަސްވެވުނެވެ. އެ އެއްބަސްވުމާ ހަމައަށް އައުމަށް ސީރިއާ ސަރުކާރާ އަދި އިދިކޮޅު ފަރާތްތަކާ ދެމެދު މެދުވެރިކޮށްދިނީ، ސީރިއާ ސަރުކާރަށް އެންމެ ބޮޑު ވާގިވެރިކަމެއް ދޭ ރަޝިއާއާއި، ސީރިއާގެ ސަރުކާރަށް އެންމެ ބޮޑަށް ފާޑުކިޔައި، އަދި އަމަލުތައް ކުށްވެރިކުރާ ތުރުކީންނެވެ.
އެހެން ނަމަވެސް، ހަނގުރާމަވެރިން އެ އެއްބަސްވުމާ ޚިލާފުވެދާނެ ކަމަށް ބުނެ، ސީރިއާގެ އަސްކަރިއްޔާއިން ވަނީ ހަލަބަށް ބޮމުގެ ހަމަލާތައް އަލުން ފަށައި، ސީޒްފަޔަރ އެއްބަސްވުމާ ޚިލާފުވެފައެވެ.
އަސްކަރިއްޔާގެ މި އަމަލާ ހުރެ، ސަލާމަތާ ހަމައަށް ދިއުމުގެ ފުރުސަތު ލިބުމުގެ އުފަލުގައި ތިބި، ހަލަބުގެ ރައްޔިތުން އެ ސިޓީގައި ތާށިވީއެވެ. އަލްޖަޒީރާ ރިޕޯޓު ކުރާ ގޮތުން، ރައްޔިތުންނާ އެކު ހަލަބުން ބޭރަށް ދަތުރުކުރަން ތައްޔާރުވެފައި ހުރި ބަސްތަކާއި އެއްގަމު އެހެނިހެން އުޅަނދުތައް، ހަމަލާތަކުގެ ސަބަބުން ވަނީ ފުރޭ ގޮތް ނުވެފައެވެ.
މައުލޫމާތު ލިބޭ ގޮތުގައި، ހަނގުރާމަވެރި މައިދާނަކަށް ވެފައިވާ ހަލަބުން ބޭރުވުމަށް ހަލަބުގެ 15،000 އަށް ވުރެ ގިނަ ރައްޔިތުން އެދެއެވެ.
ބައިނަލްއަގުވާމީ މީޑިއާއިން ރިޕޯޓުކުރާ ގޮތުގައި ދެހާސް އެގާރަ ވަނަ އަހަރު ރައީސް ބައްޝާރުލް އައްސަދުގެ ވެރިކަމާ ދެކޮޅަށް މުޒާހަރާ ކުރަން ފެށުމުގެ ކުރިން ހަލަބަކީ އިގުތިސާދީ ގޮތުންނާއި ސިނާއީ ގޮތުން ސީރިއާގެ އެންމެ ކުރިއަރާފައިވާ ސިޓީއެވެ. އެ ސިޓީ ސަރުކާރުގެ ފައުޖުތަކުގެ ކޮންޓްރޯލްގެ ދަށަށް އައުމަކީ ސީރިއާ ހަނގުރާމައިގައި އެގައުމުގެ ސަރުކާރަށް ލިބުނު ބޮޑު ކާމިޔާބީއެކެވެ.
ނަމަވެސް އެ ކާމިޔާބީ އަކީ ސީރިއާ ހަނގުރާމަ ނިމުމަކަށް އައުން ނޫން ކަމަށް ރައީސް އަަސަދު އާއި އިދިކޮޅު ފަރާތްތަކުން ވެސް ވަނީ މީގެ ކުރިން ބުނެފައެވެ.