ވެލެންސިއާ ސްޕޯޓްސް ކްލަބު ބަލިކޮށް، ޒެނިތު ސްޕޯޓްސް ކްލަބުން ގައުމީ ނެޓްބޯޅަ މުބާރާތުގެ ޗެމްޕިއަންކަން ހޯދައިފި އެވެ.
ގައުމީ ނެޓްބޯޅަ މުބާރާތުގެ ޗެމްޕިއަންކަން ޒެނިތުން ހޯދީ ސޯޝަލް ސެންޓަރު އެތެރޭ ކޯޓުގައި ރޭ ކުޅުނު ފައިނަލުގައި 68-73 ޕޮއިންޓުން ވެލެންސިއާގެ މައްޗަށް ކުރި ހޯދައިގެންނެވެ.
އެ މުބާރާތުގެ އެންމެ މޮޅު ހަތް ކުޅުންތެރިންނަށް ހޮވުނީ ވެލެންސިއާގެ އީމާ އަބްދުލް ސައްތާރާއި، އެ ޓީމުގެ ނަޑީދާނީ ކުމާރިން އާއި، އެ ޓީމުގެ ސަމާ ތައުފީގާއި، ޒެނިތުގެ ތަރިންޖީ ސިވަލިންގަމް އާއި، އެ ޓީމުގެ އައިޝަތު ހަނާން ހުސައިން އާއި، ޓީސީ ސްޕޯޓްސް ކްލަބުގެ ލަޔާން އަލީ ރަޝީދު އަދި ކުޅުދުއްފުށި ޔޫތު އެންޑް ރެކްރިއޭޝަން ކްލަބުގެ ރާޝިދާ މޫސާ އެވެ.
ނެޓްބޯލް އެސޯސިއޭޝަން އޮފް މޯލްޑިވްސް އިން އިންތިޒާމްކޮށްގެން މި މަހުގެ 26 ވަނަ ދުވަހުން ފެށިގެން އިއްޔެގެ ނިޔަލަށް ކުރިއަށްދިޔަ ގައުމީ ނެޓްބޯޅަ މުބާރާތުގެ އެންމެ މޮޅު ކޯޗުގެ މަގާމަށް ހޮވުނީ ޗެމްޕިއަން ޒެނިތު ސްޕޯޓްސް ކްލަބުގެ ކޯޗު ނީޝާ ހަލީމް އެވެ.