އިސްލާމްދީނާ ބެހޭ މައުލޫމާތު ފޯރުކޮށްދީ ދީނީ ގޮތުން އާންމުން ހޭލުންތެރި ކުރުމަށް "ދީނީ ޗެނަލް"ގެ ނަމުގައި ޓީޗީ ޗެނަލެއް އުފެއްދުމަށް އިސްލާމިކް މިނިސްޓްރީއާއެކު ޕަބްލިކް ސާވިސް މީޑިއާ (ޕީއެސްއެމް)އިން އެއްބަސްވުމެއްގައި ސޮއިކޮށްފިއެވެ.
ދިވެހިރާއްޖޭގެ އަޑުގެ ސެނެކޯމާލަމުގައި ބޭއްވި ރަސްމިއްޔާތެއްގައި އެ އެއްބަސްވުމުގައި ޕީއެސްއެމްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހީމް ހަލީލެވެ. އިސްލާމިކް މިނިސްޓްރީގެ ފަރާތުން ސޮއިކުރެއްވީ އިސްލާމިކް މިނިސްޓަރު ޑރ. އަޙްމަދު ޒިޔާދު ބާގިރެވެ.
އިސްލާމިކް މިނިސްޓްރީން ބުނީ، އެ މިނިސްޓްރީއާ ޕީއެސްއެމްގެ ވަސީލަތްތައް ބޭނުންކޮށްގެން ޓީވީ ޗެނަލެއް އުފެއްދުމުގެ މަސައްކަތުގެ ދަށުން ޓީވީ ޗެނަލަކާއެކު ރޭޑިއޯ ޗެނަލެއްވެސް އުފެދިގެންދާނެ ކަމަށެވެ.
އެގޮތުން ރޭޑިއޯ ޗެނަލް ފަށާއިރު ކައިރި ސަރަހައްދަށް ސިގްނަލް ދޫކޮށް މަރުހަލާތަކަށް ބަހާލައިގެން މުޅި ރާއްޖެއަށް ސިގްނަލް ދޫކުރުމަށް މަސައްކަތްކުރާނެ ކަމަށާއި ޓީވީ ޗެނަލް ފަށާއިރު މިހާރު ޓީވީއެމް ލިބޭ ސަރަހައްދުތަކަށް ސިގްނަލް ފޯރުކޮށްދޭނެ ކަމަށް އެ މިނިސްޓްރީން ބުންޏެވެ.
ދީނީ ޗެނަލް އުފެއްދުމަށްފަހު ބައެއް މިސްކިތްތަކުގައި ކުރެވޭ ނަމާދުތަކާއި ދީނީ ދަރުސްތައް ލައިވްކޮށް ދުރަށް ފޮނުވޭނެ އެވެ. އަދި އެ ޗެނަލްގެ ހިދުމަތް 24 ގަޑިއިރު ރައްޔިތުންނަށް ލިބޭނެ މަގު ފަހިކޮށްދިނުމަށް މަސައްކަތްކުރާނެ ކަމަށް އިސްލާމިކް މިނިސްޓްރީން ބުންޏެވެ.
ރަސްމިއްޔާތުގައި ވާހަކަފުޅުދައްކަވަމުން އިސްލާމިކް މިނިސްޓަރު ޑރ. ޒިޔާދު ބާގިރު ވިދާޅުވީ، ޕީއެސްއެމްއާއެކު މިއަދު އުފައްދަން އެއްބަސްވި ދީނީ ޗެނަލް މެދުވެރިކޮށް ކުރިއަށް އޮތް ތަނުގައި އިސްލާމްދީނާ ގުޅުން ހުރި ދާއިރާތަކުގައި ހުރި މައްސަލަތައް ހައްލުކުރެއްވުމަށް މަސައްކަތްތަކެއް ކުރާނެ ކަމަށެވެ.
އެގޮތުން، ޗެނަލް މެދުވެރިކޮށް، އަންނަން އޮތް ޖީލުތަކަށް އިސްލާމްދީނުގެ ސާފު ފިކުރު ފޯރުކޮށްދީ، ދީނީ އަދި އިޖްތިމާއީ ޕްރޮގްރާމްތަކުގެ ތެރެއިން ދިވެހި ދަރީންގެ ކިބައިގައި ބޮޑުތަކުރުފާނު ފަދަ އަބްތާލުންގެ ހިތްވަރާއި އެ އަޒުމު އާލާކުރުމުގެ މަސައްކަތް ކުރެވިގެންދާނެ ކަމަށް ވިދާޅުވިއެވެ.
ދީނީ މައުލޫމާތު ފޯރުކޮށްދިނުމަށް ދީނީ ޗެނަލެއް އުފައްދަން ޕީއެސްއެމް އިން ނިންމާފައިވާއިރު، ދީނީ ޕްރޮގްރާމްތައް ގެނެސްދިނުމަށް "ދީނުގެ އަޑު"ގެ ނަމުގައި ރޭޑިއޯ ޗެނަލެއް ޕީއެސްއެމްގެ ފަރާތުން ވަނީ މިއަހަރުގެ ތެރޭގައި ލޯންޗުކޮށްފައެވެ.