ގދ. ތިނަދޫގައި އިމާރާތްކުރަމުންދާ އާ އިންޖީނުގޭގެ މަސައްކަތް އެޑްވާންސް ފައިސާ ދެއްކުމުގައި ދިމާވި ދަތިތަކެއްގެ ސަބަބުން ހުއްޓިފައި އޮތުމަށްފަހު، އެ ފައިސާ ދައްކައި މަސައްކަތް ފެށުމަށް ތައްޔާރުވެފައިވާ ކަމަށް ފެނަކަ ކޯޕަރޭޝަނުން ބުނެފި އެވެ.
އެ ކޯޕަރޭޝަނުގެ މެނޭޖިން ޑިރެކްޓަރު އަޙްމަދު ޝަރީފް ވިދާޅުވީ، ތިނަދޫގެ އިންޖީނުގެ އެޅުމަށް ހަވާލުކޮށްފައިވާ ސްރީލަންކާގެ ކުންފުންޏެއް ކަމަށްވާ އެޑްވާންސް ސްޓީލް ސްޓްރަކްޗަރު ޕްރައިވެޓް ލިމިޓެޑަށް އެޑްވާންސް ފައިސާގެ ގޮތުގައި ދައްކަން ޖެހޭ ހުރިހާ ފައިސާއެއް ނިމި ދިޔަ ހަފްތާ ތެރޭގައި ދައްކާފައިވާނެ ކަމަށެވެ.
އޭނާ ވިދާޅުވީ، މިހަފްތާތެރޭގައިި ތިނަދޫ އިންޖީނުގޭގެ މަސައްކަތް ފަށައި ކުރިއަށް އޮތް އަށް މަސް ދުވަހުގެ ތެރޭގައި އެ މަސައްކަތް އެއްކޮށް ނިންމާލެވޭނެ ކަމަށެވެ.
އަދި އެ އިންޖީނުގެއަށް ކުދިކުދި ބަދަލުތަކެއް ގެނައުމަށް ހަމަޖެހިފައިވާ ކަމަށާއި، އެ ގޮތުން އެ އިންޖީނުގެ އެޅިގެން ދާނީ ބޮޑެތި އިންޖީނު އުފުލުމަށް ކެރޭން ސިސްޓަމަކާ އެކުގައި ކަމަށް ޝަރީފް ވިދާޅުވި އެވެ.
ތިނަދޫ އިންޖީނުގޭގައި އަލިފާން ރޯވެފައި ވަނީ މިއަހަރުގެ ޖެނުއަރީ މަހުގެ 25 ވަނަ ދުވަހުގެ ރޭ ދަންވަރުގެ ވަގުތެއްގައެވެ. އެ ހާދިސާގައި އިންޖީނުގޭގައި ހުރި ހުރިހާ އިންޖީނެއް ބޭނުން ނުކުރެވޭ ވަރަށް ވަނީ އަނދައިފައެވެ. ތިނަދޫގައި އަލަށް އަޅާ އިންޖީނުގެއަކީ 11 މިލިއަން ރުފިޔާގެ މަޝްރޫއެކެވެ.