އިބްރާހިމް ނާސިރު އިންޓަނޭޝަނަލް އެއާޕޯޓު ތަރައްގީ ކުރަމުން ދާތީ އަންނަ އަހަރު ނަގަން ހުށަހަޅާފައިވާ އެއާޕޯޓް ޑިވެލޮޕްމެންޓް ޗާޖު (އޭޑީސީ)ގެ ގޮތުގައި ޓެކްސްއެއް ނެގުމަށް ވިސްނާފައި އޮތީ، ދިވެހީން ވެސް ހިމެނޭ ގޮތުން އެއާޕޯޓު ބޭނުންކުރާ އެންމެންގެ އަތުން ކަމަށް އިކޮނޮމިކް ކައުންސިލްގެ ކޯޗެއާ އަހްމަދު ޒުހޫރު ވިދާޅުވެއްޖެ އެވެ.
އަންނަ އަހަރަށް ލަފާކުރާ ބަޖެޓު ދިރާސާކުރުމުގެ މަސައްކަތް ކުރާ ބަޖެޓު ކޮމިޓީގައި މިއަދު ވާހަކަ ދައްކަވަމުން، ރައީސުލްޖުމްހޫރިއްޔާގެ އޮފީހުގެ މިނިސްޓަރު އަހްމަދު ޒުހޫރު ވިދާޅުވީ، އެއާޕޯޓު ތަރައްގީކުރަމުން ދަނީ ރައްޔިތުންނަށް ޓަކައި ކަމަށާއި، އެކަމުގެ ފައިދާ ކުރާނީ ވެސް ރައްޔިތުންނަށް ކަމަށެވެ.
"ގާތްގަނޑަކަށް އެއް ބިލިޔަން ޑޮލަރު އެއާޕޯޓަށް ޚަރަދުވޭ. މިފަދަ ބޮޑު ޚަރަދެއް ކުރެވޭ އިރު އޭގެ ފައިދާ ކުރަނީ ވެސް ރައޔްިތުންނަށް،"
ޒުހޫރު ވިދާޅުވީ، ބަޖެޓު އެކުލަވާލި އިރު، އުސޫލެއްގެ ގޮތުން ނިންމާފައި އޮތީ އެއާޕޯޓު ބޭނުންކުރާ ކޮންމެ މީހެއްގެ އަތުން ވެސް އެއާޕޯޓު ޑިވެލޮޕްމެންޓް ޗާޖު ނެގުމަށް ކަމަށެވެ. އެހެން ނަމަވެސް އެ ޓެކްސް ނަގާނީ ކޮން ބައެއްގެ އަތުންތޯ ނިންމާނީ ރައްޔިތުންގެ މަޖިލީހުން ކަމަށް ޒުހޫރު ވިދާޅުވި އެވެ.
"އުސޫލެއްގެ ގޮތުން ނިންމާފައި އޮތީ އެއާޕޯޓު ބޭނުންކުރާ ކޮންމެ މީހަކު ވެސް އޭޑީސީއަށް އެޕްލައި ކުރެވޭނެ މީހެއްގެ ގޮތުން. ނަމަވެސް އެއީ ވަކި ގާނޫނަކުން، ތިޔަ ބޭފުޅުން ނިންމާނެ ކަމެއް: ކޮން ބައެއްގެ އަތުންތޯ ނަގާނީ އަދި ނުނަގާނީ. އިކޮނޮމިކް ކައުންސިލްގެ ޗެއާގެ ގޮތުން ވިސްނުން ހުރީ، ކޮންމެ މީހަކު ވެސް އޭޑީސީ ނެގޭނެ މީހެއްގެ ގޮތުގައި،"
ޒުހޫރު ވިދާޅުވީ ކޮންމެ ހަފްތާއަކު ދެހާހެއްހާ ދިވެހީން ވެސް ރާއްޖެއިން ބޭރުވާ ކަމަށާއި، އޭގެ ތެރޭގައި ހިމެނެނީ ހަމަ ދަތުރުކުރާ އެއް ބަޔަކު ކަމަށެވެ.
"އެބޭފުޅުންނަކީ ވެސް މިއަށް އެޕްލައިވާ ބައެއްތޯ ނިންމާނީ ތިޔަ ބޭފުޅުން. ހުރިހާކަމެއް ދިވެހީންނަށް ސަބްސިޑައިޒް ކުރާނީތޯ ނުވަތަ އެހެން ގޮތަކަށްތޯ، ނިންމާނީ މަޖިލީހުން ތިޔަ ބޭފުޅުން،" ޒުހޫރު ވިދާޅުވި އެވެ.
ޒުހޫރު ވިދާޅުވީ އިކޮނޮމިކް ކައުންސިލުން ގެންދާނީ، ރާއްޖޭގެ އިގްތިސާދު ރަނގަޅުކުރުމަށް ކުރަން ޖެހޭ ކަންކަން ކުރަމުން ކަމަށެވެ.
ފިނޭންސް މިނިސްޓަރު އަހްމަދު މުނައްވަރު ބަޖެޓު ހުށަހެޅުއްވި ދުވަހު ވެސް ވިދާޅުވީ، ދައުލަތަށް އާމްދަނީ އިތުރުކުރުމުގެ ގޮތުން އެއާޕޯޓު ޑިވެލޮޕްމެންޓް ޗާޖެއްގެ ގޮތުގައި ކޮންމެ މީހެއްގެ އަތުން 25 ޑޮލަރު ނެގުމަށް ހުށަހަޅާފައިވާ ކަމަށެވެ.
މީގެ ތެރޭގައި ދިވެހީން ވެސް ހިމެނޭ ކަމަށް ބުނެ ގިނަ ބަޔަކު ކަންބޮޑުވުން ފާޅުކުރަން ފެށުމުން، ޕީޕީއެމްގެ ޕާލަމެންޓްރީ ގްރޫޕުގެ ލީޑަރު އަދި ބަޖެޓު ކޮމިޓީގެ މުގައްރިރު އަހްމަދު ނިހާން ހުސައިން މަނިކު ޓުވީޓު ކުރައްވައި ވިދާޅުވީ، ބަޖެޓުގައި އާމްދަނީ އިތުުރުކުރުމަށް އެއާޕޯޓު ޑިވެލޮޕްމެންޓް ޗާޖު ނަގަން ވިސްނާފައި ވަނީ ފަތުރުވެރިންނާއި ބިދޭސީންގެ އަތުން ކަމަށެވެ.