އެކަށީގެންވާ ގޮތެއްގައި ހައިޑްރޯފްލޮރޯކާބަންސް (އެޗްއެފްސީ) މަދުކުރެވިއްޖެނަމަ، މިގަރުނު ނިމުމުގެ ކުރިން ދުނިޔެ ހޫނުވާ މިންވަރު ދަށް ކުރެވޭނެ ކަމަށާއި އެކަމަށް ރާއްޖޭން ވަރަށް ބޮޑަށް މަސައްކަތްކުރަމުންދާ ކަމަށް އެންވަޔަރަމަންޓް މިނިސްޓަރު ޠާރިޤު އިބްރާހިމް ވިދާޅުވެއްޖެ އެވެ.
މިނިސްޓަރު ޠާރިޤު ވިދާޅުވީ، އެޗްއެފްސީ މަދުކުރެވިއްޖެނަމަ މިގަރުނު ނިމުމުގެ ކުރިން ދުނިޔެ ހޫނުވާ މިންވަރުން 0.5 ޑިގްރީ ސެލްސިއަސް ދަށްކުރެވޭނެ ކަމަށް ދިރާސާތަކުން ދައްކާ ކަމަށެވެ.
"މިއީ ދުނިޔެ ހޫނުވުން ދެ ޑިގްރީ ސެލްސިއަސްގެ ތެރޭގައި ހިފެހެއްޓުމަށް ކުރަމުންދާ މަސައްކަތަށް ލިބިގެންދާނެ ބޮޑު ކުރިއެރުމެއް. އެކަން ކާމިޔާބުކުރުމަށް ކުދި ގައުމުތަކުގެ އިއްތިހާދުގެ ޗެއާގެ ހައިސިއްޔަތުން ދިވެހިރާއްޖޭން ގެންދަނީ ވަރަށް ބޮޑަށް މަސައްކަތް ކުރަމުން،" މިނިސްޓަރު ޠާރިޤު މީޑިއާއަށް މައުލޫމާތު ދެއްވަމުން ވިދާޅުވިއެވެ.
ޖައްވު ހޫނުކުރާ ގޭސްތަކުގެ ތެރޭން އެންމެ ބާރަށް އިތުރުވަމުން އަންނަ މާއްދާތަކުގެ ތެރޭގައި ހިމެނޭ އެޗްއެފްސީއަކީ ފިނިކުރާ ނިޒާމުތަކުގައި، ބޭނުންކުރާ މާއްދާތަކުގެ ބާވަތެކެވެ. އެ ބާވަތުގެ މާއްދާތަކަކީ ޖައްވުގައި ނިސްބަތުން ކުރު މުއްދަތަކަށް ދެމިހުރި ނަމަވެސް ޖައްވު ހޫނުކުރުމުގެ ބާރުގަދަ މާއްދާތަކެކެވެ.
ރުވާންޑާގެ ވެރިރަށް ކިގާލީގައި އޮކްޓޯބަރު މަހު ބޭއްވި ބައްދަލުވުމުގައި ދުނިޔޭގެ 197 ގައުމުން ވަނީ މޮންޓްރިއަލް މުއާހަދާއަށް އިސްލާހު ގެނައުމަށް އެއްބަސްވެފައެވެ.
ކިގާލީ އިސްލާހުގެ ދަށުން، ދުނިޔޭގެ ކުރިއަރާފައިވާ ގައުމުތަކުން 2019 ވަނަ އަހަރުން ފެށިގެން އެޗްއެފްސީ މާއްދާތައް މަދުކުރުމަށް މަސައްކަތް ފަށަން ޖެހޭނެއެވެ. އަދި ތަރައްގީ ވަމުން އަންނަ ގައުމު ތަކުން 2024 ވަނަ އަހަރާއި 2028 އަހަރާ ދެމެދުގައި އެޗްއެފްސީ ބޭނުންކުރުން ކޮންޓްރޯލްކޮށް މަދުކުރަން ފެށުމަށް ވަނީ އެއްބަސް ވެފައެވެ.
މޮންޓްރިއޯލް ޕްރޮޓޮކޯލަކީ އޯޒޯން ފަށަލަ ނެތި ހަލާކުވެދިއުމާ ދެކޮޅަށް މަސައްކަތްކުރުމަށް 16 ސެޕްޓެމްބަރު 1987ގައި ސޮއިކޮށް 1989 ވަނަ އަހަރު ތަންފީޒުކުރަން ފަށާފައިވާ ބައިނަލްއަގުވާމީ މުއާހަދާއެކެވެ.
އެ މުއާހަދާގެ ދަށުން، ފުރިހަމަ ގޮތުގައި ވިލަރެސް ކޮށްގެން ކުރި މަސައްކަތުން ޖައްވު ހޫނުވުމާ ދެކޮޅަށް ވެސް ކުރިއެރުން ތަކެއް ވަނީ ހޯދާފައެވެ.
އެގޮތުން، ހަމައެކަނި އޯޒޯންއަށް ގެއްލުންދޭ މާއްދާތައް މަދުކޮށްގެން، ޖައްވަށް ބޭރުކުރާ މާއްދާތަކުގެ ތެރޭން 135 ބިލިއަން ޓަނުގެ ކާބަންޑައިއޮކްސައިޑްއާ އެއްވަރުގެ މިންވަރެއް ވަނީ އުނިކުރެވިފައެވެ.
މޮންޓްރިއަލް މުއާހަދާގެ ދަށުން 2008 ވަނަ އަހަރު ރާއްޖޭން އެޗްއެފްސީ ބޭނުންކުރުން ހުއްޓާލާފައިވާ ކަމަށް ފާހަގަކޮށް މިނިސްޓަރު ޠާރިޤު ވިދާޅުވީ، އެއީ ރާއްޖޭން މިމާއްދާތައް ހުއްޓާލަންޖެހޭ މުއްދަތުގެ ދެއަހަރު ކުރިން ހާސިލުކޮށްފައިވާ ކާމިޔާބީއެއް ކަމަށެވެ.
އަދި 2020ގެ ކުރިން އެޗްސީއެފްސީ ހުއްޓާލުމަށް އަމާޒުހިފައި މާސްޓަޕްލޭނެއްގެ ދަށުން ރާއްޖޭން މަސައްކަތްކުރަމުންދާ ކަމަށް މިނިސްޓަރު ވިދާޅުވި އެވެ.
އެގޮތުން އެޗްއެފްސީ މާއްދާތައް މަދުކުރުމަށް ރާއްޖޭން ވަނީ ޒަމާނީ ޓެކްނޮލޮޖީގެ މައްޗަށް ބިނާވެފައިވާ ޑިސްޓްރިކްޓް ކޫލިން ނިޒާމެއް މާލެއާއި ހުޅުމާލޭގައި ގާއިމުކުރުމުގެ ދިރާސާތަކެއް ކޮށްފައެވެ.
"ތިމާވެށީގެ ދާއިރާއިން ދިވެހިރާއްޖެ ހޯދަމުން އަންނަ ކާމިޔާބީތަކުގެ އަސްލަކީ ސަރުކާރާއި ދިވެހި ރައްޔިތުން ގުޅިގެން، ހިތްވަރާއެކު ކުރަމުންދާ މިންނެތް މަސައްކަތެއް. ވީމާ ކިގާލީ އިސްލާހުގެ ދަށުން އެޗްއެފްސީ މަދުކުރުމުގައި ވެސް ދިވެހިންނަކީ ދުނިޔެއަށް މިސާލު ދައްކާނެ ބައެއްކަން ޔަގީން ކުރެވޭ،" މިނިސްޓަރު ޠާރިޤު ވިދާޅުވިއެވެ.