އިނގިރޭސި ޕްރިމިއާ ލީގުގައި ހޮނިހިރު ދުވަހު މިޑްލްސްބަރާއާ ދެކޮޅަށް އަމިއްލަ ދަނޑުގައި އާސެނަލް ކުޅުނު މެޗުން ބަލިނުވެ އެޓީމު ސަލާމަތްވުމުން އެކަމުގު ޝުކުރު ހައްގުވަނީ، އެޓީމުގެ ތަޖުރިބާކާރު ގޯލްކީޕަރު ޕީޓަރ ޗެކްއަށް ކަމަށް ކޯޗު އާސެން ވެންގާ ބުނެފިއެވެ.
މިއަހަރުގެ އޯގަސްޓް މަހު، ސަންޑަލޭންޑް އަތުން މިޑްޑްލްސްބަރާ މޮޅުވިމެޗަށް ފަހު މިހާތަނަށް އެޓީމަށް މެޗެއް ކާމިޔާބުކުރެވިފައި ނުވި ނަމަވެސް، އެމިރޭޓްސް ދަނޑުގައި ރޭ އެޓީމުން ވަނީ އާސެނަލްގެ ގޯލަށް ނުރައްކާތެރި ތިން ހަމަލާއެއް ފޮނުވާލައިފައެވެ. އެ ތިން ހަމަލާގެ ހުރަހަކަށްވެސް ވީ، ކްލަބް ކެރިއަރުގެ ބޮޑުބައެއް ޗެލްސީގައި ހޭދަކުރުމަށްފަހު އާސެނަލްއާ ގުޅުނު ޗެކްރިޕަބްލިކް ގޯލްކީޕަރެވެ.
"އިދިކޮޅު ޓީމަށް ގިނަ ފުރުސަތުތަކެއް ލިބުނު، އެހެންނަމަވެސް އަހަރެމެންގެ ގޯލްކީޕަރު އަހަރެމެން ސަލާމަތްކޮށްދިން،" މުހިންމު ދަނޑިވަޅުތަކުގައި ޗެކްގެ ފަރާތުން ރަނގަޅު ކުޅުމެއް ފެނިފައިވާކަން ފާހަގަކުރަމުން ވެންގާ ބުންޏެވެ.
ތަޖުރިބާކާރު ގޯލްކީޕަރު ޕީޓަރ ޗެކްވަނީ، 0-0 އިން މިޑްލްސްބަރާ އާއި އާސެނަލް އެއްވަރުވި މެޗުގައި މޮޅު ކުޅުމެއް ދައްކާފައި -- ފޮޓޯ: ބްލީޗަރރިޕޯޓް
ހޮނިހިރު ދުވަހު އުމުރުން 67 އަހަރު ފުރުނު ވެންގާގެ އާސެނަލުން ފެނިގެންދިޔައީ އިދިކޮޅު ގޯލަށް ހަމަލާތައް އުފެއްދުމުގައި ނާކާމިޔާބުވި މަންޒަރެވެ. ޗެމްޕިއަންސް ލީގުގައި ލުޑޮގޮރެޓްސް އަތުން 6-0 ލަނޑުގެ ތަފާތު ބޮޑު ނަތީޖާއަކުން އާސެނަލް މޮޅުވި ނަމަވެސް، ކޯޗުގެ އުފަންދުހުގެ ހަދިޔާއެއްގެ ގޮތުގައި އޭނާގެ ޓީމުގެ ފަރާތުން ވެންގާއަށް ލިބުނީ ހިތްދަތި ނަތީޖާއެކެވެ.
ވެންގާބުނީ، އޭނާގެ ޓީމުން މޮޅުވާން ކިތަންމެހާވެސް މަސައްކަތްކުރި ކަމަށާއި އެހެންނަމަވެސް، އިދިކޮޅު ގޯލަށް ހަމަލާތައް އުފެއްދުމުގައި ނާކާމިޔާބުވީ ކަމަށެވެ.
"ޕެނަލްޓީ އޭރިޔާތެރޭގައި އަހަރެމެންނަށް ރަނގަޅު ކުޅުމެއް ނުދެއްކުނީ. އެއީ އޭގެ ބައެއް،" ވެންގާ ބުންޏެވެ.
އެންމެ ޕޮއިންޓަކުން ފުއްދާލަން އާސެނަލަށް މަޖުބޫރުވި މެޗުގައި، އެޓީމުގެ ގޯލްކީޕަރަށް ނުރައްކާތަކާ ކުރިމަތިލާން ޖެހުނީ ގިނަވަގުތު ބޯޅަ ހިފަހައްޓައިގެން ކުޅެފައި، އިދިކޮޅު ގޯލަށް ނުރައްކާ ނުކުރެވުމުންކަން ވެންގާ ފާހަގަކުރިއެވެ.
"އަހަރެމެން އަމިއްލައަށް މެޗު އުނދަގޫކުރީ. އަހަރެމެންނަށް މެޗުގެ 75 ޕަސެންޓް ބޯލް ޕޮސެޝަން ލިބުނު، އެކަމަކުވެސް ބަލިނުވީ ކިރިޔާ. މިއީ ޒަމާނީ ފުޓްބޯޅަ،" އޭނާ ބުންޏެވެ.
ވެންގާ ބުނީ، ޓީމުން ކިތަންމެ ރަނގަޅަށް ކުޅުނުނަމަވެސް، ފޯވާޑްލައިނުގައި އުފެއްދުންތެރިކަމެއް ނެތްނަމަ ކުރާނެ ފައިދާއެއް ނެތްކަމަށެވެ.
އާސެނަލަކީ އެޓޭކިން ގޭމެއް ކުޅޭ ޓީމެއް ކަމަށާއި، ޖެހިޖެހިގެން ހަތްމެޗުން މޮޅުވެފައިވާއިރު، މިޑްލްސްބަރާ ފަދަ ޓީމަކާ އެއްވަރުވުން އެއީ އުޒުރެއް ކަމުގައި ނުބެލޭނޭ ކަމަށް ވެސް ވެންގާ ބުންޏެވެ.