އުރީދޫ ދިވެހި ޕްރިމިއާ ލިގްގައި ރޭ ނިއު ރޭޑިއަންޓް ސްޕޯޓްސް އާ ދެކޮޅަށް ކުޅުނު މެޗު 1-1ގެ ނަތީޖާ އަކުން އެއްވަރުވެ ބީޖީ ސްޕޯޓްސް ކްލަބް ދެވަނަ ޑިވިޝަނަށް ރެލިގޭޓް ވެއްޖެއެވެ.
އެއްވަނަ ޑިވިޝަނުގައި 2013 ވަނަ އަހަރުން ފެށިގެން ވާދަކުރަމުންދާ ބީޖީ ދެވަނަ ޑިވިޝަނަށް ރެލިގޭޓްވީ ލީގްގެ ފުލުގައި 14 ޕޮއިންޓާ އެކުއެވެ. އެއީ ބާކީ އެއްމެޗު އޮތް ނަމަވެސް ބީޖީއަށް ހަތް ވަނައިގައި އޮތް ވިކްޓަރީއާ ޕޮއިންޓްގެ ގޮތުން އަރާ ހަމަ ނުކުރެވޭނެތީއެވެ.
ރޭގެ މެޗުން ލިބުނު އެއް ޕޮއިންޓާއެކު ނިއު ވަނީ ވާދަވެރި ވެލެންސިޔާއާ ޕޮއިންޓްގެ ގޮތުން އަރައި ހަމަކޮށްފައެވެ. ދެ ޓީމަށްވެސް 20 ޕޮއިންޓް ލިބޭއިރު، ގޯލުގެ ތަފާތުން ފަސް ވަނައިގައި އޮތީ ވެލެންސިއާއެވެ. ހަވަނައިގައި އޮތީ ނިއުއެވެ.
ރޭގެ މެޗްގައި ފުރަތަމަ ލަނޑު ޖަހައި ލީޑް ނެގީ ނިއުއެވެ. އެޓީމަށް ލީޑު ނަގައިދިނީ ހަމްޒާ މުހައްމަދު (ހަމްޕް) އެވެ.
ނިއު އިން ލީޑުގައި ކުޅެމުން ދަނިކޮށް ބީޖީގެ މުހައްމަދު މުސްލިހަށް ވަނީ ރެފްރީ ދެވަނަ ރީނދޫ ކާޑާ އެކު ރަތްކާޑު ދައްކައި ދަނޑުން ފޮނުވާލާފައެވެ.
އެއް ކުޅުންތެރިއަކު މަދުކޮށް ކުޅުނު ބީޖީއަށް މެޗުގެ ނަތީޖާ އެއްވަރުކޮށްދިނީ ބިދޭސީ ފޯވާޑް ޑެނިއަލް ފިލޮމެންއެވެ.