އިސްލާމީ ގައުމެއްގެ އެންމެ އިސްމަގާމު އަންހެނަކަށް އަދާ ކުރެވޭނެ ކަމަށް ވިދާޅުވެ، އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމް އަލީ ލިޔުއްވި ފޮތް މައުމޫން ފައުންޑޭޝަނުން ނެރެފި އެވެ.
"އަންހެނަކު އިސްލާމީ ގައުމެއްގެ އެންމެ މަތީ މަގާމު އަދާކުރުމަކީ ޝަރުއީ ގޮތުން ހުއްދަ ކަމެއްތޯ؟" މި ނަމުގައި އަފްރާޝީމް ލިޔުއްވާފައިވާ ފޮތް ޗާޕްކޮށް ނެރުއްވާފައި ވަނީ މައުމޫން ފައުންޑޭޝަންއިންނެވެ.
އެ ފޮތުގައި ޑރ. އަފްރާޝީމް އަލީ ވިދާޅުވެފައި ވަނީ އިސްލާމްދީނުގައި އަންހެނަކަށް އެންމެ މަތީ މަގާމު އަދާކުރުމުގައި ހުރަހެއް ނެތް ކަމަށެވެ. އެކަމަށް ބާރު ދެއްވައި ކީރިތީ ގުރުއާނާއި ސުންނަތާއި އިލްމުވެރިންގެ ބަސްފުޅުތައް އެ ފޮތުގައި ހިމަނާފައިވެ އެވެ.
ެެއެ ފޮތް ނެރުމަށް ޝީ ބިލްޑިންގައި މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ކުރީގެ ރައީސް މައުމޫން އަބްދުލް ގައްޔޫމް ވިދާޅުވީ އެ ފޮތަކީ އާދަޔާ ހިލާފު މޮޅު ބޭފުޅަކު ލިޔުއްވި އާދަޔާ ހިލާފު ފޮތެއް ކަމަށެވެ. އެ މައުޟޫއަކީ ވަރަށް ބަހުސްކުރެވިފައިވާ މައުޟޫއަކަށްވުމުން އެފަދަ މައުޟޫއަކަށް ލިޔުއްވުމަކީ ފަސޭހަފުޅު ކަމެއް ނޫން ކަމަށް ރައީސް މައުމޫން ވިދާޅުވި އެވެ.
ރައީސް މައުމޫން ވިދާޅުވީ އެ ފޮތް ތައާރަފު ކުރުމަކީ އަންހެނުންގެ ހައްގުތައް ހޯދުމަށް ލިބޭ އިތުރު ފުރުސަތެއް ކަމަށާއި ކުރިއަށް އޮތްތަނުގައި އަންހެނަކު މިގައުމުގެ ރައީސްކަން ކޮށްފާނެ ކަމަށެވެ.
ފޮތް ނެރުއްވުމުގެ ޝަރަފް ލިބިވަޑައިގެންނެވި ދައުލަތައް ގިނަގުނަ ހިދުމަތް ކުރައްވާފައިވާ އަނީސާ އަހުމަދު ވިދާޅުވީ އަންހެނުން ރައީސްކަން ކުރުމަށް ގާނޫނުން ހުރަހެއް ނެތަސް މުޖުތަމައުގައި ގޮންޖެހުންތަކެއް އެބަހުރި ކަމަށެވެ. އިސްލާމްދީނުގައި އަންހެނުންނަށް ދެވިފައިވާ އެންމެ ހައްގު މަގާމު ރަނގަޅަށް ބުނެދެވެންޖެހޭ ކަމަށް ވެސް އަނީސާ ވިދާޅުވި އެވެ.
ޑރ. އަފްރާޝީމް ލިޔުއްވާ އަދި ނުރެވިފައިވާ 17 ފޮތެއް ރައީސް މައުމޫނާއި އަފްރާޝީމްގެ އާއިލާއިން ހަދިޔާ ކުރައްވާފައިވާއިރު އެ ފޮތްތައް ކުރިއަށް އޮތްތަނުގައި ނެރުއްވާނެ ކަމަށް ރައީސް މައުމޫން ވިދާޅުވި އެވެ.
މިރޭ ނެރުއްވި ފޮތް ރައީސް މައުމޫން ފައުންޑޭޝަންއިން 50 ރުފިޔާއަށް ވިއްކުމަށް ނިންމާފައިވާއިރު ލިބޭ ފައިސާ ހިލޭ ސާބަހަށް މަސައްކަތް ކުރައްވާ ފަރާތަކަށް ހަދިޔާ ކުރެއްވުމަށް ވަނީ ނިންމާފަ އެވެ.