ރާއްޖޭގެ ވެރިކަމަށް މިއަދުގެ ސަރުކާރު، 2013 ވަނަ އަހަރު އައިކަމަކީ ރާއްޖޭގެ ނަސީބު ކަމަށާއި، އެހެން ނޫން ނަމަ ގައުމު ބަނގުރޫޓު ވީސް ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ރާއްޖޭގެ ކްރެޑިޓް ރޭޓިންގއާ ބެހޭގޮތުން އިދިކޮޅު ފަރާތްތަކުން ދައްކާ ވާހަކަތަކަށް ރައްދު ދެއްވަމުން، ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި އިކޮނޮމިކް މިނިސްޓަރު އިއްޔެ ވިދާޅުވީ ރާއްޖޭގައި މިވަގުތު އިންވެސްޓުކޮށްގެން ތިބި ފަރާތްތައް ވެސް އެ ރޭޓިންގ އަށް މަރުހަބާ ކިޔާ ކަމަށެވެ.
"ބީ2 ޕޮޒިޝަންއޭ ބުނީމަ، ބީއެމްއެލްއާއި، ރާއްޖޭގައި އިންވެސްޓު ކޮށްގެން ތިބި ދިވެހި ފަރާތްތަކާއި، އެންމެ ގިނަ އަދަދަކަށް ރާއްޖޭގައި އިންވެސްޓު ކޮށްފައި ތިބި ސިންގަޕޫރުގެ ވިޔަފާރިވެރިން ކީކޭތޯ ބުނީ. އެބޭފުޅުން ބުނަނީ އަދި ކިރިޔާއޭ ރާއްޖޭގައި ގައުމެއްގެ ސިފައިގައި އިންޓަނޭޝަނަލް މިންގަނޑަކަށް ފައްތައިގެން ކްރެޑިޓް ރޭޓިންގ ނެރެން ފުރުސަތު ލިބުނީ،"
ކްރެޑިޓް ރޭޓިންގ އަކީ އިގްތިސާދީ ގޮތުން ރާއްޖޭގެ ހާލަތު، ބައިނަލްއަގުވާމީ މިންގަނޑަކުން މިންކުރުމަށް ފަހު އާންމުކުރާ ރޭޓިންގއެކެވެ.
މިނިސްޓަރު ސައީދު ވިދާޅުވީ އެމްޑީޕީގެ ސަރުކާރުގައި، ބޭރުގެ ފަރާތްތަކުން އެހީގެ ގޮތުގައި، 18 ޕަސަންޓުގައި ނެގި ލޯނުތައް މިއަދުގެ ސަރުކާރުން ނަގަމުން ދަނީ 25 އަހަރުގެ ދިގު މުއްދަތަކުން އަނބުރާ ދައްކާ ގޮތަށް، 1.75 ޕަސަންޓުގައި ކަމަށެވެ.
"ދެހާސް ތޭރައިގައި ސަރުކާރު ހިންގަން ލިބުނުކަން އެއީ އަޅުގަނޑުމެންގެ ނަސީބު. އެހެން ނޫން ނަމަ ގައުމު އޮންނާނީ ބަނގުރޫޓުވެފައި. އެކަން ތިޔަ އިއްޒަތްތެރި މެމްބަރުން ވެސް ގަބޫލު ކުރައްވާނެ،" ސައީދު ވިދާޅުވިއެވެ.
ރައީސުލްޖުމްހޫރިއްޔާ އަބްދުﷲ ޔާމީން ވެސް މީގެ ކުރިން ވިދާޅުވެފައިވާ ގޮތުން، މަޝްރޫއުތައް ހިންގުމަށް ބޭރު ފަރާތްތަކުގެ މާލީ އެހީ ރާއްޖެއިން ހޯދަމުން ދަނީ ޚަރަދު ކުޑަ ދުވަސްކޮޅަކާ ދިމާކޮށެވެ.
"އަޅުގަނޑުމެންގެ އެޑްވާންޓޭޖުގައި މިދުވަސްކޮޅު އޮތް ކަމަކީ ދުނިޔޭގައި މިވަގުތު މި ހޯދާ ފަންޑިންގެ ޚަރަދު ކުޑަކަން. މި ހާލަތަކީ އަބަދު މިގޮތުގައި އޮންނާނެ ހާލަތެއް ނޫން. އަޅުގަނޑުމެންނަށް އެންމެ ބޭނުންވެފައި ހުންނަ މަޝްރޫއުތަކަށް ފައިސާ ހޯދަން ބަލާއިރު، ކޮސްޓް އޮފް ކެޕިޓަލް ކުޑަ ދުވަސްކޮޅަކާ އަޅުގަނޑުމެން މި ކުރިމަތިލަނީ. އެއީ އަޅުގަނޑުމެންގެ ނަސީބު،" ރައީސް ވިދާޅުވިއެވެ.