ސަރުކާރު ހިންގާ މައި ޕާޓީ ޕީޕީއެމް ތަމްސީލުކުރާ އެއްވެސް ބައްދަލުވުމެއްގައި ދިއްގަރު ދާއިރާގެ މެމްބަރު އަހުމަދު ފާރިސް މައުމޫނަށް ބައިވެރިވެވަޑައެއް ނުގެންނެވޭނެ ކަމަށް އެޕާޓީގެ ޕާލިމަންޓްރީ ގުރޫޕު (ޕީޖީ)ގެ ލީޑަރު އަހުމަދު ނިހާނު ހުސައިން މަނިކު މިއަދު ވިދާޅުވެއްޖެ އެވެ.
ރައީސް އަބްދުﷲ ޔާމީނާ އެކު މުލީއާގޭގައި ބޭއްވި ބައްދަލުކުރެއްވުމަށްފަހު "ސަން"އިން ކުރި ސުވާލަކަށް ޖަވާބު ދެއްވަމުން ނިހާނު ވިދާޅުވީ ސަރުކާރުން އިސް ނަގައިގެން ބޭއްވުމަށް ހަމަޖެހިފައިވާ ސިޔާސީ ޕާޓީތަކުގެ މަޝްވަރާއަކީ ބޮޑު ބައްދަލުވުމެއް ކަމަށެވެ.
ނިހާނު އެހެން ވިދާޅުވީ ސިޔާސީ ޕާޓީތަކުގެ މަޝްވަރާއަށް ޕީޕީއެމްއިން ނަން ފޮނުވާފައިވާއިރު ދިއްގަރު ދާއިރާގެ މެމްބަރު ފާރިސް މައުމޫންގެ ނަންފުޅު އެއަށް ހުށަހަޅާފައި ވުމުން ނެވެ.
"އެ ލިސްޓުގައި ހިމެނޭ އެއް ބޭފުޅެއް ކަމަށް ފާރިސް މައުމޫނަކީ އަޅުގަނޑުމެން ޕާލިމަންޓްރީ ގުރޫޕުގެ މެމްބަރެއްގެ ގޮތުގައި ނުހިމެނުމަށް ނިންމާފައިވާ އެއް މެމްބަރު. އަދި ފިޔަވަޅު އަޅަންޖެހޭ ކޮމެޓީން ވަނީ ފާރިސްގެ ސުލޫކީ މައްސަލައެއް އޮތް ކަމަށް ނިންމާ ޕާޓީންވެސް ވަކިކޮށްފައި. އެ ނިންމުމަށް އިސްތިއުނާފު ކޮމެޓީން ގޮތެއް ނުނިންމާ ހިނދަކު ބެލެވޭނީ އެއީ ޕާޓީގެ މެމްބަރެއް ނޫން ކަމަށް. އެ ކޮމެޓީން ނިންމަންޖެހޭނީ އޭނާގެ މެމްބަރުކަމުގެ ޝަރުތު ހަމަވޭތޯ ނުވަތަ ނޫންތޯ. އެގޮތަށް ނުނިންމާ ހިނދަކު ޕާޓީގެ އެއްވެސް ހަރަކާތެއްގައި ފާރިސް މައުމޫނަކަށް ބައިވެރިއެއް ނުވެވޭނެ،" ނިހާނު ވިދާޅުވި އެވެ.
މުލީއާގޭގައި މިއަދު އޮތް ބައްދަލުކުރެއްވުން ނިންމާލެއްވުމަށްފަހު ޕީޕީއެމް ޕީޖީ ގުރޫޕުގެ ބައެއް މެމްބަރުންނާއި އެކު ނިހާނު (ކ-2) ނުކުމެވަޑައިގަންނަވަނީ: ސަން ފޮޓޯ/ ފަޔާޒު މޫސާ
ނިހާން ވިދާޅުވީ ފާރިސްގެ ނަން ސިޔާސީ ޕާޓީތަކުގެ މަޝްވަރާއަށް ޕާޓީގެ ރައީސް މައުމޫން އަބްދުލް ގައްޔޫމް ފޮނުއްވާފައި ވަނީ އުސޫލުތަކާއި ހިލާފަށް ކަމަށެވެ.
އޭނާ ވިދާޅުވީ ޕާޓީގެ އެންމެ އިސް ގުނަވަނަކީ ޕާޓީގެ ކައުންސިލް ކަމަށެވެ. ކައުންސިލުގެ އެއްވެސް މަޝްވަރާއެއް ނެތި ޕާޓީ ތަމްސީލުކުރާ މުހިއްމު ބައްދަލުވުމަކަށް ވަޑައިގަންނަވަން ޖެހޭނެ ބޭފުޅަކު ކަނޑަނޭޅޭނެ ކަމަށް ވެސް ނިހާން ވިދާޅުވިއެވެ.
"ޕާޓީގެ ރައީސްގެ އެއްޗެއް ނޫން ޕާޓީއަކީ. ޕާޓީގެ މުޝްތަޝާރުގެ އެއްޗެއް ނޫން ޕާޓީއަކީ. އަދި އާންމު މެމްބަރުންގެ ވެސް އެއްޗެއް ނޫން. ޕާޓީއަކީ ޕާޓީގެ އާންމު މެމްބަރުންގެ ވޯޓުން އާންމު މެމްބަރުން ނިންމަވާފައި ޕާޓީގެ ކޮންގްރެސްގައި ވަކި ކަންތައްތަކެއް ހުށަހަޅުއްވައިގެން އެގޮތަށް ނިންމާފައި އޮތް އެއްޗެއް ޕާޓީއަކީ. އެހެންވީމަ ކައުންސިލުން ނިންމަވަން އޮތް ކަމެއް އެންމެ ބޭފުޅަކަށް ނުވަތަ ދެބޭފުޅަކަށް ނުނިންމޭނެ ކަމަށް އަޅުގަނޑު ގަބޫލު ކުރަނީ،" ނިހާނު ވިދާޅުވި އެވެ.
އޭނާ ވިދާޅުވީ ޑިމޮކްރަޓިކް ނިޒާމު ގަބޫލުކުރާ އެއްވެސް ބޭފުޅެއް އެ ނިންމުން ގަބޫލު ނުކުރައްވާނެ ކަމަށެވެ.
ފާރިސްގެ އިތުރުން މަޝްވަރާގައި ޕީޕީއެމް ތަމްސީލު ކުރަން އެޕާޓީން ހުށަހަޅާފައިވާ އަނެއް ނަންފުޅަކީ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް އެވެ. އެ ނަންތައް ހުށަހެޅުމުން ސަރުކާރުން ބުނެފައި ވަނީ ސިޔާސީ ޕާޓީތަކުގެ މަޝްވަރާތަކުގައި ސިޔާސީ ޕާޓީތަކުން ބައިވެރިވާ ބޭފުޅެއްގެ ނަން ފާސްކުރަން ޖެހޭނީ ޕާޓީގެ ކައުންސިލުން ނަން ފާސްކޮށްގެން ކަމަށެވެ.