އަމީން ކޮންސްޓްރަކްޝަންސް އިން ހުޅުމާލޭގައި ފަށާފައިވާ 14 ބުރީގެ އިމާރާތް (އަމީން އެވެނިއު)ގެ މަސައްކަތް ނިމި އަންނަ އަހަރުގެ ތެރޭގައި އެޕާޓްމެންޓުތައް އޭގެ ވެރިފަރާތްތަކާ ހަވާލުކުރަން ނިންމާފައިވާ ކަމަށް އެކުންފުނިން ބުނެފިއެވެ.
އަމީން އެވެނިއުގައި މިއަދު ނޫސްވެރިންނާ ބައްދަލު ކުރައްވައި އެ އިމާރާތުގެ މަސައްކަތް ކުރިއަށް ގޮސްފައިވާ މިންވަރާ ގުޅޭ ގޮތުން މައުލޫމާތު ދެއްވަމުން އަމީން ކޮސްޓްރަކްޝަންސްގެ ސޭލްސް ޓީމްގެ އާދަމް ނިޒްވީން ވިދާޅުވީ، އަމީން އެވެނިއު ޕްރޮޖެކްޓުގެ ދަށުން އިމާރާތް ކުރާ "ޓަވަރ އޭ" އަދި "ޓަވަރ ބީ"ގެ އެޕާޓްމެންޓުތައް އަންނަ އަހަރުގެ ޖުލައި މަހުގެ ތެރޭގައި ދޫކުރަން ފަށާނެ ކަމަށެވެ. އަދި "ޓަވަރު ސީ"ގެ އެޕާޓްމެންޓުތައް ދޫކުރަން ހަމަޖެހިފައިވަނީ އަންނަ އަހަރުގެ ޑިސެމްބަރު މަހުގެ ތެރޭގައި ކަމަށްވެސް އޭނާ ވިދާޅުވިއެވެ.
ތިން ޓަވަރު ހިމެނޭ ގޮތަށް އިމާރާތް ކުރާ މި އިމާރާތުގެ ކޮންމެ ޓަވަރެއްގައިވެސް 14 ފަންގިފިލާ ހުންނާނެ އެވެ. ތިން ޓަވަރުގެ ވެސް ގްރައުންޑް ފްލޯއާއި ފަސްޓް ފްލޯ ޚާއްސަކުރެވިފައިވަނީ ވިޔަފާރިތަކަށެވެ.
މި މަޝްރޫއުގެ ދަށުން ތިން ޓަވަރު އަޅަން ނިންމާފައިވާ އިރު ނިޒްވީން ވިދާޅުވީ "ޓަވަރު އޭ" ގާތްގަނޑަކަށް މިހާރު ނިމިފައިވާ ކަމަށެވެ. މިހާރު އެ ޓަވަރުގައި ކުރިއަށް ގެންދަނީ ކަރަންޓު ވައިރު ކުރުމާއި ކުލަ ލުން ފަދަ ކުދިކުދި ކަންތައްތަކެވެ. "ޓަވަރު ބީ" ގެ ހަ ވަނަ ފަންގިފިލާއާ ހަމައަށް ފާރު ރާނައި ކޮޓަރިތައް ވަކި ކުރެވިފައިވާ އިރު އެ އިމާރާތްވެސް ވަނީ މިހާރު ޓެރެސްއާ ހަމައަށް އުފުލާފައެވެ.
އަމީން ކޮސްޓްރަކްޝަންސްގެ ސޭލްސް ޓީމްގެ އާދަމް ނިޒްވީން މީޑިއާ އަށް މައުލޫމާތު ދެއްވަނީ -- ސަން ފޮޓޯ
މި މަޝްރޫއު އިއުލާންކޮށްދެއްވީ ކުރީގެ ނައިބު ރައީސް އަހުމަދު އަދީބު ޓޫރިޒަމް މިނިސްޓަރުގެ މަގާމު ފުރުއްވި އިރު އެމަނިކުފާނެވެ. މި ހައުސިން މަޝްރޫއުގެ ދަށުން ތިން ކެޓަގަރީ އަކަށް އެޕާޓްމަންޓްތައް ވަނީ ބަހާލާފައެވެ. އެއީ ބޭސިކް އެޕާޓްމެންޓްސް، ލަގްޒަރީ އެޕާޓްމެންޓްސް އަދި ޕެންޓް ހައުސް އެޕާޓްމެންޓެވެ.
ބޭސިކް އެޕާޓްމެންޓްސްގެ ބޮޑު މިނަކީ 940 އަކަފޫޓާއި 1085 އަކަފޫޓެވެ. މި ޔުނިޓްތަކުގައި ދެ ކޮޓަރިއާއި ތިން ކޮޓަރީގެ އެޕާޓްމެންޓް ހިމެނެއެވެ. ނިޒްވީން ވިދާޅުވި ގޮތުގައި އެޕާޓްމަންޓު ގަންނަ ފަރާތުން ބޭނުންވާ ގޮތަށް އެޕާޓްމެންޓަށް ބަދަލު ގެނެސްދެވިދާނެއެވެ. އަދި ބޭސިކް އެޕާޓްމެންޓް ތަކުގެ އަގު ފެށެނީ 2.2 މިލިއަން ރުފިޔާއިން ކަމަށްވެސް އޭނާ ވިދާޅުވިއެވެ. މި ކެޓަގަރީގެ ދަށުން 189 އެޕާޓްމެންޓް ދޫކުރަން ނިންމާފައިވެއެވެ.
ލަގްޒަރީ އެޕާޓްމެންޓްސް ކެޓަގަރީގައި ހިމެނެނީ 54 އެޕާޓްމެންޓެވެ. މި އެޕާޓްމެންޓް ފަރުމާކުރެވިފައި ހުންނާނީ 1290 އަކަ ފޫޓާއި 1570 އަކަފޫޓް ދެމެދުގެ ބޮޑު މިނެއްގައެވެ. މިއީ ހަތަރު ކޮޓަރީގެ އެޕާޓްމެންޓެވެ. މި އެޕާޓްމެންޓްތައް ފެށޭ އަގަކީ 3.7 މިލިއަން ރުފިޔާ އެވެ.
އެޕާޓްމެންޓްގެ ތިންވަނަ ކެޓަގަރީ ކަމަށްވާ ޕެންޓް ހައުސް ފަރުމާކުރެވިފައިވަނީ ދެ ފްލޯ އަށެވެ. އެއީ މަތީ ފްލޯގައި އެޓޭޗް ފާޚަނާ އާާއި އެކު ދެ ކޮޓަރި އަދި ތިރީ ފްލޯގައި އެޓޭޗް ފާޚަނާ އާއި އެކު މެއިޑް ރޫމެއް ހިމެނޭ ގޮތަށެވެ. މި އެޕާޓްމެންޓް ފެށޭ އަގަކީ 6.5 މިލިއަން ރުފިޔާ އެވެ. އަމީން އެވެނިއުގެ ތިން ޓަވަރުގައި މިކެޓަގަރީގެ ޖުމްލަ 18 އެޕާޓްމެންޓް ހުންނާނެ އެވެ.
މިދިޔަ އަހަރު މާޗް މަހުގައި އިއުލާން ކުރި މި މަޝްރޫގެ މަސައްކަތް މިހާރު މިވަނީ ނިމުމަކާ ގާތްވެފައެވެ. އަދި އެޕާޓްމެންޓުތައް ވިއްކަން ހުޅުވާލުމުން ހަ މަސް ތެރޭގައި ހުރިހާ އެޕާޓްމެންޓްތަކެއް ވަނީ ވިކި ހުސްވެފައެވެ.
ހުޅުމާލޭގައި ހަދާ އެ އެޕާޓްމަންޓްތައް ގަންނަ ފަރާތްތަކުން ފްލެޓްގެ އަގުގެ 20 ޕަސެންޓް ދެއްކުމުން ބާކީވާ 80 ޕަސެންޓް ދެއްކޭނެ އިންތިޒާމް ހަމަޖައްސައިދޭނީ ހައުސިން ޑިވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ)ންނެވެ.