މާލޭގެ އަރަބިއްޔާ އަދި ގާކޮށި ބިމުގައި އިންޑިއާގެ ކުންފުންޏަކާ ހަވާލުކޮށްގެން އެޅި ފްލެޓުތަކަށް ސަރުކާރުން ކަނޑައެޅި ގޮތަށް، ފަސް އަހަރު ދުވަހުން ދެ މިލިޔަން ރުފިޔާ ދައްކަން އެއްބަސް ނުވާ ފަރާތްތަކަށް ހުޅުމާލެއިން ފްލެޓު ދޭން ނިންމާފައިވާ ކަމަށް ހައުސިންގ މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މިދިޔަ ބުރާސްފަތި ދުވަހު ހައުސިންގ މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި، ހައުސިންގް މިނިސްޓަރު ޑރ. މުހައްމަދު މުއިއްޒު ވިދާޅުވީ ފްލެޓުތަކަށް ސަރުކާރުން ދައްކަންޖެހޭ ފައިސާ ދައްކާފައިވާ ކަމަށެވެ. ސަރުކާރުން ފްލެޓުތަކަށް ދައްކަން ޖެހިފައި އޮތީ 278 މިލިޔަން ރުފިޔާއެވެ.
"އެޗްޑީސީއިން މިތަންތަން [ފްލެޓުތައް] ލިބިފައިވާ މީހުންނާ އެކު އެގްރިމެންޓު ހަދައިގެން ބޭންކު މެދުވެރިކޮށް މޯގޭޖު ހަމަޖައްސައިގެން އުސޫލުން ދާ ގޮތަށް. މީގެ ދެ ދުވަސް ކުރިން ސަރުކާރުގެ ކަމާ ބެހޭ ފަރާތްތަކުން ވަނީ ހަމަޖައްސައިދީފައި، ކުރިޔަށް ގެންދެވޭ ގޮތަށް،" މިނިސްޓަރު ބުރާސްފަތި ދުވަހު ވިދާޅުވިއެވެ.
މާލޭގެ ގާކޮށްޓާއި އަރަބިއްޔާ ބިމުގައި ފްލެޓު އެޅީ އެޕެކްސް ރިއަލްޓީ ކުންފުނިންނެވެ.
ފްލެޓު އެޅުމަށް އެޕެކްސްއަށް ވަނީ އަރަބިއްޔާ ހުރި ބިން، ގާކޮށި، ނާދީ އަދި އޯޑިއޯން ހުރި ބިން ހަވާލު ކޮށްފައެވެ. އެއީ ފްލެޓު މަޝްރޫއުގެ ފުރަތަމަ ފިޔަވައްސެވެ. ނަމަވެސް މިހާތަނަށް ނިމިފައި ވަނީ އަރަބިއްޔާއާއި ގާކޮށި ފްލެޓު ކޮމްޕްލެކްސް ތަކެވެ. އަދި އެ ދެ އިމާރާތުގައި ވެސް، ސަރުކާރަށް ލިބޭ ފްލެޓުތައް މި އަހަރު ސަރުކާރާ ހަވާލު ކޮށްފައިވެއެވެ.
އެހެން ނަމަވެސް މި ފްލެޓުތައް ނިމޭތާ 90 ދުވަސް (ތިން މަސް) ތެރޭގައި ހުރިހާ ފައިސާއެއް ދިނުމަށް އެއްބަސްވުމުގެ ދަށުން ސަރުކާރަށް ލާޒިމު ކޮށްފައިވެއެވެ.
ހައުސިންގ މިނިސްޓަރު ވިދާޅުވި ގޮތުގައި، ފަސް އަހަރު ތެރޭގައި ފްލެޓަށް ދެ މިލިޔަން ރުފިޔާގެ އަގު އަދާ ކުރާ ގޮތަށް އެއްބަސްވި ފަރާތްތަކާ އެކު އެގްރިމެންޓު ހެދުމުގެ މަސައްކަތް ހައުސިންގ ޑިވެލޮޕްމެންޓް ކޯޕަރޭޝަނުން ވަރަށް އަވަހަށް ކުރަން ފަށާނެ އެވެ.
ފަސް އަހަރު ދުވަހުން، ދެ މިލިޔަން ރުފިޔާއަކީ ކޮންމެ މަހަކަށް ބަހާލައިގެން ދައްކާ ނަމަ 33،000 ރުފިޔާއެވެ.