ކުރީގެ އަރަބިއްޔާ ހުންނަ ބިމާއި ގާކޮށީގައި އިންޑިއާގެ ޓާޓާ ކުންފުނިން އެޅި ފްލެޓުތަކުގައި ކަރަންޓު ބެކަޕް ސިސްޓަމަކާއި މަތީ ފްލޯތަކަށް ޕްރެޝަރުގައި ފެން ފޯރުކޮށްދޭނެ ބޫސްޓަރު ސިސްޓަމް ވެސް ހަރުކޮށްފައި ހުންނާނެ ކަމަށް އެ މަޝްރޫއު ކުރިޔަށް ގެންދިޔަ ފަރާތުން ބުނެފި އެވެ.
ރޭ މާލޭގައި ބޭއްވި ޚާއްސަ ހަފްލާއެއްގައި، ޓާޓާ އިން ވަނީ އަރަބިއްޔާ އާއި ގާކޮށީގައި އެޅި ފްލެޓުތައް ދިވެހި ސަރުކާރާ ހަވާލު ކޮށްފަ އެވެ.
ޓާޓާ ކުންފުނީގެ މެޖޯރިޓީ ޝެއާ އޮންނަ އެޕެކްސް ރިއަލްޓީ އާއި، އެކުންފުނީގެ ރާއްޖޭގެ ޕާޓްނަރު ހޮޓެލް އެންޑް ރިސޯޓްސް ކޮމްޕެނީ އިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން، ހޮޓެލް އެންޑް ރިސޯޓްސް ކޮމްޕެނީގެ ޗެއާމަން މުހައްމަދު އަލީ ޖަނާހު ވިދާޅުވީ، އަރަބިއްޔާ އިމާރާތަކީ 24 ގަޑި އިރު ކަރަންޓުގެ ޚިދުމަތް ލިބޭނެ ތަނެއް ކަމަށެވެ. އެތަނުގައި ބެކަޕް ޖެނެރޭޓަރެއް ހުރެ އެވެ.
އިންޑިއާގެ އެޕެކްސް ރިއަލްޓީގެ ރާއްޖޭގެ ޕާޓްނާ އެޗްއާރުސީގެ ޗެއާމަން މުހައްމަދު އަލީ ޖަނާހު -- ސަން ފޮޓޯ
"މުޅި އިމާރާތަށް ކަރަންޓު ދެވޭ ގޮތަށް ބެޖަޕް ޓްރާންސްފޯމާސް ލާފައި، ޕެނަލް ބޯޑުވެސް ވަރަށް ފުރިހަމަކޮށް އެހުރީ، [އެތަކެތި] އެވަނީ ޖާމަނީ އިން ގެނެސްފައި،" ޖަނާހު ވިދާޅުވި އެވެ.
އަދި މީގެ އިތުރުން އެ އިމާރާތުގެ ވޯޓާ ޑިސްޓްރިބިއުޝަނަށް ބޫސްޓާ ޕަމްޕުތަކެއް ވެސް އިންސްޓޯލް ކޮށްފައިވާ ކަމަށް އޭނާ ވިދާޅުވި އެވެ.
"ފެނާއި ކަރަންޓާ އެއީ އެންމެ މުހިންމު ކަންތައް. އެކަންތަކަށް އަޅުގަނޑުމެން ވާނީ އެޑްރެސް ކޮށްފައި. އެންމެ ލަގްޒަރީ އެޕާޓްމެންޓުތަކުގައި ވެސް ޚިދުމަތް ލިބޭނެ ގޮތަށް ސޯޝަލް ހައުސިންގް އަށް އެކަން ކޮށްދީފައި ވާނީ. އެއީ އަޅުގަނޑުމެންގެ އަމިއްލަ ރިކޮމެންޑޭޝަނާކާ އެކީގައި. އެ ފެންވަރުގައި އަމިއްލަ އިމާރާތްތައް ހުންނާނެ ހެނެއް ހިޔެއް ނުވޭ،" ޖަނާހު ވިދާޅުވި އެވެ.
އޭނާ ވިދާޅުވީ، އަރަބިއްޔާ އިމާރާތުގައި ޓެރަސް އޮންނާނީ ވަރަށް ބޮޑަށް ހުޅުވާލެވިފައި ކަމަށާއި އެ އިމަރާތުގައި ކުޑަ ކުދިން ކުޅުމަށް ދޮންވެލި ލާފައިވާ ތަންކޮޅެއް ހަދާފައި ހުންނާނެ ކަމަށެވެ.
އަރަބިއްޔާ ސްކޫލް ކުރިން ހުރި ބިމުގައި އިންޑިއާގެ ޓާޓާ ކުންފުނިން އިމާރާތްކޮށްފައިވާ ފްލެޓްތައް -- ސަން ފޮޓޯ
އަރަބިއްޔާ ސްކޫލް ކުރިން ހުރި ބިމުގައި އިންޑިއާގެ ޓާޓާ ކުންފުނިން އިމާރާތްކޮށްފައިވާ ފްލެޓްތައް -- ސަން ފޮޓޯ
އަދި، ގާކޮށީގައި އިމާރާތް ކުރާ އެޕާޓްމެންޓް ކޮމްޕްލެކްސްއަކީ އަރަބިއްޔާ އަށް ވުރެ ބޮޑު ތަނެއް ކަމުން އެތަންތަން ގާކޮށީގައި ތަރައްގީކޮށްފައި ވާނީ ބޮޑުކޮށް ކަމަށް ޖަނާހު ވިދާޅުވި އެވެ.
މީގެ އިތުރުން، ގާކޮށީގެ ތިރިން ސަރުކާރުން ދެއްވާފައިވާ ހުސް ބިންތައް މިހާރު ހުންނާނީ ބަގީޗާއަކަށް ބަދަލު ކޮށްފައި ކަމަށާއި އެންމެ ކުޑަ ޚަރަދު ކޮށްގެން އެންމެ އުފެއްދުންތެރި، ފެންވަރު ރަނގަޅު މަސައްކަތެއް ނެރެވޭ ވަރު ކޮށްފައި ވާނެ ކަމަށް ޖަނާހު ވިދާޅުވި އެވެ.
ގާކޮށީގައި ހަދާފައިވާ އެޕާޓްމެންޓު ކޮމްޕްލެކްސްއަށް ޓާޓާ އިން ދީފައިވާ ނަމަކީ "މާލެ ސްކޮޔާ" އެވެ. އަދި އަރަބިއްޔާގައި ހެދި ކޮމްޕްލެކްސް އަށް ކިޔާ ނަމަކީ "މާލެ ގްރޭންޑް" އެވެ. މާލެ ގްރޭންޑުގައި 90 ފްލެޓު ހަދައި، ސަރުކާރާ އެތަން ހަވާލު ކޮސްފައިވާ އިރު މާލެ ސްކޮޔާގައި ހެދި 198 ފްލެޓު ވެސް ސަރުކާރާ ރޭ ވަނީ ހަވާލުކޮށްފަ އެވެ.
އެ ފްލެޓުތައް ހަދާފައި ވަނީ، ޖާގަ ބޮޑުކޮށް، ގުދުރަތީ ގޮތުން އަލި ވަދެ، ވައި ދައުރުވާނެ ފަދަ ގޮތަކަށެވެ.