ކާމިޔާބު މީހަކަށް ވާނީ ހަމަ އެކަނި މެޑަލް އެއް ލިބުމުން ނޫން ކަމަށާއި، އޮލިމްޕިކްސް ގައި ވާދަ ކުރާ އިންޑިއާގެ އެތުލީޓުން ކުރާ ހިތްވަރަށް ސާބަސް ދޭން ޖެހޭ ކަމަށް އިންޑިއާގެ މަޝްހޫރު ފިލްމީ ތަރި އަމީތާބު ބައްޗަން ބުނެފި އެވެ.
މިހާރު ބްރެޒިލްގެ ރިއޯ ގައި ކުރިއަށްދާ އޮލިމްޕިކްސް ގޭމްސްގައި އިންޑިއާގެ 117 އެތުލީޓުން ވަނީ ބައިވެރިވެފަ އެވެ. ނަމަވެސް އިންޑިއާ އަށް މިހާތަނަށް ލިބިފައި ވަނީ އެންމެ މެޑެއްޔެކެވެ.
އިންޑިއާ އަށް ރަނގަޅު ވަނަތަކެއް ނުލިބޭތީ ބައެއް މީހުން އަންނަނީ ސަރުކާރަށް ފާޑިކިޔަމުންނެވެ. އެ ފާޑުކިޔުންތަކަށް ރައްދު ދެމުން އަމީތާބު ބުނީ އެތުލީޓުންނަށް މުޅި އިންޑިއާގެ ސަޕޯޓު ބޭނުންވާ ކަމަށެވެ.
"އެތުލީޓުންނަށް އެބަ ބޭނުންވޭ މުޅި ގައުމުގެ ސަޕޯޓު. އެ ހިސާބަށް ގޮސް ގައުމު ރަމްޒު ކުރުމަކީ ފަސޭހަ ކަމެއް ނޫން. އަދި ކުޑަ ކަމެއް ވެސް ނޫން. އެތުލީޓުން ކުރަމުން އަންނަ މަސައްކަތަށް އަހަރެން ސާބަސް ދެން،" އަމީތާބު ބުންޏެވެ.
ބައިނަލްއަގުވާމީ ބޮޑު މުބާރާތެއްގައި އިންޑިއާ ތަމްސީލް ކުރަން ދިއުމަކީ ވެސް ބޮޑު ކާމިޔާބެއް ކަމަށް އަމީތާބު ބުންޏެވެ.
"އިންޑިއާ ތަމްސީލު ކުރާނެ ހުނަރުވެރި ޒުވާނުން ތިބުމަކީ ފާހަގަކޮށްލަން ޖެހޭ ކަމެއް. މެޑަލް އެއް ނުލިބުމަކީ މުޅިން އެހެން ވާހަކަ އެއް. ދިރިއުޅުމުގައި ކާމިޔާބު ވަނީ ހަމައެކަނި މެޑަލް އެއް ލިބުމަކުން ނޫން،" އޭނާ ބުންޏެވެ.
އަމީތާބު ބުނީ، މި އަހަރުގެ އޮލިމްޕިކްސް އިން ލިބުނު ތަޖުރިބާގެ އަލީގައި ކުރިއަށް އޮތް އޮލިމްޕިކްސް ގައި އިންޑިއާގެ އެތުލީޓުންގެ ފަރާތުން ބޮޑު ތަފާތެއް ފެންނާނެ ކަމަށެވެ.