ބޮލީވުޑްގެ އެކްޓަރު ޓައިގާ ޝްރޮފްއަށް މިދިޔަ މަހު މުމްބާއީގައި ދިން ނުރައްކާތެރި ބަޑީގެ ހަމަލާއާ ގުޅިގެން، މަޝްހޫރު ފިލްމީ ތަރިން އާންމުން އެއްވެ އުޅޭ ތަންތަނަށާއި މީހުން ގިނަ ސަރަހައްދުތަކަށް ނުދިއުމަށް އިންޑިއާގެ ފުލުހުން ޚާއްޞަ އިލްތިމާސެއް ކޮށްފިއެވެ.
ރޮއިޓާސްއަށް މައުލޫމާތު ދެއްވި މުމްބާއީ ފުލުހުންގެ އިސް އޮފިޝަލަކު ވިދާޅުވި ގޮތުގައި، މި ފިޔަވަޅަކީ ފިލްމީ ދާއިރާގެ މަޝްހޫރު ފަންނާނުންގެ ފުރާނައަށް އޮތް ނުރައްކާ ބޮޑުވެ، ސަލާމަތީ ކަންބޮޑުވުންތައް އިންތިހާއަށް އިތުރުވުމާ ގުޅިގެން ރައްކާތެރިކަމުގެ ގޮތުން ނެރުނު ކުއްލި އިންޒާރެކެވެ.
މި ނުރައްކާތެރި ހާދިސާ ހިނގާފައިވަނީ މިދިޔަ އޮކްޓޯބަރު މަހުގެ 18 ވަނަ ދުވަހުގެ ހަވީރުގެ ވަގުތެއްގައެވެ. އެގޮތުން، މުމްބާއީގެ ޖުހޫ ސަރަހައްދުން އެކްޓަރު ޓައިގާ ޝްރޮފް ދަތުރުކުރަމުން ދިޔަ ކާރަށް އަމާޒުކޮށް، ސައިކަލެއްގައި ދިޔަ ހަތިޔާރު އެޅި ތިން މީހަކު ވަނީ ކުއްލިއަކަށް ބަޑީގެ ހަމަލާތަކެއް ދީފައެވެ. ނަމަވެސް އެ ހަމަލާގައި ޓައިގާ ޝްރޮފަށް މާ ބޮޑު ގެއްލުމެއް ނުލިބި ސަލާމަތްވި ނަމަވެސް، އޭނާގެ ޑްރައިވަރަށާއި މަގުމަތިން ދިޔަ އާންމު މީހެއްގެ ގަޔަށް ވަޒަން އަރައި ބޮޑެތި އަނިޔާތަކެއް ވަނީ ލިބިފައެވެ.
އިންޑިއާގެ މަޤުބޫލު ފިލްމީ ތަރިން ކަމަށްވާ އަކްޝޭ ކުމާރު، އަމީތާބް ބައްޗަން އަދި ސަލްމާން ޚާން-- ފޮޓޯ/އެންޑީޓީވީ މި ހަމަލާއާ ގުޅިގެން ފުލުހުން ފެށި ވަރުގަދަ އޮޕަރޭޝަންގައި، އިންޑިއާގެ ޖަލުގައި ބަންދުކޮށްފައި ހުރި ނުރައްކާތެރި ގޭންގު ލީޑަރު ލޯރެންސް ބިޝްނޯއީއާ ގުޅުން އޮންނަ އަނިލް ޕަންޑިތު ހޯދުމުގެ މަސައްކަތް މިހާރު ވަނީ ފަށާފައެވެ. މީގެ އިތުރުން، މި މައްސަލައިގެ ތަހުގީގުގައި މިހާތަނަށް 11 މީހަކު ހައްޔަރުކޮށްފައިވާއިރު، އޭގެ ތެރެއިން ތިން މީހަކު އަތުލައިގަތީ ރާޖަސްތާނުގެ ކޯޓާއިންނެވެ. އަދި ބާކީ ތިބި މީހުން ހައްޔަރުކޮށްފައި ވަނީ ވެރިރަށް ދިއްލީ އާއި ހަރިޔާނާގެ އެކި ސަރަހައްދުތަކުގައި ހިންގި ޚާއްޞަ ރެއިޑްތަކުގައެވެ. ފުލުހުން މިހާރު އަންނަނީ މީގެ ކުރިން ވެސް ބޮލީވުޑްގެ އެކި ފަރާތްތަކަށް އަމާޒުކޮށް ހަމަލާދީފައިވާ ނުރައްކާތެރި ގޭންގަކާ މި ކަމާ އޮތް ގުޅުން ފުޅާ ދާއިރާއެއްގައި ބަލައި ތަހުގީގުކުރަމުންނެވެ.
މި ނުރައްކާތެރި ހާދިސާއާއެކު، ސެލެބްރިޓީންގެ ސަލާމަތީ ކަންކަން ބަލަހައްޓާ ދައުލަތުގެ ފުލުހުންނާއި އަމިއްލަ ސެކިއުރިޓީ އޭޖެންސީތަކުން ވަނީ އެ އިންތިޒާމުތައް ވަގުތުން އަލުން މުރާޖައާކޮށް އިތުރަށް ހަރުދަނާކޮށްފައެވެ. ސަލާމަތީ ފިޔަވަޅުތައް މިހާރު ވަރުގަދަކޮށްފައިވާ މިންވަރު ހާމަވެގެން ދިޔައީ، ދާދިފަހުން މުމްބާއީގައި ހުންނަ އަމިއްލަ ގޭގެ ބޭރުން ސަޕޯޓަރުންނާ ބައްދަލުކުރި މެގަސްޓާ އަމީތާބް ބައްޗަން ފެނިގެންދިޔަ ގޮތުންނެވެ. އޭނާ ފޭނުންނާ ބައްދަލުކުރީ އެކަމަށް ޚާއްޞަކޮށް ތައްޔާރުކުރެވުނު 12 ފޫޓު އުސް ބުލެޓްޕްރޫފް ބިއްލޫރިގަނޑެއްގެ ފުރަގަހުގައި ހުރެގެންނެވެ. މިއީ ޓައިގާ ޝްރޮފަށް ދިން ބަޑީގެ ހަމަލާއަށްފަހު، މުޅި ބޮލީވުޑްގެ ސަލާމަތީ މާހައުލަށް އައިސްފައިވާ ބޮޑު ބަދަލު ސިފަކޮށްދޭ އަލިގަދަ ހެއްކެކެވެ.
ލޯރެންސް ބިޝްނޯއީގެ ގޭންގުން މީގެ ކުރިންވެސް ބޮލީވުޑްގެ ނުފޫޒުގަދަ އެތައް ތަރިއަކަށް ވަނީ ފާޅުކަން ބޮޑު ގޮތެއްގައި މަރުގެ އިންޒާރުތައް ދީފައެވެ. އޭގެ ތެރޭގައި އެ ގޭންގުގެ އެންމެ ބޮޑު އަމާޒަކަށް ވެފައިވާ ސަލްމާން ޚާންގެ އިތުރުން، އޭނާގެ ބައްޕަ އަދި މަޝްހޫރު ސްކްރީން ރައިޓަރު ސަލީމް ޚާންއަށްވެސް ވަނީ މަރުގެ އިންޒާރުގެ ސިޓީތައް ފޮނުވާފައެވެ. މީގެ އިތުރުން ޑައިރެކްޓަރު ކަރަން ޖޯހަރަށާއި، ޕަންޖާބީ ލަވަކިޔުންތެރިޔާ އަދި އެކްޓަރު ގިއްޕީ ގްރެވާލް އަދި އޭޕީ ދިލޮންއަށްވެސް ވަނީ މި ގޭންގުގެ ފަރާތުން ސީދާ މަރުގެ އިންޒާރުތަކާއި ބިރުދެއްކުންތަކާ ކުރިމަތިލާން ޖެހިފައެވެ. އަދި މިފަދަ އިންޒާރުތަކާ ގުޅިގެން މީގެ ކުރިން މަޝްހޫރު ލަވަކިޔުންތެރިޔާ ސިދޫ މޫސްވާލާ ވަނީ މި ގޭންގުން ދިން ބަޑީގެ ހަމަލާއެއްގައި މަރާލާފައެވެ.